1 Tiimuuthaawus 4
4
Dhuŋun dhadhi doinya dhuŋuna dha muⓐallimiin lina liro lidhuŋun
1Abi Dhigirim dhabiŋu momaŋ, darnu gi ŋwamun ŋwina ŋwaji ŋwila gidon coŋ degen laji lagathani imaan, algwuje nyurinya nyina nyathodha lijo gi dhai dhina dhike a taⓐliim dha shawaaṯiin; 2athilabiŋi ŋidhuŋinaŋa gi dhuŋun dhina dharuldhai dhiŋir, abi dhati dhiŋir no; a dugor degen ro ŋinena didunini ẖadiid gwai gwina gwibuyo. 3Athilekajo lijo dago, athil abiŋaijo lijo dildoinya ŋida ŋa dheny ŋina ŋigetilo Kalo dileny daici Kaloŋa shukran gi liji lina luminyu a lina liliŋidhi dhuŋuna dhina dhiro titiganu. 4Abi ŋidi peth ŋina ŋigetilo Kalo ŋiŋir, a ŋidi ŋeda ŋati ŋadunyini no, ada ŋimupini shukr gwai. 5Ŋinena ŋijurinu dhuŋun dhai dha Kalo a abiŋaije gwai Kaloŋa. 6Ada ŋa gwima aŋidhaniye limega gi ŋidi ibiŋa, ŋa gwaji gwaro gadham gina giŋir ga Yasuuⓐ al Masiiẖ, a ŋa gwabiŋu dhuŋun dhai dha imaan a taⓐliim dhina dhiŋir, dhina dhimaŋa gwuje. 7Ŋabi doinya dhuŋuna dhina dhiro dhirini dhina dhiro ŋirle dhina dhabiŋu la lina lurun; idhejo ŋadigirenya ŋuŋa gi dhuŋun dha Kalo. 8Abi idheje gwa aŋinu gwuthi je ganu gi ŋidi coŋ dogo, abi dhuŋun dhadhuminyi Kaloŋa dhuthi je ganu gi ŋidi peth, ŋinena gwuthi dhuŋuna dhina dhabiŋaijuŋwdhai dha midhe gwina gwo ŋinena, a gwina gwaji gwila. 9Dhuŋun ibidha dhiro titiganu a dhaudhi dhadhuminyi peth. 10A minoŋ gi dhuŋun ibidha alapai ŋiro gwuleny, alakimini, ŋinena aldhunijo Kaloŋa momaŋ gina gimidho, gina giro Mukhallis̱ gwa liji peth, a gwuleny lina luminyu.
Midhe gwa Tiimuuthaawus a taⓐliim dhuŋun
11Abiŋaijo lijo dhuŋuna ibidha, ŋalalimiye. 12Athaŋa abrico kwijo gweda gwaŋirini jidhila jai juŋa jina jiro coŋ no, ŋabiro s̱uura degen lina luminyu, gi dhuŋun, a gi dhai dhuŋa dha midhe, a gi uminyi, a gi Dhigirim, a gi imaan, a gi dhuŋun dhina dhijuro. 13Di minyila, athaŋa uminyi dabiŋaijo Kitham, ŋabiŋaijo lijo dhuŋuna dha Kalo, ŋalalimiye taⓐliim. 14Athaŋa rui gwijagaral gi dhedha tur gwina gwo duguŋa, gwina gwidhedhaŋalo gi dhuŋun dha nebiŋa, a geta doi alaŋ da liji la kaniisa lina liro shiyuuk. 15Ireyo je galo gi dhuŋun ibidha; ŋanje ganu di dhoga gwuŋa aŋini gi liji peth. 16Ethadho galo gi gwidom gwuŋa a gi taⓐliim; ŋanje ganu; ada ŋa gwimapai dhuŋuna ibidha ŋa gwagilaŋiye gwidom gwuŋa, a ŋediŋa lina lathaŋa deŋinaijo ko.
Currently Selected:
1 Tiimuuthaawus 4: HBN
Highlight
Copy
Compare
Share
Want to have your highlights saved across all your devices? Sign up or sign in
First published by the British and Foreign Bible Society in 1966.
