Yaˍkok 2

Hao beu mae kaˍ na baˍ ya hu nae uiˉ awˍ lawng

1Ga beu yaˍ changˍ mawngˉ namˉ yawng veuˉ, mun hpungˉ ang huiˍ gu beu Ang suingˉ Yeˍsuˆ Hkrit na yumˉ naeˉ uiˉ changˉ ngaˍ, changˉ beu mae kaˍ na baˍ hu jo. 2Aˉ mae yao nae baoˉ vaˍ, hkamˍ laˍ panˍ kan na laeˍ yao hkaˍ lao ang maenˍ tum nga laeˍ jiˍ hiˉ maˇ, baˍ maenˍ nae uiˉ hkaˍ lao tum nga laeˍ jiˍ changˉ ang saˍ baeˍ htiˍ hu, yaˉ yetˍ nyiˍ hu nawng hpawm lang kyaˉ veu awngˉ nga langˉ beu, 3hkaˍ lao ang maenˍ hiˍ mangˉ na nawng saˍ nyamˉ yao ciˍ sangˍ naeˍ, duingˉ kyaˉ ang maenˍ nawtˆ duingˉ voˍ. Peunˉ na yao ang saˍ baeˍ yaˍ mangˍ na nawng ciˍ sangˍ naeˍ, Hiˉ keungˉ veu cung yao ca oˍ. Baˍ baoˉ, ga beu laˍ hkuiˍ tawngˍ naˍ nawtˆ duingˉ voˍ nae, nawng ciˍ baoˉ vaˍ, 4nawng htiˍ hu nae htiˍ hu mae kaˍ na hu nae hpaˉ batˆ lang yao haiˉ naeˉ uiˉ hkamˍ kuit hkaoˉ veu hao na aˉ muˍ tatˆ biˍ naeˍ uiˉ changˉ hpeuˍ naeˍ baˍ aˍ la. 5Ga hak naeˉ yaˍ changˍ mawngˉ namˉ yawng veuˉ maenˍ nae naˉ voˍ. Yumˉ naeˉ uiˉ hkaoˉ veu ca laˉ pang laˉ naeˉ uiˉ saˍ laiˍ, ang saˍ ang baeˍ nuingˉ chaˍ yaˍ uiˍ na Hpaˍcaoˍ cheˉ yuˉ yao chiˉ jiˉ baˍ laˍ. Hpaˍcaoˍ na hak naeˉ uiˉ changˉ na yang beu ang meungˉ hingˉ piˍ naeˍ yaˇ nae saˉ caˉ piˍ saˍ jiˍ lawˉ, Hpaˍcaoˍ yawng na upˆ peungˍ yao yawng ang buinˉ ya naeˉ yaˇ. 6Caˇ, nawng ngaˍ ang saˍ baeˍ yaˍ uiˍ na baˍ saˍ baˍ nyamˍ nae ha naeˉ yaˇ. Nawng na hkanˍ yaˍ chuiˍ yaˍ laˍ yao aˉ muˍ tatˆ lang kyaˉ veu seu laengˉ laˍ jiˍ changˉ uiˉ aˍ, changˉ ang ca pang uiˉ baˍ aˍ la. 7Nawng ya jiˉ Ang suingˉ Yeˍsuˆ Hkrit beu ang maengˉ ang maenˍ hingˍ na hpaˉ batˆ nae ciˍ naeˍ uiˉ changˉ uiˉ ngaˍ, changˉ ang ca pang uiˉ baˍ aˍ la.

8Nang ang to na hak naeˉ laˉ mae nang tawngˍ htang veu ca naeˉ changˉ uiˉ na hak voˍ nae, camˉ lik hkaoˉ veu taemˉ saˍ jiˍ. Hkunˉ hawˉ hkamˉ beu ang liˍ ningˍ na nawng vaˍ puing baoˉ vaˍ, ang maenˍ kanˍ na nawng vaˍ byaˇ. 9Caˇ, hao mae kaˍ na nawng hu yao ca baoˇ, nawng naˍ hokˍ na vaˍ yao, ti si jiˉ changˉ hpeuˍ byaˇ nae ang liˍ ang kawngˍ veu hpeuˉ yao maˍ laˍ jiˍ. 10Aˉ mae yao nae baoˉ vaˍ, changˉ aˉ mangˉ na baˍ up, ang liˍ ang kawngˍ hkaˉ hko laˉ hko na vaˍ naeˍ hkaoˉ veu, ang liˍ htiˍ lumˍ hingˍ na nawng tiˍ si baoˉ vaˍ, hkaˉ hko laˉ hko na vaˍ si jiˉ lawˉ hpeuˍ byaˇ. 11Baˍ suˍ baˍ linˍ ya jo nae ciˍ yao ca naeˉ changˉ htiˍ hu hiˉ maˇ, Changˉ na baˍ ya saeˍ nae muiˉ hkai naeˉ yaˇ. Haeˉ mae baoˇ, nang hao na baˍ suˍ baˍ linˍ ya yao muiˉ hao na saeˍ baoˉ vaˍ ang liˍ ang kawngˍ na tiˍ si jiˉ changˉ hpeuˍ naeˍ yaˇ. 12Piˉ caeˉ naeˉ uiˉ ang liˍ ang kawngˍ na cuˉ yao, nawng na aˉ muˍ ya tatˆ laˍ naeˍ pa nae, nawng hkaˍ muˍ hkai yao na baˍ upˍ, kanˉ vaˍ yao na baˍ upˍ, maenˍ nae vaˍ vo. 13Aˉ mae yao nae baoˉ vaˍ, hao na saˍ kyaˍ baˍ kyaˍ hkiˍ nae mangˉ aˉ muˍ tatˆ naeˉ na ya hkamˉ beu, aˉ muˍ tatˆ naeˉ maˇ yang na saˍ kyaˍ baˍ kyaˍ laˇ. Saˍ kyaˍ kyaˍ hkiˍ naeˍ hingˉ ngaˍ aˉ muˍ tatˆ naeˉ na ang kaˍ yaˍ yaˇ. Hao na saˍ kyaˍ kyaˍ baoˉ vaˍ Hpaˍcaoˍ nawˍ aˉ muˍ tatˆ beu saˍ kyaˍ kyaˍ laˍ naeˍ yaˇ.

Nang yumˉ yao kanˉ baˍ vaˍ baoˉ vaˍ, yumˉ naeˉ hingˉ ngaˍ siˉ jiˉ lawˉ yaˇ

14Ga beu yaˍ changˍ mawngˉ namˉ yawng veuˉ, changˉ htiˍ hu hu, Gaˇ ang yumˉ yaˇ nae ciˍ yao muiˉ, kanˉ baˍ vaˍ nae baoˉ vaˍ, ba ceuˇ ang buinˉ ca naeˇ. Yumˉ naeˉ hingˉ ngaˍ yang na ang htaiˍ awkˍ taw laˍ. 15Yaˍ changˍ mawngˉ namˉ htiˍ hu hu ang kaˍ tum baˍ ca nae htiˍ nuing saˍ laiˍ htiˍ nuing caˍ keungˍ baˍ ca nae beu, 16nawng hkaoˉ veu changˉ htiˍ hu hu ciˍ naeˍ, Mawnˍ pyawˉ naeˉ hkaoˉ veu aeˉ laeˍ bao. Nang ang to hingˉ na lumˉ laˉ bu, kawˉ laˉ bu nae ciˍ nae. Hta yao muiˉ, yang ang to loˉ siˉ naeˉ hingˉ na nang baˍ piˍ baoˉ vaˍ ba ceuˉ ang buinˉ ca naeˇ. 17Hingˉ lawˉ yaˇ, nang yumˉ yao kanˉ baˍ vaˍ baoˉ vaˍ, yumˉ naeˉ hingˉ ngaˍ siˉ jiˉ lawˉ yaˇ.

18Caˇ, nawng htiˍ hu hu hkaoˉ veu ciˍ jiˍ yang, Naˇ ang yumˉ yaˇ. Gaˇ kanˉ vaˍ ngaeˉ yaˇ nae ciˍ naeˍ yaˇ. Kanˉ baˍ vaˍ nae nang yumˉ naeˉ hingˉ maˍ lao. Gaˇ kanˉ vaˍ naeˍ hkaoˉ veu, ga yumˉ naeˉ hingˉ maˍ laˍ naeˍ yaˇ. 19Hpaˍcaoˍ htiˍ hu naˇ ca yaeˇ nae nang ang yumˉ yaˇ leˍ. Nang yumˉ jiˉ hingˉ ngaˍ ang yaˍ yaˇ. Deˍ yaˍ uiˍ muiˉ yumˉ yao hkae did did yao ca ngaeˉ yaˇ. 20Baˍ kuitˍ lae hkiˍ nae uiˉ changˉ veuˉ, yumˉ yao kanˉ baˍ vaˍ nae uiˉ ceuˉ aˍ, htiˍ ceuˍ ang buinˉ baˍ ca nae nawng ang bae hkaemˍ siˍ la. 21Gu beu a vangˉ Aˍbraˍhamˍ nawˍ, yang beu ang yaˍ Iˉcak na tanˍ kyaˍ htaˍ veu tanˍ na beu, kanˉ vaˍ yao Hpaˍcaoˍ yang na changˉ ang sui pawng nae sawnˉ jiˉ baˍ aˍ la. 22Yang vaˍ jiˍ kanˉ hingˉ yumˉ naeˉ hingˉ muiˉ htuˍ yaˍ laˉ mae ca yao, kanˉ ningˉ pa nae yumˉ naeˉ ningˉ muiˉ puing laˉ jiˉ na nang ya myangˉ naeˉ yaˇ. 23Aˍbraˍhamˍ Hpaˍcaoˍ na yumˉ jiˉ pa nae, Hpaˍcaoˍ yang na changˉ ang sui pawng nae sawnˉ jiˉ yaˇ nae ciˍ saˍ jiˍ camˉ lik hkaoˉ veu ningˉ htaeˉ puing laˉ jiˉ yaˇ. Ningˉ htaˍ veu muiˉ, Hpaˍcaoˍ beu ang changˍ yaˇ nae haoˉ laˍ jiˍ yaˇ. 24Ningˉ pa nae, changˉ htiˍ hu yumˉ naeˉ saˉ naeˉ hingˉ htiˍ yaˍ nae changˉ ang sui pawng sawnˉ naeˉ baˍ aˍ. Kanˉ muiˉ vaˍ yao changˉ ang sui pawng sawnˉ naeˉ na ya myangˉ naeˉ yaˇ.

25Ningˉ lawˉ yaˇ, Raˍhaˆ#2:25 Ys 2:1-24 nae maengˉ jiˉ mae maˍ laˉ ba htiˍ hu maˇ, caiˍ ya jiˉ changˉ mangˉ na hap yuˉ yao, aw htaˍ veu kaˉ ba htiˍ senˍ hingˍ piˉ aeˉ laeˍ beu, kanˉ vaˍ yao changˉ ang sui pawng hpeuˍ laˉ jiˉ baˍ la. 26Hingˉ pa nae, ang to hkaoˉ veu ang hkawˍ laˉ baˍ ca nae baoˉ vaˍ siˉ aengˉ naˇ. Ningˉ lawˉ yaˇ, yumˉ naeˉ ningˉ muiˉ kanˉ baˍ vaˍ baoˉ vaˍ, siˉ jiˉ lawˉ yaˇ.

Currently Selected:

Yaˍkok 2: pyy

Highlight

Copy