1 Tiimuuthaawus 1
1
Salaam a dhuŋun dhina dhuthi olaŋw gi taⓐliim dhina dhati dhiro titiganu no
1Buulus, gwina gwukejinu gwa Yasuuⓐ al Masiiẖ gi dhuŋun dha amr gwa Kalo gina giro Mukhallis̱ gwega, a Kweleny gwina gwan Yasuuⓐ al Masiiẖ, gwina gwidhunijana; 2di Tiimuuthaawus, ŋari ŋiny ŋina ŋiro titiganu gi imaan. Niⓐma, a ina, a audhaijiye galo di Kalo gina giro Babo gwega a Yasuuⓐ al Masiiẖ gwina gwiro Kweleny gwega.
3Gwiro ŋinena bupaŋana danaje gi Afasus, dina iladhiny di Makiduuniya, daŋadhedha lijo coŋ amr dathil alimiyo taⓐliim dhiter no, 4i athil gedhaijo dhuŋuna nyuni dhina dhati dhuthi je ganu no a dhuŋun dhina dhuthi ligwurna la ro kwereny dhina dholaŋ ganu, dhina dhathapai othaijuŋw galo, a dhina dhati dhodhadha lijo gi liŋa gwa dhai dhina dhigegito Kalo gi imaan no. 5Abi mira gwa dhuŋun dha amr ibigwa gwiro gwa uminyi gi dhugor ganu dhina dhijuro, a dhuŋun dhina dhiŋir gi dhugor ganu, a imaan gwina gwati gwuthi ukinejinuŋw ganu no. 6Abi liji coŋ malmiriŋaye dhuŋuna ibidha, alela gi dhuŋun dhina dhiro tur. 7Athilbupe dilro liji lina lathalimiye naamuus; a ŋediŋa lati liliŋidhi dhuŋuna dhina dhathil abiŋi, a dhina dhathil geta no. 8Abi alŋa liliŋidhi darnu naamuus gwiŋir, ada kwiji gwimapai dhuŋuna dhuŋun momaŋ; 9alŋa liliŋidhi darnu naamuus gwati gwigitinu gwan kwiji gwina gwiŋir no, ŋwubigitini gwan liji lina lidoinyo dhuŋuna dhuŋun a lina lati lathuthejo dhuŋuna dhuŋun nyuni no, a lina lati luminyu dhuŋuna dha Kalo no a lina like, a lina lati liŋir didirel no a lina lathapai ŋida ŋina ŋike, a lina lirinyidhi baboŋaije nana ŋalai, a lina lathirinya lijo liter, 10a lina lathidhre la lai, a lina lathidhreye loma, a lina lathapai lijo ŋwuramai, a lina liro lidhuŋun, a lina lathiro shuhuud tur, a ada dhuŋun dhimaje dhiter dhina dhimamliganu gi taⓐliim dhina dhiro titiganu; 11gi dhuŋun dha Dhuŋun dhina Dhiŋir dha majdh gwa Kalo, gina giro mubaarak, gina gidhedhiny diny mutha momaŋ.
Buulus gwaico Kaloŋa shukran gwan ina gwuŋun
12A nyi gwaici al Masiiẖuŋw Yasuuⓐ gwina gwiro Kweleny gwega shukran, gwina gwibireyiny nono, a nyi dhura darnu nyi gwiŋir, a nyi ruje gwan ŋiro ŋuŋun; 13kwereny nyi gwiro gwina gwathilo Kaloŋa, anirini liji lai, anapai dhuŋuna dhina dhike gi liji liter; abi ŋinena nyi gwimabuje inaŋw, dina apiny dhuŋuna ibidha ŋirila ŋai athiny uminyu no. 14A niⓐma gwa Kweleny gwega oinyadhani gwuleny imaan gwai a uminyi gwai gwina gwo di al Masiiẖ Yasuuⓐ. 15Dhuŋun ibidha dhiro titiganu a dhaudhi dhadhuminyi peth, darnu al Masiiẖ Yasuuⓐ gwidi kidhila digilaŋiye lijo lina like; a nyi gwiro gwikanu degen peth. 16A minoŋ gi dhuŋun ibidha nyi gwimabuje inaŋw, di Yasuuⓐ al Masiiẖ aŋini diginy kwerkwereny mutha gwai dhugore gwortal peth, gwiro ŋinena s̱uura degen diluminyi ŋeduŋw di midhe gwina gwathije gwortal. 17A di Malik gwa jidhila gwina gwathije gwortal, a gwina gwati gwaŋinu je jai no, Kalo getipo gina gibebra a gina guthi neyuŋw a majdh gwortal di. Amiin.
18Ŋari ŋai ŋiny ŋina ŋan Tiimuuthaawus, nyi gwaŋadhedha amr ibigwa, gwiro ŋinena dhuŋun dha nebiŋa lina limadhinadhaŋa kwereny, degen gwai daŋa apai ŋoŋora ŋina ŋiŋir; 19muthi imaan, a dhugor dhina dhiŋir; dhina dhima liji coŋ doinya a limal ke murkab ŋalai gi dhuŋun dha imaan ko. 20A degen liro Hiimiinaayiis a Iskandar; lina liminyil dhedha Sheṯaanuŋw, dilirejini dathil lui Kaloŋa manaŋ no.
Currently Selected:
1 Tiimuuthaawus 1: HBN
Highlight
Copy
Compare
Share
Want to have your highlights saved across all your devices? Sign up or sign in
First published by the British and Foreign Bible Society in 1966.
