2 Hteˉsaˍlawˉniˆ 1
1
Ang changˍ uiˍ na kuitˆ puiˉ naeˉ uiˉ tangˍ
1Pawˉluˆ, Siˉlaˍnuˆ nae Tiˉmoˉseˍ yawng ngaˍ, gu beu Ang vangˉ Hpaˍcaoˍ nae Ang suingˉ Yeˍsuˆ Hkrit hkaoˍ veu ca naeˉ uiˉ Hteˉsaˍlawˉniˆ Hkritˆ yanˍ ang muˉ na ang laiˍ ningˍ htiˍ pap taemˉ laˍ yaeˍ yaˇ. 2A vangˉ Hpaˍcaoˍ nae Ang suingˉ Yeˍsuˆ Hkrit beu ang buinˉ lapˍ sawngˍ nae mawnˍ pyawˉ naeˉ uiˉ nawng hkaoˉ veu ca biˍ voˍ.
Yeˍsuˆ lungˍ luiˍ laeˍ beu, naˍ hokˍ ang yaˍ uiˍ na aˉ muˍ tatˆ biˍ naeˍ uiˉ awˍ lawng
3Yaˍ changˍ mawngˉ namˉ yawng veuˉ, nawng saˍ laiˍ gu aˉ lawˍ beun muiˉ Hpaˍcaoˍ na chiˍ huiˍ chiˍ mawng kyaˉ jaˇ. Aˉ mae yao nae baoˉ vaˍ, nawng yumˉ saˉ naeˉ hingˉ huiˍ laˉ byaˍ laˉ naeˉ hingˉ nae, nawng hkaˉ hko laˉ hko htiˍ hu nae htiˍ hu hak lang paengˉ lang naeˉ hingˉ byaˍ laˉ yao, gu ningˉ mae chiˍ mawng yao kuingˉ naeˉ yaˇ. 4Hingˉ pa nae, hkanˍ yaˍ chuiˍ yaˍ naeˍ uiˉ nae tuk naeˉ hpan naeˉ uiˉ hkaˉ hko laˉ hko na nawng ya hkamˉ buˉ naeˉ hkaoˉ veu, nawng beu nuing ba yiˍ naenˉ nae yumˉ yao saˉ yao, Hpaˍcaoˍ beu Hkritˆ yanˍ ang muˉ htiˍ baˍ uiˍ mae nuing suiˍ tawngˍ naˍ veu gu nawng na chiˍ mawng laˍ naeˍ yaˇ.
5Hkanˍ yaˍ chuiˍ yaˍ naeˍ uiˉ hkaoˉ veu nawng beu nuing ba yiˍ naenˉ naeˉ pa nae, Hpaˍcaoˍ sui pawng naeˉ hkaoˉ veu aˉ muˍ tatˆ laˍ jiˍ uiˉ htiˍ ceuˍ yaˇ. Hpaˍcaoˍ beu ang meungˉ saˍ laiˍ nawng hkamˉ yao ca yao, ang meungˉ hingˉ na kuingˉ lang naeˉ uiˉ saˍ laiˍ yang vaˍ yao ca ngaeˉ yaˇ. 6-7Ang suingˉ Yeˍsuˆ nawˍ buingˍ htaˍ htaˍ veu yang beu laˍ htiˍ htiˍ puing ca naeˉ hkaoˉ veu buingˍ htaˍ naiˍ htangˍ uiˍ kawngˉ htuˍ yaˍ laˉ mae miˍ htawˍ ang chit pa sutˆ nae hkaoˉ veu taw laˉ beu Hpaˍcaoˍ nawˍ sui naeˉ pawng naeˉ hkaoˉ veu aˉ muˍ tatˆ yao, nawng na hkanˍ yaˍ chuiˍ yaˍ laˍ naeˍ uiˉ changˉ na yang hkanˍ yaˍ chuiˍ yaˍ laeˍ naeˍ na baˍ upˍ, hkanˍ yaˍ chuiˍ yaˍ jiˍ na ya hkamˉ buˉ jiˉ nawng ngaˍ, gu kawngˉ htuˍ yaˍ lawˉ ya saoˍ naeˍ yaˇ. 8Hpaˍcaoˍ na baˍ baeˉ suing nae uiˉ changˉ na baˍ upˍ, gu beu Ang suingˉ Yeˍsuˆ beu mawnˍ pyawˉ naeˉ ang buinˉ tangˍ na baˍ naˍ yuˉ nae uiˉ changˉ uiˉ na baˍ upˍ, yang kaˍ haengˍ nae vaˍ yao tawpˍ laeˍ biˍ naeˍ yaˇ. 9Yeˍsuˆ lungˍ luiˍ laeˍ beu htiˍ nuing hingˉ ngang beu, changˉ hingˉ uiˉ aˍ Ang suingˉ Yeˍsuˆ na muiˉ, mun hpungˉ htiˍ puing nae ca naeˉ yang beu laˍ htiˍ na muiˉ ya hpakˍ lang yao, tuingˍ co tuingˍ cat kangˍ naeˍ chaw naeˉ na ya hkamˉ buˉ naeˉ. 10Hingˉ nuing hingˉ hkaoˉ veu, Hkritˆ yanˍ htiˍ baˍ uiˍ Yeˍsuˆ na chiˍ huiˍ chiˍ mawng yao yumˉ naeˉ saˉ naeˉ uiˉ changˉ manˍ yao chiˍ mawng naeˉ uiˉ saˍ laiˍ Yeˍsuˆ ya naeˉ yaˇ. Gu saˉ hkiˉ hkamˉ naeˉ na nawng yumˉ naeˉ pa nae, nawng muiˉ hingˉ muˉ hingˉ hkaoˉ veu ca naeˉ uiˉ yaˇ. 11Nawng saˍ laiˍ gu aˉ lawˍ beun muiˉ ningˉ mae ang buinˉ paˉ yao ca ngaeˉ yaˇ. Gu beu Hpaˍcaoˍ haoˉ yuˉ laˍ jiˍ na nawng kuingˉ lang naeˉ uiˉ changˉ hpeuˍ laˉ naeˉ na ang buinˉ paˉ yaeˉ yaˇ. Nawng beu maenˍ naeˍ uiˉ kanˉ na vaˍ siˍ naeˉ na kuitˆ yao hawˍ naeˍ uiˉ changˉ hkaˉ hko laˉ hko nae, yumˉ naeˉ uiˉ hkaoˉ veu ya vaˍ jiˍ uiˉ kanˉ hkaˉ hko laˉ hko yang beu tanˉ hkoˉ hkaoˉ veu nawng ya vaˍ peunˍ naeˉ uiˉ saˍ laiˍ gu ang buinˉ paˉ yao cangˉ ngaeˉ yaˇ. 12Gu beu Hpaˍcaoˍ nae Ang suingˉ Yeˍsuˆ Hkrit beu ang buinˉ huiˍ naeˍ lawˉ, ningˉ laˉ mae puing kawˉ laˉ bu. Nawng pa nae yao, changˉ uiˉ aˍ Yeˍsuˆ beu ang maengˉ na chiˍ mawng naeˉ yaˇ. Yang paˉ nae yao nawng muiˉ mun hpungˉ ya naeˉ yaˇ.
Currently Selected:
2 Hteˉsaˍlawˉniˆ 1: pyy
Highlight
Share
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc.