I Kuurinthuus 12
12
Dhedha tur gwiro ter ter abi Dhigirim dhiro dhetipo
1Abi gi dhuŋun dha dhedha tur gwina gwiro Dhigirim, limega lai, nyi gwati gwibupo danya dhimetha no. 2Nyaŋa liliŋidhi darnu kwerkwereny dilaŋ ranya Liumam nyaŋa lathudhini gi ŋwoboŋ ŋwina ŋwati ŋwathabiŋi no, gwiro ŋinena kwerkwereny athanyan udhini. 3A minoŋ nyi gwajaŋajo darnu gwati gweta gwina gwathabiŋi Dhigirim dhai dha Kalo ŋwubarnu Yasuuⓐ gwiro gwiluinu no; a gwati gweta gwuthi ŋoma darnu Yasuuⓐ gwiro Kweleny no, abi Dhigirim dhai dhina Dhiŋir.
4A ŋinena dhedha tur gwiro ter ter, abi Dhigirim dhiro dhetipo. 5A ŋiro ŋiro ter ter, abi Kweleny gwiro gwetipo. 6A ŋiro ŋadhapini ŋiro ter ter, abi Kalo giro getipo gina gathapai ŋiro peth degen peth. 7Abi gweta gweta gwimadhedhini aŋinuŋw gwa Dhigirim duŋwuthi je ganu degen peth. 8Abi gwimadhedhini gweta Dhigirim dhai dhuŋun dha bebra; a gwiter dhuŋuna dha liŋa, gwiro ŋinena Dhigirim dhetipo. 9A gwiter imaan gi Dhigirim dhetipo; a gwiter dhedhaŋw tur gwa iŋiriye nono gi Dhigirim dhetipo. 10A gwiter ŋiro ŋadhapai ŋiro ŋina ŋipiŋipa; a gwiter dhuŋuna dha dhabiŋi gwiro ŋinena athin nebiŋa abiŋi; a gwiter duŋwliŋa digirima; a gwiter diŋila ganu ter ter; a gwiter aŋiyuŋw gwa diŋila. 11Abi ibiŋa peth ŋathil Dhigirim apai dhetipo, ŋwulguginejo gweta gweta gwiro ŋinena bupuŋwna.
S̱uura gwo gwa aŋinu ina yuthi agsaam gwoinyadho ganu abi iro yetipo
12Minoŋ gwiro ŋinena aŋinu iro yetipo, abi yuthi agsaam gwoinyadho ganu, a agsaam peth gwa aŋinu ibiye yetipo, ada gwima oinyadhi ganu, gwiro aŋinu yetipo; a minoŋ ko al Masiiẖ. 13Abi alŋa peth Dhigirim dhai dhetipo limaⓐamidhini gi aŋinu yetipo; ada alŋa limaro Yahuud i Yuunaaniyiin, i jine i ẖurr; alŋa peth lima icini gi Dhigirim dhetipo. 14A minoŋ ko aŋinu yati iro gism getipo no, ŋwubiro agsaam gwoinyadho ganu. 15Ada lora limarnu, Ŋinena athinyi rui dhoi no, nyi gwati gwiro gwa aŋinu no; a minoŋ lati laro aŋinu na? 16Ada kuni gimarnu, Ŋinena athinyi rui ke no, nyi gwati gwiro gwa aŋinu no; a minoŋ gati garo aŋinu na? 17Ada aŋinu peth imaro ke, diŋini gwada? Ada peth imaro diŋini, ute gwada? 18Abi ŋinena Kalo gimageta agsaam gweta gweta degen kaŋinu, gwiro ŋinena bupuŋwna. 19A ada peth imaro gism getipo, aŋinu yada? 20Abi ŋinena agsaam gwoinyadho ganu, abi aŋinu yetipo. 21A ke gati guthi ŋoma daici dhoi, Nyi gwati gwibupo ŋa no; i lira lati luthi ŋoma daici ŋwora, Nyi gwati gwibupaje no. 22Oo, gwiŋiranu agsaam ibigwa gwa aŋinu gwina gwathaŋini gwimulanu nono gwuthi je ganu. 23A agsaam ibigwa gwa aŋinu gwina gwathilgware gwati gwuthi nuŋw no, aldhedha nuŋw gwina gwibuthanu; a agsaam dega gwina gwathijika ganu gwuthi iŋiruŋw gwoinyadhanu. 24Abi gwina gwiŋir dega gwati gwibupinu no; abi Kalo geta aŋinu liduŋw, ŋwudhedha ina yamratho nuŋw gwoinyadhanu. 25Dathathi guginudhini ganu je kaŋinu no; abi di agsaam iye gweta gweta degen iyuŋw gwetipo. 26Ada gism geta gimumi ŋiya, agsaam peth gwathil gwai umi ŋiya; i ada gism geta gimanujini, agsaam peth gwathil gwai iŋir dugore. 27Abi nyaŋa liro aŋinu ya al Masiiẖ, a gi agsaam gwuŋun letipo letipo. 28A Kalo gimageta lijo coŋ kaniisa, kwerkwereny liji lina lukejinu, a nimra ram nebiŋa, a nimra thiril liji lina lathalimiye, a ŋiro ŋina ŋipiŋipa, a gidon dhedha tur gwa iŋiriye nono, a gathaje uwa, a akimiye, a diŋila ter ter. 29Liji peth liro lina lukejinu a? Liji peth liro nebiŋa a? Liji peth liro lina lathalimiye a? Liji peth liro lina lathapai ŋiro ŋina ŋipiŋipa a? 30Liji peth luthi dhedhaŋw tur gwadhiŋiriye nono a? Liji peth lathabiŋi diŋila dai a? Liji peth lathaŋiye dhuŋuna a? 31Abi bupul gwuleny dhedhaŋw tur gwina gwiŋiranu; a nyi gwajaŋajo dhai dhina dhiŋiranu.
Currently Selected:
I Kuurinthuus 12: HBN
Highlight
Copy
Compare
Share
Want to have your highlights saved across all your devices? Sign up or sign in
First published by the British and Foreign Bible Society in 1966.
