Yaˍkok 5

Changˉ ang ca pang na saˍ tiˍ piˍ naeˍ

1Changˉ ang ca ang pang yawng veuˉ, ya muiˉ naˉ beun. Tuk naeˉ hpan naeˉ uiˉ nawng htaˍ veu hkeu lui naeˉ pa nae, kaˍ haengˍ nae ungˉ haoˉ yao ca bao. 2Nawng beu ang keungˍ kawˉ uiˉ puˍ keungˉ nga aengˉ hko byaˇ. Nawng beu ang kaˍ tum uiˉ na muiˉ uˍ honˍ caˍ hko byaˇ. 3Nawng beu hpuˉ suiˉ uiˉ muiˉ uˍ honˍ caˍ hko byaˇ. Uˍ honˍ hkuinˉ naeˉ hingˉ ngaˍ, nawng naˍ hokˍ ang si vaˍ jiˍ na saˉ hkiˉ hkamˉ yao, miˍ htawˍ lawˍ nawng beu ang saˍ na caˍ naeˍ yaˇ. Tawngˍ tin veu ang nuing uiˉ htiˍ baˍ saˍ laiˍ, nawng ang keungˍ kawˉ kaw chawnˉ hko jaˇ leˍ. 4Naˉ beun, nawng beu naˍ uiˍ beu kaw yeˍ hu uiˉ changˉ uiˉ na tuiˍ kaeˍ kaeˍ yao ang huˍ baˍ piˍ nae pa, ang huˍ hingˍ piˍ laˍ bao nae paˉ laˍ yao cangˉ ngaeˉ yaˇ. Kaw yeˍ hu uiˉ beu haoˉ naeˉ ang seng uiˉ muiˉ, hkaˉ hko laˉ hko htaˍ veu huiˍ naeˍ mangˉ Ang suingˉ Hpaˍcaoˍ kyaˍ laeˍ byaˇ. 5Nawng nuingˉ chaˍ htaˍ veu ca pang yao nuing ba buiˍ nae tiˍ hkeu va saˍ byaˇ. Tuiˍ saeˍ naeˍ uiˉ ang nuing saˍ laiˍ, nawng ngaˍ aˍ sangˍ yang beu ang to na hyuˉ yao haenˍ htaˍ byaˇ. 6Sui naeˉ pawng naeˉ changˉ na nawng ngaˍ aˉ muˍ tatˆ yao tuiˍ saeˍ byaˇ. Yawng ngaˍ nawng na baˍ haenˍ la.

Yeunˉ hkamˍ yao ang buinˉ paˉ naeˉ awˍ lawng

7Ningˉ pa nae yao, yaˍ changˍ mawngˉ namˉ yawng veuˉ, Ang suingˉ Yeˍsuˆ hkeu lui laeˍ beu tiˍ hkeu yeunˉ hkamˍ yao ca voˍ. Naˍvaˍ yaˍ naeˍ uiˉ changˉ na kuitˆ laeˍ hu. Vaˍ yaˍ buˉ yaˍ naeˍ uiˉ nuingˉ chaˍ ang huˍ hka laˉ naeˉ ang suiˍ na yang hawˍ yao ca naeˉ yaˇ. Miˍ hawˍ kaˉ huˍ veu lui naeˉ hingˉ cangˉ nae, kaˉ nawngˍ lin lin veu lui naeˉ hingˉ cangˉ tiˍ hkeu yawng yeunˉ hkamˍ yao hawˍ naeˍ yaˇ. 8Nawng muiˉ yeunˉ hkamˍ yao hawˍ vo. Ang suingˉ Yeˍsuˆ lui laeˍ naeˍ ang nyamˍ saˉ hkeuˉ lui naeˉ pa nae, nawng nuing ba yiˍ naenˉ bu. 9Yaˍ changˍ mawngˉ namˉ yawng veuˉ, nawng aˉ muˍ tatˆ naeˉ na baˍ ya hkamˉ naeˉ uiˉ saˍ laiˍ, tiˍ hu nae tiˍ hu naˍ hokˍ aˍ chiˍ lang jo. Hu bao, aˉ muˍ tatˆ naeˉ maˇ, langˉ kaw htang veu hkeuˉ lui byaˇ. 10Yaˍ changˍ mawngˉ namˉ yawng veuˉ, Ang suingˉ Hpaˍcaoˍ beu ang maengˉ na puing yao maˍ laˍ naeˍ pa rawˉ hpaet htiˍ baˍ uiˍ a, tuk naeˉ hpan naeˉ na ya myangˉ beu, yawng yeunˉ hkamˍ hkiˍ naeˍ uiˉ nuing ba ca naeˉ na nawng henˍ yaˍ vo. 11Yeunˉ hkamˍ hkiˍ naeˍ uiˉ changˉ ngaˍ ang buinˉ ang huiˍ yaˇ nae gu ciˍ naeˍ yaˇ. Yawˉbaˆ yeunˉ hkamˍ jiˍ na nawng ya kyaˍ byaˇ. Ang suingˉ Hpaˍcaoˍ nawˍ yang a lo capˆ naeˉ laˉ mae, Hpaˍcaoˍ aˉ mawk hak yao saˍ kyaˍ kyaˍ naeˍ na nawng ya myangˉ nga byaˇ. 12Ga beu yaˍ changˍ mawngˉ namˉ yawng veuˉ, iˉ yaˍ nae muiˉ aˍ hkamˍ jo. Ciˍ tangˍ ningˍ nga huiˍ sutˆ nae uiˉ ang tangˍ yaˇ. Buingˍ htaˍ na baˍ upˍ, nuingˉ chaˍ htaˍ na baˍ upˍ, aw htaˍ veu ang ceuˉ na baˍ upˍ, ningˉ uiˉ na cuˉ yao baˍ hkamˍ jo. Nawng aˉ muˍ tatˆ naeˉ na baˍ ya hkamˉ naeˉ uiˉ saˍ laiˍ, nang beu ang tangˍ hingˍ nga, uiˉ yaˇ nae baoˉ vaˍ uiˉ yaˇ, baˍ aˍ nae baoˉ vaˍ baˍ aˍ nae hingˉ ciˍ bao. 13Nawng hkaoˉ veu changˉ htiˍ hu hu tuk hpan yao ca ngaeˉ laˍ. Yang na ang buinˉ paˉ biˍ vo. Changˉ htiˍ hu hu mawnˍ pyawˉ ngaeˉ laˍ. Yang na cheuˉ yao chiˍ mawng voˍ. 14Nawng hkaoˉ veu changˉ htiˍ hu hu baˍ ca baˍ duingˍ bui laˍ. Yaˇ Hkritˆ yanˍ ang muˉ awnˍ hoˉ yaˍ mangˍ uiˍ na haoˉ voˍ. Yawng ngaˍ, Ang suingˉ Yeˍsuˆ beu ang maengˉ na cuˉ yao, changˉ daˉ mangˉ na na manˍ laeˍ peunˍ biˍ yao, yang saˍ laiˍ ang buinˉ paˉ biˍ vo. 15Yumˉ naeˉ hkaoˉ veu ang buinˉ paˉ naeˉ ningˉ ngaˍ changˉ daˉ mangˉ na pyo laˉ biˍ yao, Ang suingˉ Yeˍsuˆ yang na piˉ hta laˉ naeˉ yaˇ. Yang naˍ hokˍ ca baoˉ vaˍ, yang beu naˍ hokˍ hingˍ poiˉ biˍ naeˍ yaˇ. 16Hingˉ pa nae, nawng pyo laˉ naeˉ uiˉ saˍ laiˍ, htiˍ hu nae htiˍ hu naˍ hokˍ ang si na maˍ lang yao, htiˍ hu saˍ laiˍ htiˍ hu ang buinˉ paˉ voˍ. Changˉ ang sui pawng ang buinˉ paˉ naeˉ ningˉ ngaˍ tanˉ hkoˉ ang ca maˉ manˉ yaˇ. 17Eˉliˉyaˆ#5:17 1 Ang suingˉ 17-18 nawˍ gu lawˉ changˉ hpeuˍ yao muiˉ, miˍ hawˍ baˍ lui nae uiˉ saˍ laiˍ yang ang buinˉ paˉ maˉ manˉ yao, sumˍ nuing pi nae hkoˍ ha veu tiˍ hkeu nuingˉ chaˍ htaˍ veu miˍ hawˍ baˍ lui. 18Htiˍ cangˍ yang ang buinˉ paˉ laeˍ beu, miˍ hawˍ luingˉ laeˍ yao, nuingˉ chaˍ yangˍ muiˉ ang pangˉ pangˉ yao ang suiˍ suiˍ luiˍ laeˍ jiˍ. 19Ga beu yaˍ changˍ mawngˉ namˉ yawng veuˉ, nawng hkaoˉ veu changˉ htiˍ hu hu kaˉ ba yaˍ keung naeˉ maˉ manˉ veu yaw si laeˍ yao, changˉ htiˍ hu hu yang na suiˍ langˉ laeˍ baoˉ vaˍ, 20naˍ hokˍ ang yaˍ kaˉ ba yawˍ si laeˍ jiˍ na suiˍ langˉ laeˍ jiˍ maˇ, moˍ naˉ hokˍ veu ang hkawˍ laˉ htiˍ lumˍ htaiˍ awkˍ biˍ yao, naˍ hokˍ ang byaˍ hingˍ na Hpaˍcaoˍ naˍ hokˍ poiˉ nga biˍ byaˇ nae yang na bae biˍ vo.

Currently Selected:

Yaˍkok 5: pyy

Highlight

Copy