I Kuurinthuus 2
2
Bebra a dhuŋun dhina dhaŋinu
1A nyi, limega lai, dina minyila dagalo nyi gwati gwidhi dhuŋun dhai dhina dhinaŋ dha dhabiŋi no, i athinyi idhi dhuŋun dhai dhina dhibebra, daji abiŋaijo dhuŋuna dha shahaada gwiny di Kalo no. 2A nyi gwati gwibupo diliŋa kwoiny gwetipo dagalo ganu no, nyibupe diliŋa Yasuuⓐ al Masiiẖuŋw, ŋeda gwina gwaio gi lure alaŋ lina limaliganu. 3A dina jiny dagalo nyi gwijo gi mule nono, a ŋidheny, a ube galo gwuleny. 4A dhuŋun dhiny a dhuŋun dha dhabiŋaijo lijo dhuŋuna dha Kalo dhiny dhati dhiro dhuŋun dha bebra gwa liji gwina gwadhiluminyi no, ŋwubiro aŋini gwa Dhigirim a gwa ŋoma; 5dathi imaan gwalo je gi bebra gwa liji no, ŋwubije ŋoma ŋai ŋa Kalo.
6A minoŋ anaŋa lathabiŋi bebra gwai gi liji ganu lina lipilipa; athanabi abiŋu bebra gwai gwa gidhila ibiga, i gwa leleny la gidhila ibiga lina laji lerna no. 7Athil babiŋi bebruŋw gwa Kalo gi gilibicini, gwina gwigilibicinu, gwina gwigeto Kalo gwan majdh gwega kwereny nanaŋ jidhila jati jigigitinu no. 8Gwina gwati gwiliŋidhi leleny la gidhila ibiga no; ada gwiliŋidhilo, lati lairinya Kwelenya gwina gwuthi majdh gi lure alaŋ lina limaliganu no. 9Gwiro ŋinena ulinuŋwna, Ŋidi ŋina ŋati ŋimal ke aŋa no, a ŋina ŋati ŋimal kuni diŋini no, a ŋina ŋati ŋimuni gi dhugor ganu dha kwiji no, ŋidi ŋina ŋigetilo Kalo degen lina luminyu ŋeduŋw. 10Jilbi Kalo aŋinijo alŋa Dhigirim dhai dhuŋun; abi Dhigirim dhathibupini ŋidi ganu peth, a ko ŋidi ŋina ŋolaŋ ganu ŋa Kalo. 11Abi ei gwo gi liji ganu gwina gwaliŋa ŋida ŋa kwiji, abi dhigirim dha kwiji dhina dhathinje ganu? A minoŋ ko kwiji gwati gwetipo gwaliŋa ŋida ŋa Kalo no, abi Dhigirim dha Kalo. 12Abi alŋa lati lapo dhigirima dha gidhila no, albapai Dhigirima di Kalo; dilliŋa ŋida ŋina ŋidhedhijilo gwiren. 13Ŋina ŋathil ŋabiŋi ko, athil babiŋu dhuŋun dhai dhina dhaliminu bebra gwai gwa kwiji no, albabiŋi dhuŋun dhai dhina dhaliminu Dhigirim dhai dhina Dhiŋir; alubiye ŋida ŋa Dhigirim ŋidi ŋai ŋa Dhigirim. 14Abi kwiji gwa gidhila gwati gwuminyi ŋida ŋa Dhigirim dha Kalo no; ŋinena uthuŋw ŋirilaŋa a gwati gwuthi ŋoma ŋuŋwul liŋa no; ŋinena mathil idhedjini diliŋini. 15Abi gwina gwuthi Dhigirima gwathidheje diliŋa ŋida peth, a gwati gwa kwiji gwetipo idheje duŋwliŋa no. 16Ei gwimaliŋa ŋadigirenya ŋa Kweleny, duŋwalimiye Kwelenya? Abi alŋa luthi ŋadigirenya ŋa al Masiiẖ.
Currently Selected:
I Kuurinthuus 2: HBN
Highlight
Copy
Compare
Share
Want to have your highlights saved across all your devices? Sign up or sign in
First published by the British and Foreign Bible Society in 1966.
