I Kuurinthuus 13
13
Uminyi gwiro dhedha tur gwina gwinunu peth
1Ada nyi gwimabiŋi diŋila dai da liji a da malaayka, athinybuthi uminyuŋw no, nyi gwiro ŋinena naẖaas gwina gwaro, i sanj gwina gwimirinu. 2A ada nyi gwimuthi dhedhaŋw tur gwa ŋoma ŋa dhabiŋi gwiro ŋinena athin nebiŋa abiŋi, nyiliŋa dhuŋuna peth dhina dhigilibicinu, a liŋa peth; a ada nyi gwimuthi imaan peth didogaje amarigena galo, athinybuthi uminyuŋw no, nyi gwati gwuthi je ganu no. 3A ada nyi gwimadhedha ŋida peth diye lijo lina lati luthi ŋida no, a ada nyi gwimadhedha aŋina iny didunini, athinybuthi uminyuŋw no, nyi gwati gwateyani kwoiny gwetipo galo ŋiro ŋai ibiŋa no. 4Uminyi gwathi dhunani momaŋ, a ŋwuro ŋimiri; uminyi gwati gwuthi ŋidunyu no; uminyi gwati gwatholalaŋ no; a gwati gwuthi aluŋw ganu no. 5A gwati gwatherna ŋadigirenya no, a gwati gwathibupe gwidom gwuŋun no, a gwati gwathibuye ŋina no, a gwati gwathireye je galo ŋidi ŋai ŋina ŋike no. 6Gwati gwathiŋir dhugore gi dhuŋun dhina dhike no, abi gwathiŋir dhugore dhuŋun dhai dhina dhiro titiganu. 7Gwathimutha dhugore gi ŋidi peth, gwathuminyi ŋida peth, gwathidhunijo ŋida peth, gwathimutha dhugore gwortal gi ŋidi peth. 8Uminyi gwati gwathide gatur no; abi ada dhuŋun dha dhabiŋi gwiro ŋinena athin nebiŋa abiŋi dhimaje, dhaji dherna; a ada diŋila dimaje, daji dadhuna; a ada liŋa gwimaje, gwaji gwerna. 9Gwiro ŋinena alŋa lathiliŋa dhuŋuna dhitiny, a lathabiŋi dhuŋuna dhitiny dhiro ŋinena dhina dhathin nebiŋa abiŋi, 10abi maji ma ibigwe gwina gwimeadhinu ila, gwina gwati gwimeadhinu no gwaji gwerna. 11Dina riny ŋari ŋitiny, athinyi abiŋi gwiro ŋinena ŋari ŋitiny, a nyi gwathicini ganu gwiro ŋinena ŋari ŋitiny, a nyi gwathireye je galo gwiro ŋinena ŋari ŋitiny; abi ŋinena nyi gwimaro gwurun nyi gwimabrico ŋida ŋa keleŋa gina gitigitiny. 12Abi ŋinena alŋa lathaŋa gi miraaya ganu gi dhuŋun dhina dhati dhiliŋinu no; abi alaji laŋa momaŋ je jai jega; ŋinena nyi gwiliŋidhi liŋuŋw gwitiny; abi nyi gwaji gwaliŋa momaŋ gwiro ŋinena liŋidhinyna. 13Abi ŋinena imaan, a dhuna, a uminyi, almuthini galo, ibidha dhiro thiril; abi dhina dhinunu degen dhiro uminyi.
Currently Selected:
I Kuurinthuus 13: HBN
Highlight
Copy
Compare
Share
Want to have your highlights saved across all your devices? Sign up or sign in
First published by the British and Foreign Bible Society in 1966.
