Yaˍkok 4

Nuingˉ chaˍ ang liˍ ang kawngˍ na ang changˍ baˍ taeng nae awˍ lawng

1Nawng hkaoˉ veu ang tangˍ hteng lang nae si lang hae lang naeˉ ningˉ ba ceuˉ ha yao taw laˉ jeuˇ. Nawng ang saˍ mangˉ kaˉ seu nuing ba buiˍ naeˍ uiˉ ha siˉ naeˉ hingˉ ngaˍ, nawng ang to hkaoˉ veu peu lang yao taw laˉ jiˉ baˍ aˍ la. 2Nawng ya siˉ naeˉ laˉ mae baˍ ya nae yao, hao na saeˍ naeˍ yaˇ. Nawng hao keungˍ hao kawˉ na seu lai yao baˍ ya nae paˉ nae, hao na ang tangˍ hteng lang naeˉ yaˇ. Nawng baˍ paˍ nae yao nawng baˍ ya. 3Aˉ mae yao nae baoˉ vaˍ, nawng ngaˍ ang saˍ mangˉ kaˉ seu nuing ba buiˍ naeˍ uiˉ na nawng ha siˉ naeˉ pa nae, Nawng paˉ yao muiˉ baˍ ya. 4Suˉ yaˍ linˉ yaˍ naeˍ laˉ mae changˉ htiˍ baˍ yawng veuˉ, nuingˉ chaˍ ang liˍ ang kawngˍ na ang changˍ taeng naeˉ uiˉ changˉ yawng ngaˍ, Hpaˍcaoˍ beu lanˍ suˍ hpeuˍ naeˍ na nawng baˍ bae laˍ. Nuingˉ chaˍ ang liˍ na ang changˍ taeng siˉ naeˉ aˉ mangˉ na baˍ upˍ, Hpaˍcaoˍ beu lanˍ suˍ hpeuˍ naeˍ yaˇ. 5Camˉ lik hkaoˉ veu taemˉ jiˉ, Gu hkaoˉ veu yang kan laˍ jiˍ ang hkawˍ laˉ ningˉ na yaˇ seu lai yaeˉ sutˆ yaˇ nae ciˍ jiˍ tangˍ ningˉ ngaˍ, ang aeˍ nae taemˉ yao chiˉ jiˉ nae nawng kuitˆ yao cangˉ ngaeˉ laˍ. 6Caˇ, gu na yaˇ ang buinˉ ya caeˉ piˍ naeˍ yaˇ. Camˉ lik hkaoˉ veu taemˉ saˍ jiˍ lawˉ, Hpaˍcaoˍ nawˍ nuing ba huiˍ naeˍ uiˉ changˉ na haenˉ tap yao, nuing ba dawˍ naeˍ uiˉ changˉ na ang buinˉ piˍ naeˍ yaˇ nae taemˉ saˍ jiˍ. 7Ningˉ pa nae, Hpaˍcaoˍ upˆ peungˍ naeˍ tawngˍ kaˍ veu maenˍ nae ca voˍ. Saˍtanˍ na haenˉ tap yao kaˍ taw voˍ. Haeˉ mae ha baoˉ vaˍ, nawng kawngˉ yang hpangˉ awkˍ yao aeˉ naeˉ yaˇ. 8Hpaˍcaoˍ kawngˉ sat yao laˉ voˍ. Haeˉ mae ha baoˉ vaˍ, yang nawng kawngˉ sat luiˍ naeˍ yaˇ. Naˍ hokˍ ang yaˍ yawng veuˉ, naˍ hokˍ na baˍ vaˍ laeˍ jo. Nuing ba nyiˍ sai nae kuitˆ naeˉ changˉ yawng veuˉ, nawng beu nuing ba hingˉ na seungˍ sangˉ laˉ biˍ voˍ. 9Nuing ba hkaoˉ veu tuk hpan yao ca voˍ. Nuing ba hkaoˉ veu kuitˆ manˍ laeˍ yao ca voˍ. Ungˉ yao haoˉ yao ca voˍ. Nawng uiˉ siˉ naeˉ hingˉ ngaˍ ungˉ naeˉ haoˉ naeˉ hingˉ hpeuˍ laˉ laeˍ bu. Nawng beu mawnˍ kyaˍ hingˉ ngaˍ, kuitˆ manˍ laeˍ naeˍ uiˉ penˉ laˉ laeˍ bu. 10Ang suingˉ Hpaˍcaoˍ tawngˍ naˍ veu nuing ba dawˍ lawˍ nae chiˉ voˍ. Haeˉ mae ha baoˉ vaˍ, yang nawng na chiˍ ta laˍ naeˍ yaˇ.

Yaˍ changˍ mawngˉ namˉ na naˍ hokˍ baˍ chiˍ nae awˍ lawng

11Yaˍ changˍ mawngˉ namˉ yawng veuˉ, htiˍ hu nae htiˍ hu aˍ kawngˍ yaˍ lang jo. Yaˍ changˍ mawngˉ namˉ na kawngˍ yaˍ naeˍ na baˍ upˍ, naˍ hokˍ chiˉ naeˉ na baˍ upˍ, yaˇ ang liˍ ang kawngˍ na kawngˍ yaˍ yao, naˍ hokˍ chiˉ naeˉ uiˉ changˉ yaˇ. Ang liˍ ang kawngˍ na nang naˍ hokˍ chiˉ baoˉ vaˍ, naˇ ang liˍ ang kawngˍ na naˉ yuˉ naeˉ uiˉ changˉ baˍ aˍ. Ang liˍ ang kawngˍ na, naˇ aˉ muˍ tatˆ hu mangˉ yaˇ. 12Ang liˍ ang kawngˍ chiˉ jiˉ maˇ aˉ muˍ tatˆ naeˉ uiˉ changˉ tiˍ hu naeˍ naˇ ca jiˉ. Yaˇ piˉ caeˉ naeˉ uiˉ muiˉ, tiˍ kangˍ naeˍ uiˉ muiˉ laˍ htiˍ ang ca yaˇ. Caˇ, naˇ aˉ mae uiˉ changˉ hpeuˍ yao, nang htang veu ca naeˉ uiˉ changˉ na naˍ hokˍ chiˉ naeˉ.

Kaˉ huˍ saˍ laiˍ na nuing ba baˍ ya huiˍ naeˍ uiˉ awˍ lawng

13Nawng htiˍ baˍ baˍ ciˍ naeng, Miˉ nuing na seuˇ gu vengˍ htiˍ vengˍ vengˍ veu htiˍ nuing pi duingˉ aeˉ naeˇ yaˇ. Hingˉ keung veu kawngˍ ka nga yao, namˍ maet ya naeˇ yaˇ nae ciˍ naeˍ yaˇ. Ningˉ mae ciˍ naeˍ uiˉ changˉ yawng veuˉ, maenˍ nae kuitˆ nga laeˍ beun. 14Na seuˇ aˉ mae hpeuˍ laˉ naeˉ na nawng baˍ bae. Nawng beu a sak hingˉ ba ceuˇ na tuˉ laˉ naeˇ. Htiˍ chit nae ya myangˉ nga saˍ jiˍ langˉ ang saˍ na tuˉ laˉ naeˉ yaˇ. 15Nawng ciˍ kyaˍ nawˍ, Ang suingˉ Hpaˍcaoˍ nuing ba capˆ baoˉ vaˍ, gu a sak teˍ yaˍ yao ningˉ mae hingˉ mae ha naeˉ yaˇ nae ciˍ kyaˍ yaˇ. 16Caˇ, ya muiˉ nawng nuing ba huiˍ yao ang baw taw yaˍ laeˍ naeˍ yaˇ. Nuing ba huiˍ naeˍ hingˉ uiˉ hkaˉ hko laˉ hko nawˍ ang haiˉ yaˇ. 17Hingˉ pa nae, maenˍ nae naˉ bae yao, baˍ vaˍ nae uiˉ changˉ ngaˍ, yang saˍ laiˍ nawˍ naˍ hokˍ hpeuˍ naeˍ yaˇ.

Currently Selected:

Yaˍkok 4: pyy

Highlight

Copy