Aⲁmaal Ar Rusul 10
10
Buṯrusŋa Karniiliyuus gwai
1A kwiji gweta je gi Ges̱ariiya gwan Karniiliyuus, gwina gwiro zabith gwa orṯa ina yan orṯa ya Iṯaaliiya, 2gwiro kwiji gwiŋir, athil dhenya Kaloŋa liji lai la dunu gwuŋun peth, athuŋw dhedha lijo ŋida ŋoinyadho tur, athuŋw abiŋaijo Kaloŋa ŋwamun peth. 3A ŋwaŋa galo momaŋ dhuŋuna dhina dhiro ŋinena dhiŋidi gi saaⓐa jaro ŋinena thiril kera galo malaak gwa Kalo duni dugun ŋwaicinu, Karniiliyuus gwai. 4A dina tejuŋw je a ŋidheny uni dugun; ŋwarnu, Kweleny gwai, aŋ gwiro? Ŋwubaicinu, Abiŋaije Kaloŋa gwuŋa a dhuŋun dhina dhuthaŋa dhadhi dhedha lijo ŋida tur dhimalidha gi je ganu ja Kalo a dhaŋidhanuŋw. 5A ŋinena ukejo lijo gi Yaafa durnia gweta gwina gwan Simⓐaan gwina gwuthi jiriny jiter jan Buṯrus; 6gwo gwijil galo Simⓐaan gwai gwina gwathapai ŋiro ŋadhideye jurna, gwina gwuthi duna kimumu nono ga baẖr, a ŋeda gwaji gwaŋaŋajo aŋ gwina gwiŋir daŋa apai. 7A dina ma malaak ela gwina gwabiŋaijo Karniiliyuusuŋw, a Karniiliyuus urnie jadham juŋun ram ja dunu, a ejigur yeta ina iŋir ya ejigur ina yathupijo ŋiro gigina; 8ŋwulabiŋaijo dhuŋuna ibidha peth, ŋwulukeje gi Yaafa.
9A bigunu, dina idhilo gi dhai dina maljaijo mediina githo, a Buṯrus alo gi dhoda alaŋ dha dunu duŋwabiŋaijo Kaloŋa, saaⓐa jiro ŋinena die‐a‐ram kaŋin ganu. 10A jamu eny ganu gwuleny ŋwari gweny; abi dina malgitijo ŋida momaŋ ŋa dheny, ŋwuthi gimirala gi je ganu juŋun, 11ŋwaŋa Sama diŋeadhini ganu, a kwoŋ gweta ula dugun, gwiro ŋinena malaaya gwina gwipa, gwigukinu gi ŋwubil kworoŋo, ŋwuludha kwiyaŋ. 12An dhola je ganu peth dha gidhila, a owaŋ, a ŋidi ŋina ŋathelila galo nyari nyai kwiyaŋ, a nyira nya Sama. 13A ŋwal ula dugun alaicinu, Buṯrus gwai, diro; dhugo, a ŋeny. 14Abi Buṯrus arnu, Oo, Kweleny gwai, nyi gwati gweny kwoiny gwetipo gwina gwati gwiŋir deny i gwina gwiro ŋirle gatur no. 15A ŋwal ula dugun manaŋ ŋwamun ganu ram ŋwarnu, Ŋidi ŋina ŋijuriyilo Kalo, athaŋa arnu ŋiro ŋirle no. 16An dhuŋun ibidha je ŋwamun ganu thiril dhiro minoŋ, a kwoŋ ibigwa alo gi Sama manaŋ.
17A dina alidhi Buṯrus galo dir gi gwidom gwuŋun ŋwarnu dhuŋun dhiro dhaŋ dha dhuŋun ibidha dhina dhiro ŋinena dhiŋidi dhina dhaŋudhiny, a liji lina lukejilo Karniiliyuus othaije lijo galo dunu gwai gwa Simⓐaan, aldhuna kour, 18alurnie, alothaije galo alarnu, Simⓐaan gwina gwan Buṯrus gwathije mina a? 19A dina jo Buṯrus direye je galo gi dhuŋun dha dhuŋun dhina dhiro ŋinena dhiŋidi dhina dhaŋinu dugun, a Dhigirim aicinu, Aŋadhi, liji thiril lo libupaŋa. 20Abi diro ŋule, nyalela, athaŋa dhenyo gi ŋidi ŋeda no; lukejinyilo. 21A Buṯrus ule gi liji lina lukejilo Karniiliyuus dugun; ŋwulaici, Nyi gwiro gwina gwibupanya; dhuŋun dhiro dhaŋ dhina dhiludhanyana? 22Alaicinu, Karniiliyuus gwina gwiro zabith, gwina gwiro kwiji gwiŋir gwina gwathidhenya Kaloŋa, gwina gwuthi shahaada gwina gwiŋir gi liji peth lina liro Yahuud, gwabiŋaijo Kalo malaak gwai gwina gwiŋir didirel daŋa odhadha dunu dugun, duŋwdiŋini dhuŋuna duguŋa. 23Ŋwulodhadha kiru, ŋwulgeta ŋirin. A bigunu allela Buṯrus ŋalai, a liji coŋ gi limegen lina lathije gi Yaafa aligwudhie. 24A bigunu gweda aluni gi Ges̱ariiya, albi Karniiliyuus dhunijo, ŋwurnie lijo luŋun a limedhigen a liji lina lathil lai jaijiye galo liduŋw. 25A dina ma Buṯrus uni, albudhe Karniiliyuus gwai, a Karniiliyuus ide ŋwora ganu dugun, ŋworthadha. 26Abi Buṯrus direjalaŋ, ŋwaici, Diro; nyi ko gwiro kwiji. 27A dina muŋw uni alje dilgwai abiŋi, ŋwubuje lijo loinyadho lauradho liduŋw; 28ŋwulabiŋaijo, ŋwulaici, Nyaŋa liliŋidhi darnu dhuŋun dhati dhaudhi gi dhuŋun dha naamuus di kwiji gwina gwiro Yahuudi dilaicaijiye liduŋw kwiji gwai gwa gabiila giter i duŋwela dugun no; abi nyi Kalo gaŋajiny darnu nyi gwati gwarnu kwiji gweda gwiro kwiji dogo i gwiro ŋirle no. 29Gi dhuŋun ibidha nyi gwimila, athinyi doinyo no dina urniinyilo. A nyi gwa gwothaijaje galo nyaŋa lurnaijiny aŋa? 30Abi Karniiliyuus aicinu, Ŋwamun ŋwiro kworoŋo dina jiny galo jamu di gi saaⓐa ibija; a gi saaⓐa jina jiro thiril nyi gwijo dabiŋaijo Kaloŋa gi dunu gwiny, a kwiji dhuna gi je ganu jiny gwina gwigeno ciraŋa jina jaro gumgum. 31Ŋwarnu, Karniiliyuus, abiŋaije Kaloŋa gwuŋa gwimadiŋinini, a dhuŋun dhina dhuthaŋa dhadhi dhedha lijo ŋida tur dhimaŋidhanini gi je ganu ja Kalo. 32Ukejo lijo gi Yaafa durnia Simⓐaanuŋw, gwina gwuthi jiriny jiter jan Buṯrus; gwina gwo gi dunu gwa Simⓐaan gwina gwathije kimuma nono ga baẖr; a maji ma ŋeda ila, gwaŋa abiŋaijo. 33Nyin ukedheja lijo ganu babraŋ duguŋa; a ŋa gwimapai dhuŋuna dhina dhiŋir ŋinena maŋa ila. A ŋinena anaŋa peth lo mina gi je ganu ja Kalo, dana diŋini dhuŋuna peth dhina dhabiŋaijaŋadhai Kalo.
Dhuŋun dhina dhabiŋu Buṯrus
34A Buṯrus igiye ŋwinyu ŋwuŋun ŋwarnu, Titiganu nyi gwiliŋidhi darnu Kalo gati gathuminyuni kwijo gweta gi kwiji gwiter no, 35Abi gi liji peth gweta gwina gwathidhenya ŋeduŋw, athuŋw apai dhuŋuna dhina dhiŋir, gwuminyinu dugun. 36Dhuŋun dhina dhukejo Kalo gi keleŋa ga Israayiil, dhina dhabiŋuŋw audhaijiye gwai galo Yasuuⓐ al Masiiẖ gwai (ŋeda gwiro Kweleny gwa ŋidi peth), 37nyaŋa liliŋidhi dhuŋuna ibidha dhina dhabiŋinu gi Yahuudiiya peth dhina dhijo kwerkwereny gi Jaliil gidon gi dhuŋun dha maⓐmuudiiya dhina dhabiŋudhai Yuuẖanna; 38darnu akwai Kalo gibulujo Yasuuⓐuŋw gwa Naas̱ira Dhigirima nono dhina Dhiŋir a ŋoma, gwina gwathelila galo ŋwapai ŋiro ŋina ŋiŋir, a ŋwiŋiriye lijo nono peth lina luthina Ibliis ŋelenya alaŋ, ŋinena jilo Kalo gai. 39A anaŋa liro shuhuud gi dhuŋun peth dhina dhapuŋw gi ŋwen ŋwa Yahuudiiya a gi Urushaliim; gwina gwirinyiilo ko alalije gi lure alaŋ lina limaliganu; 40ŋeda gwima Kalo direye gi lamun lina liro nimra thiril, ŋwabrico duŋw aŋini momaŋ. 41Abi gwati gwaŋinu gi liji peth no, ŋwubaŋinijo lijo lina liro shuhuud lina luthinilo Kalo ganu kwereny daguri, anaŋa lina gwithanalai a analiye dina maji muŋw dire dai gi liji ganu lina laio. 42A jabiŋaijo danabiŋaijo lijo, anaro shuhuud darnu ŋeda gwiro gwina gwigitinu di Kalo duŋwuro gadhi dakimiye lijo lina limidho a lina laio. 43A nebiŋa peth liro shuhuud gwuŋun, darnu liji peth gweta gweta gwina gwuminyu ŋeduŋw gwapai dhudhanuŋw ganu gwa ŋidi ŋina ŋike jiriny jai juŋun.
Liumam lapo Dhigirima dhina Dhiŋir alⓐamidhini
44A dina jo Buṯrus dabiŋi dhuŋuna ibidha, a Dhigirim dhina Dhiŋir ula gi liji alaŋ peth lina lidiŋinu dhuŋuna. 45A ŋediŋa alo galo dir lina luminyu lina liro la liji lina lurtedhinu a peth lina lidhi Buṯrus ŋalai, ŋinena ma dhedha tur gwa Dhigirim dhina Dhiŋir buludhe gi Liumam alaŋ ko. 46Ŋinena diŋinilo dilabiŋi diŋila dai, alorthadha Kaloŋa. A gi dhuŋun ibidha al Buṯrus aicinu, 47kwiji gweda gwuthi ŋoma gwadoinya ŋau ŋai dathi liji ibila apo maⓐmuudiiya, lina limapai Dhigirima dhina Dhiŋir gwiro ŋinena apanana ko a? 48Ŋwuldhedha amr dilⓐamidhini gi jiriny ja Kweleny. Alothaije galo dilli jalo ŋwamun coŋ.
Currently Selected:
Aⲁmaal Ar Rusul 10: HBN
Highlight
Copy
Compare
Share
Want to have your highlights saved across all your devices? Sign up or sign in
First published by the British and Foreign Bible Society in 1966.
