Yaˍkok 3

Maenˍ haˍ na tiˍ naˍ naeˉ awˍ lawng

1Ga beu yaˍ changˍ mawngˉ namˉ yawng veuˉ, nawng ngaˍ aˉ mangˉ muiˉ nae maˍ naeˍ uiˉ saˍ laˉ baˍ hpeuˍ byaˍ jo. Gu maˍ biˍ naeˍ uiˉ changˉ uiˉ aˍ, hao htaˍ chae nae aˉ muˍ tatˆ naeˉ na ya hkamˉ naeˉ na nawng muiˉ ang bae yaˇ. 2Aˉ mae yao nae baoˉ vaˍ, gu hkaˉ hko laˉ hko laiˉ ceuˍ na tiˍ si byaˇ. Changˉ htiˍ hu hu yaˇ hkaˍ muˍ htiˍ cangˍ nae muiˉ baˍ ciˍ si laeˍ myang nae baoˉ vaˍ, yaˉ puing kawˉ naeˉ uiˉ changˉ hpeuˍ yao, ang to htiˍ to hkaˉ hko laˉ hko na kaˍ yaˍ naeˍ uiˉ changˉ hpeuˍ byaˇ. 3Aˍ mawngˍ na gu kaˍ yaˍ taw naeˉ uiˉ saˍ laiˍ yang beu miˍ tu veu laˍ tuiˍ hpui baoˉ vaˍ ang to hingˉ na gu ang chuingˉ kaˍ yaˍ taw yaˇ. 4Heungˍ sangˍ hpaoˍ hingˍ uiˉ na hu voˍ. Huiˍ sutˆ nae heungˍ sangˍ hpaoˍ hingˍ uiˉ na hawˉ manˉ taw yao muiˉ, heungˍ sangˍ hpaoˍ kaˍ hu maˇ iˉ yaiˍ sutˆ nae laˍ tuiˍ hingˍ na caiˍ yaˍ yao, yang kuitˆ yao chiˉ jiˉ lawˉ heungˍ sangˍ hpaoˍ hiˍ mangˉ na ang hpatˆ kaˍ yaˍ taw yaˇ. 5Ningˉ lawˉ yaˇ, maenˍ haˍ ningˍ nga iˉ yaiˍ sutˆ nae uiˉ ang hkuing hpeuˍ yao muiˉ huiˍ sutˆ nae awˍ lawng na ciˍ tangˍ ang mawng ang huiˍ ang ciˍ hkiˍ. Iˉ yaiˍ sutˆ nae miˍ htawˍ hingˍ ngaˍ huiˍ sutˆ nae changˍ kawngˍ hingˍ na ang cawˍ pya hkiˍ na hu voˍ. 6Maenˍ haˍ hingˍ nga miˍ htawˍ lawˍ yaˇ. Gu beu ang to ningˉ hkaoˉ veu, maenˍ haˍ hingˍ nga naˍ hokˍ beu ang meungˉ hpeuˍ naeˍ yaˇ. Gu beu ang to hkaˉ hko laˉ hko ningˉ na tiˍ chaˍ tiˍ kaeˍ laˍ naeˍ uiˉ yaˇ. Nuing ba hkaoˉ veu ang haiˉ uiˉ ang byaˍ piˉ taw laˉ yao, yaˍ caeˉ ca yao ya caeˉ piˉ byaˍ laˉ naeˉ. Maenˍ haˍ hingˍ nga moˍ naˉ hokˍ beu miˍ htawˍ hingˍ lawˉ changˉ ang yaˍ na miˍ htawˍ piˉ cawˍ laˉ naeˉ yaˇ. 7To saet to hkawngˉ, ha yaˍ, tawˍ cangˉ naeˉ uiˉ, cong nga cangˉ naeˉ uiˉ, langˉ hkaoˉ veu ca naeˉ uiˉ ang ceuˉ nae, cu ceuˉ ceuˉ na changˉ tiˍ naˍ yao ang kaˍ nae, tiˍ naˍ hko jiˉ uiˉ yaˇ. 8Caˇ, changˉ nawˍ maenˍ haˍ ningˍ na tiˍ naˍ yao baˍ kaˍ. Maenˍ haˍ ningˍ nga baˍ saoˍ hkiˍ nae uiˉ ang haiˉ kanˉ na vaˍ naeˍ uiˉ keungˍ. Piˉ siˉ hkiˍ naeˍ uiˉ namˍ pit muiˉ yang hkaoˉ veu htiˍ puing ca naeˉ yaˇ. 9Gu beu maenˍ haˍ hingˍ na caiˍ yao gu beu A vangˉ hpeuˍ naeˍ Ang suingˉ Hpaˍcaoˍ mangˍ na chiˍ mawng naeˉ yaˇ. Peunˉ na yao, Hpaˍcaoˍ lawˍ peungˍ cawngˉ yao chiˉ saˍ jiˍ changˉ uiˉ na muiˉ maenˍ haˍ ningˍ na caiˍ yao saengˉ vanˉ laeˍ naeˍ yaˇ. 10Miˍ tu htiˍ tu hingˉ hkaoˉ veu chiˍ mawng naeˉ tangˍ muiˍ, saengˉ vanˉ naeˉ tangˍ muiˍ taw luiˍ naeˍ yaˇ. Ga beu yaˍ changˍ mawngˉ namˉ yawng veuˉ, ningˉ mae ha yao baˍ kaˍ pe. 11Langˉ piˍ htiˍ piˍ veu langˉ ang kuingˉ nae langˉ ang hkunˍ htuˍ yaˍ laˉ mae baˍ taw luiˍ hkiˍ. 12Ga beu yaˍ changˍ mawngˉ namˉ yawng veuˉ, suiˍ hpuk pangˉ veu saˍlongˍ ang suiˍ ang suiˍ cae laˍ. Matˍ sa pit nangˍ ngam veu suiˍ hpuk suiˍ ang suiˍ cae laˍ. Haeˉ mae baˍ suiˍ cae beu lawˉ, langˉ ang hkunˍ uiˉ langˉ ang kuingˉ baˍ hpeuˍ laˍ hki.

Buingˍ htaˍ veu lui naeˉ pingˍ nyaˍ awˍ lawng

13Nawng hkaoˉ veu, pingˍ nyaˍ ang ca nae bae buˉ hkiˍ naeˍ maˇ aˍ sangˍ jeuˇ. Changˉ hiˉ maˇ pingˍ nyaˍ ca beu lawˉ, nuing ba dawˍ naeˍ hkaoˉ veu, maenˍ nae a sak teˍ yaˍ yao, yang beu kanˉ hingˉ uiˉ hpuiˉ yao piˉ hu voˍ. 14Caˇ, nawng hao na hkoiˉ naeˉ uiˉ nuing ba ca yao, aˍ sangˍ yang ang to na hak naeˉ hkaoˉ veu ang muˉ hpakˍ lang siˉ naeˉ uiˉ nuing ba ca baoˉ vaˍ, nawng ngaˍ aˍ sangˍ yang beu pingˍ nyaˍ na chiˍ huiˍ chiˍ mawng yao, sui naeˉ pawng naeˉ ang tangˍ na hpaeˉ saˍ naeˍ uiˉ ba ha jo. 15Ningˉ mae uiˉ pingˍ nyaˍ nawˍ, Hpaˍcaoˍ beu lui jiˉ pingˍ nyaˍ baˍ aˍ. Nuingˉ chaˍ htaˍ veu pingˍ nyaˍ nae, ang saˍ ang mangˉ beu pingˍ nyaˍ, deˍ yaˍ beu pingˍ nyaˍ hpeuˍ naeˍ yaˇ. 16Aˉ mae yao nae baoˉ vaˍ, hkoiˉ naeˉ uiˉ nuing ba ca yao, aˍ sangˍ yang ang to na hak baoˉ vaˍ, suk sak naeˉ ang ceuˉ nae kanˉ ang haiˉ uiˉ laiˉ ceuˍ ca naeˉ yaˇ. 17Hpaˍcaoˍ beu lui naeˉ pingˍ nyaˍ nawˍ, kaˉ huˍ veu seungˍ naeˍ sangˉ naeˉ, kaˉ nawngˍ veu yaˍ lang tuingˉ lang naeˉ, nuing ba dawˍ naeˍ, naˉ yuˉ naeˉ nae, saˍ kyaˍ kyaˍ hkiˍ naeˍ uiˉ muiˉ, maenˍ naeˍ uiˉ ang suiˍ muiˍ htiˍ puing ca naeˉ yaˇ. Mae kaˍ na hu naeˉ uiˉ nae tuiˍ kaeˍ kaeˍ naeˍ uiˉ muiˉ baˍ ca. 18Yaˍ lang tuingˉ lang naeˉ na vaˍ naeˍ uiˉ changˉ ngaˍ yaˍ lang tuingˉ lang naeˉ uiˉ hkaoˉ veu sanˍ yao ang sui pawng ang suiˍ suiˍ naeˍ na ya naeˉ yaˇ.

Currently Selected:

Yaˍkok 3: pyy

Highlight

Copy