I Kuurinthuus 1
1
Salaam a shukr
1Buulus, gwina gwurninu duŋwuro gweta gwina gwukejinu gwa Yasuuⓐ al Masiiẖ bupe gwai gwa Kalo, a Suustaaniis gwina gwiro mega. 2Gi kaniisa ga Kalo gina gathije Kuurinthuus, degen lina lijuro di al Masiiẖ Yasuuⓐ, lina lurninu dilro liŋir didirel, liji lai peth lina lathurniye jiriny jai ja Kweleny gwega gwina gwan Yasuuⓐ al Masiiẖ, kalo peth gegen a gega. 3Niⓐma dagalo, a audhaijiye galo, di Kalo gina giro Babo gwega, a Kweleny gwina gwan Yasuuⓐ al Masiiẖ.
4Nyi gwathaici Kaloŋa giny shukran ŋwamun peth dagalo, gwan niⓐma gwa Kalo gwina gwimajidhedha di Yasuuⓐ al Masiiẖ; 5ŋinena dugun nyaŋa limabarikini gi ŋidi peth, gi dhuŋun peth dha dhabiŋi, a gi liŋa peth; 6gwiro ŋinena shahaada gwiny di al Masiiẖ gwimamuthini galo dagalo. 7A minoŋ nyaŋa lati lamratho dhedhaŋw tur gweta no; gwiro ŋinena dhunijanya lamun ladhaŋini gwa Kweleny gwega gwina gwan Yasuuⓐ al Masiiẖ; 8gwina gwaji gwajimuthiniye galo gwortal, lati luthi lom no gi lamun la Kweleny gwega gwina gwan Yasuuⓐ al Masiiẖ. 9Kalo giŋir, gina gimanyagi urnini aicaijiye gwai gwa Ŋari ŋuŋun ŋina ŋan Yasuuⓐ al Masiiẖ gwina gwiro Kweleny gwega.
Guginudhe ganu gi kaniisa
10Abi nyi gwibupo dagalo, limega lai, jiriny jai ja Kweleny gwega gwina gwan Yasuuⓐ al Masiiẖ, danya abiŋi peth dhuŋuna dhetipo, athanya guginejinu ganu no; abi aram nyaŋa lajarimani nyaro letipo gi ŋadigireny ŋalo a ireye je galo gwalo. 11Abi, limaguri lai, nyi gwimadiŋini gi liji la dunu gwa Khuluuwi darnu nyaŋa likaijiyo ganu. 12A nyi gwabiŋadhedhi darnu gweta gweta dagalo gwatharnu, Nyi gwiro gwa Buulus; a nyi gwiro gwa Abulluus; a nyi gwiro gwa S̱afa; a nyi gwiro gwa al Masiiẖ. 13Al Masiiẖ gwimaguginejini ganu a? Buulus gwaio jura galo gi lure alaŋ lina limaliganu a? I nyaŋa limaⓐamidhini gi jiriny ja Buulus a? 14Nyi gwaici Kaloŋa shukran ŋinena athiny ⓐamidhio kwijo gwetipo dagalo no, abi nyi gwimaⓐamidhe Kiriisbusuŋw a Qaayuus dogo; 15dathi kwiji gwetipo arnu nyi gwimaⓐamidhe gi jiriny jiny no. 16A nyi gwimaⓐamidhe lijo la dunu gwa Istifaanuus ko; abi nyi gwati gwaŋidhanu darnu nyi gwimaⓐamidhe kwijo gwiter manaŋ no. 17Gwiro ŋinena athiny al Masiiẖ ukejo dinyi ⓐamidhe no, nyibukeja dabiŋaijo lijo Dhuŋuna dhina Dhiŋir; abi gwati gwukejiny dabiŋaijo lijo dhuŋun dhai dhina dhibebra no, dathi lure la al Masiiẖ lina limaliganu ro tur no.
Ŋoma ŋa lure lina limaliganu
18Abi dhuŋun dha lure lina limaliganu gi liji lina lo gi dhai alaŋ dha dhai dhiro ŋirila; abi daguri anaŋa lina lo gi dhai dha gilaŋ dhiro ŋoma ŋa Kalo. 19Dhulinu darnu, Nyi gwirniye bebruŋw gwa liji lina libebra, a nyi gwaji gwadoinya liŋuŋw gwa liji lina liliŋidhi. 20Kwiji gwina gwibebra gwada? Kathib gada? Kwiji gwada gwina gwathuthe galo dhuŋun dhai dhoinyadho kidhila ibiga? Kalo gati girujo bebruŋw gwa gidhila ibiga ŋirila na? 21Ada gidhila gimaje gi bebra gwa Kalo gati galiŋa Kaloŋa bebra gwai no, Kalo giŋir dhugore duŋwgilaŋiye lijo lina luminyu ŋirila ŋai ŋa dhabiŋaijo lijo dhuŋuna dha Kalo. 22Yahuud gwathibupe ⓐalaama, a Yuunaaniyiin gwathibupe bebruŋw; 23abi anaŋa lathabiŋaijo lijo dhuŋuna dha al Masiiẖ gwina gwaio gi lure alaŋ lina limaliganu, gwina gwiro girimun di Yahuud, a ŋirila di Yuunaaniyiin. 24Abi degen lina lurninu, lina liro Yahuud a Yuunaaniyiin, al Masiiẖ gwiro ŋoma ŋa Kalo, a bebra gwa Kalo. 25Ŋinena ro ŋirila ŋa Kalo ŋibebranu gi liji; a mule nono gwa Kalo gwiburanu nono gi liji.
26Limega lai, ireyul je galo gi urnie gwina gwimanya gwai urnini, darnu liji lati loinyadho lina libebra gi dhuŋun dha aŋinu no, a liji lati loinyadho lina linaŋ no, a liji lati loinyadho lina liliŋinu liŋir no, 27abi Kalo uthini lijo ganu la gidhila lina liro jirila dilapie lijo lina libebra dhara; a Kalo uthini lijo ganu la gidhila lina limulo nono dilapie lijo lina libur nono dhara; 28A Kalo uthini lijo ganu la gidhila lina lati linaŋ no, a lina lirninu, a lina lati lo no, dilirniye lina lo; 29dathi aŋinu peth aro ŋamilai gi je ganu ja Kalo no. 30Abi dugun nyaŋa gi al Masiiẖ Yasuuⓐ, gwina gwimaro bebra di Kalo dega, a dhuŋun dhiŋir, a jure, a bibrini. 31Gwiro ŋinena ulinuŋwna darnu, Ada gweta gwimare ŋamilai, abricul ŋware ŋamilai di Kweleny.
Currently Selected:
I Kuurinthuus 1: HBN
Highlight
Copy
Compare
Share
Want to have your highlights saved across all your devices? Sign up or sign in
First published by the British and Foreign Bible Society in 1966.
