Aⲁmaal Ar Rusul 13
13
Kaniisa gi Anṯaakiiya
1Nebiŋa a muⓐallimiin lijo kaniisa gina gijo gi Anṯaakiiya, lina lan Barnaaba, a Simⓐaan gwina gwan Niijar, a Luukiyuus gwina gwiro Gerawaani, a Manaayin, gwina gwijilo Hiiruudus gwai gwina gwiro kweleny, a Shaawul. 2A dina upijilo Kwelenya ŋiro, athilje jamu al Dhigirim dhina Dhiŋir arnu, Ruijinyilo Barnaabaŋaije Shaawul gwai ter dilapai ŋiro ŋina ŋiminyil ornaijo. 3A dina mal je jamu alabiŋaijo Kaloŋa, anigeta doi alaŋ, allidhiŋa.
Barnaabaŋa Shaawul gwai gi Gubrus
4A ŋediŋa ibila lina lukejilo Dhigirim dhina Dhiŋir alule gi Saluukiya; a mine alela gi felluuka alaŋ gi Gubrus. 5A dina malobani gi Salaamiis, alabiŋaijo lijo dhuŋuna dha Kalo gi majaamiⓐ gwa Yahuud. Alje Yuuẖanna ŋalai athuŋwul upijo ŋiro. 6A dina malelila galo jaziira peth alela gi Baafuus, albudhe Yahuudi ŋalai gwina gwan Baaryashuuⓐ gwina gwiro gwuma, ŋwuro nebi gwina gwiro gwidhuŋun. 7Gwina gwijilo wakiil gwai gwina gwan Sarjiyuus Buulus, gwina gwiro kwiji gwina gwiliŋidhi dhuŋuna momaŋ, ŋwurnie Barnaabaŋaije Shaawul gwai, ŋwari gwadiŋini dhuŋuna dha Kalo. 8Albi gwuma gwina gwan ⓐaliim dhinyi (dhuŋun dhan gwina gwiro gwuma dhuthi maⓐna gwan jiriny juŋun) ŋwubupe duŋwurle wakiil galo gi dhuŋun dha imaan. 9Abi Shaawul, (gwina gwan Buulus ko,) oinyadhe Dhigirima dhina Dhiŋir, ŋwutejo je, 10ŋwarnu, Ŋa gwina gwoinyadho dhuŋuna dha dhukinejo ganu a ŋwujimi, ŋa gwina gwiro ŋari ŋa Ibliis, a ŋa gwina gwiro dhuwan dha dhuŋun peth dhina dhiŋir, ŋa gwati gwara gwadhuna dupie dai ganu da Kweleny dina didhunu galo na? 11A ŋinena, aŋadhi, dhoi dha Kweleny dho duguŋa, a ŋa gwamiri gi je a ŋa gwati gwaŋa aŋinu ŋwamun coŋ no. A kaija ibige an duduru uludha alaŋ ŋwurimeye gi je; ŋwuwurilile galo ŋwubupe kwijo gweda duŋwodha gi dhoi. 12A dina ma wakiil aŋa dhuŋuna dhina dhijo, ŋwuminyi, ŋinena ulidhuŋw galo dir gi taⓐliim dha Kweleny.
Gi Anṯaakiiya gwa Biisiidiiya. Buulus gwabiŋaijo Yahuud
13A Buulusŋa dire liji lai lina lijil lai gi Baafuus, alela felluuka gwai gi Barja gwina gwathije gi Bamfiiliiya. Albi Yuuẖanna gathani ŋwaura gi Urushaliim. 14Abi ŋediŋa gathani Barjaŋw, alila gi Anṯaakiiya gwa Biisiidiiya. Aluni gi majmaⓐ gi lamun la Sabith, aljalo. 15A dina malabiŋaijo kitham gina guthi naamuus a dhuŋun dha nebiŋa, an leleny la majmaⓐ ukejiya alarnu, Liji lai lina liro limega, ada nyaŋa limuthi dhuŋuna dhadhi gathaje lijo uwa, abiŋul. 16A Buulus direlaŋ, ŋwulaici ŋalŋalam dhoi dhai ŋwarnu, Liji lai la Israayiil, a nyaŋa lina lathidhenya Kaloŋa diŋinul. 17Kalo ga liji ibila la Israayiil guthunu baboŋaije ganu lega, ŋwabrico lijo dilro lina linaŋ dina rilo lirin gi len la Mas̱r, ŋwulteya por dhoi dhai dhuŋun dhina dhinaŋ. 18Ŋwumuthi dhugore jidhileo dure‐ram gi dhuŋun dhina dhuthilo gi leba. 19Ŋwerniye liumam lina liro kworoŋo‐thiril gi len la Kanⓐaan, ŋwulguginijo ŋwena ganu ŋwegen ŋwuldhedha liji ladhi Israayiil githo jidhileo arbaⓐ miiya wa khamsiin. 20A gidon ŋwuldhedha jadhi di gi lamun la Samwiil gwina gwiro nebi. 21Albaji albupe malik; albi Kalo dhedha Shaawul gwina gwiro ŋari ŋa Kiis, gwina gwiro kwiji gwa gabiila ga Banyaamiin, ŋwuje jidhileo dure‐ram. 22A dina muŋw ubire, ŋwulgitijo Daawuduŋw duŋwuro malik gwegen; gwina gwidhedhuŋw shahaada gwina gwiŋir ko ŋinena aruŋwnu, Nyi gwimabuje Daawuduŋw gwina gwiro ŋari ŋa Yassa kwiji gwina gwargwai dhugor dhiny, gwina gwaji gwapai dhuŋuna peth dhina dhibupiny. 23Gi ŋwulaŋ ŋwa kwiji ibigwa gwiro ŋinena arna Kalo gadirijo Israayiiluŋw Mukhallis̱, gwina gwan Yasuuⓐ. 24Kwereny nanaŋ ŋeda gwati gwidhi no Yuuẖanna gwabiŋaijo lijo peth la Israayiil dhuŋuna dha maⓐmuudiiya gwa dhurle dugore galo gi ŋidi ŋina ŋike. 25A dina ma Yuuẖanna are gwameaje ŋiro ŋuŋun, ŋwarnu, Nyaŋa larnu nyi gwan ei? Nyi gwati gwiro ŋeda no. Abi, aŋadhul, gweta gwaji gwila gidon diginy, a nyi gwati gwaudhi dinyi wala caudhe ja ŋwora ŋwuŋun no.
26Liji lai lina liro limega lina liro keleŋa ga gabiila ga Ibraahiim, a lina lijina ganu lina lathidhenya Kaloŋa, dhuŋun dha dhigilaŋ ibidha dhukejinu dhan nyaŋa. 27Ŋinena ŋediŋa lina lathije gi Urushaliim a leleny legen lati liliŋidhi ŋeduŋw no, i athil liŋidhi dhuŋuna dhina dhabiŋu nebiŋa dhina dhathilabiŋaijo ŋwamun peth ŋwa Sabith dhimal meaje ŋinena malakimiye. 28Athilbi bujo dhuŋuna dhetipo dha dhirinya no, albothaije Biilaaṯusuŋw galo alari gwarinyini. 29A dina mal meaje dhuŋuna peth dhina dhuludhinu dugun, aluleje galo gi lure alaŋ lina limaliganu, aldhire kimu. 30Abi Kalo direye gi liji ganu lina laio; 31a ŋwaŋini ŋwamun ŋwoinyadho di ŋediŋa lina lidhilai gi Jaliil alela Urushaliim, lina limaro shuhuud gwuŋun dabiŋaijo lijo. 32A anaŋa lajabiŋaijo dhuŋun dhai dhina dhiŋir dhina dhabiŋaijil dhai baboŋaije lega, 33Kalo gimameaje dhuŋuna ibidha dega alaŋ lina liro keleŋa gegen dina muŋw direye Yasuuⓐuŋw; gwiro ŋinena ulinuŋwna ko gi mazmuur gwina gwiro nimra ram, Ŋa gwiro Ŋari ŋiny, nyi gwimaŋa liŋa ŋinenaŋina. 34Ŋinena direyuŋw gi liji ganu lina laio, athuŋw auradhi didigire manaŋ no, a minoŋ ŋwarnu, Nyi gwajidhedha inaŋw gwa Daawud gwina gwiro titiganu. 35A minoŋ gwaro ko gi mazmuur gwiter nu, Ŋa gwati gwabrico gweta gwuŋa gwina gwiŋir didirel duŋwaŋa digiruŋw no. 36Titiganu dina ma Daawud upijo lijo la jidhila juŋun ŋiro dhuŋun dhai dhina dhibupo Kalo, ŋwai, aldhire baboŋa lai luŋun, a ŋwaŋa digiruŋw. 37Abi ŋeda, gwima Kalo direye, gwati gwimaŋa digiruŋw no. 38A minoŋ abricul dhuŋuna ibidha ŋwuliŋini dagalo, liji lai lina liro limega, darnu kwiji gwai ibigwa liji lathajabiŋaijo dhuŋuna dhadhi dhudhani ganu gi ŋidi ŋina ŋike. 39A ŋeda gwai liji peth lina luminyu liŋirini gi ŋidi peth ŋina ŋati ŋuthi ŋoma danyan iŋirini gi dhuŋun dha naamuus gwa Muusa no. 40A minoŋ ethadhinul galo, dathi dhuŋun dhina dhabiŋudhai nebiŋa idhi dagalo no: 41Aŋadhul, nyaŋa lina lathake juma, alidhul galo dir, a nyerna; ŋinena apiny ŋiro gi ŋwamun ŋwalo, ŋiro ŋina ŋati ŋuminyanyilo, di ada gweta gwimajabiŋaijo dhuŋun dhai ibidha no. 42A dina mal tuiya gi majmaⓐ, al liji othaije galo dilabiŋaijo dhuŋuna ibidha gi lamun la Sabith lina laji lila. 43Dina ma liji la kaniisa bai galo, a liji loinyadho lina liro Yahuud a liji lina liŋir lina luminyu dhuŋuna dha Yahuud gwuje Buulusŋaije Barnaaba gwai lina labiŋaijilo, allibupe dilmuthini galo gi niⓐma gwa Kalo.
Liji lina lukejinu lurludhi gi Liumam
44A gi lamun la Sabith liter a liji loinyadho udubidi gi peth la mediina auradha liduŋw didiŋini dhuŋuna dha Kalo. 45A dina ma Yahuud aŋa lijo loinyadho, aloinyadhe ŋiduinyu gi dugor ganu degen, aluthi dhuŋuna dhina dhike gi dhuŋun dhina dhabiŋu Buulus, aluthi dhuŋuna dhoinyadho gi dhuŋun dhuŋun, alilo. 46Abi Buulusŋa Barnaaba gwai re ganu, alarnu, Gwiŋir di dhuŋun dha Kalo abiŋini dagalo kwerkwereny; abi dhimanya gatho por, a nyaŋa limakimiye lidom lai lalo darnu nyaŋa lati laudhi danyapai midhuŋw gwina gwathije gwortal no, a ŋinena aŋadhul, anaŋa lawurila gi Liumam. 47Titiganu dhuŋun dhiro ibidha dhina dhabiŋaijaje dhai Kweleny ŋwarnu, Nyi gwimaŋa geta daŋaro fure gwa Liumam, daŋa abiŋaijo lijo gilaŋ gwai kidhila peth. 48A dina ma Liumam diŋini dhuŋuna ibidha, aliŋir dugore, almajidhe dhuŋuna dha Kweleny; aluminyi peth lina ligitinu dilapai midhuŋw gwina gwathije gwortal. 49A dhuŋun dha Kweleny bai galo gi ŋwen peth. 50Abi Yahuud dhiŋa laio lina lathidhenya Kaloŋa a lina liŋir gi je ganu ja liji, a leleny la mediina dildhagirini di Buulusŋa Barnaaba gwai, alliteye gi len legen. 51Albi ŋediŋa buruthijo fura gwa ŋwora ŋwegen, alila gi Iguuniiya. 52Abi calmiz oinyadhini iŋiruŋw ganu, a Dhigirim dhina Dhiŋir.
Currently Selected:
Aⲁmaal Ar Rusul 13: HBN
Highlight
Copy
Compare
Share
Want to have your highlights saved across all your devices? Sign up or sign in
First published by the British and Foreign Bible Society in 1966.
