1 Hteˉsaˍlawˉniˆ 5

Ang suingˉ Yeˍsuˆ lui laeˍ naeˍ nuing

1Yaˍ changˍ mawngˉ namˉ yawng veuˉ, ang nuing ang nyamˍ nae saˉ hkatˆ hingˉ htiˍ baˍ uiˍ awˍ lawng nawng na ang laiˍ taemˉ laˍ naeˍ uiˉ baˍ loˍ. 2Aˉ mae yao nae baoˉ vaˍ, muˍ hkiˍ beu changˉ daengˍ hkaoˍ laˉ naeˉ lawˉ Ang suingˉ Yeˍsuˆ beu ang nuing hkeu laˉ naeˉ uiˉ na nawng maenˍ bae yao ang ca yaˇ. 3Ang meungˉ cui laˉ yao gu htiˍ ceuˍ kuitˆ manˍ laeˍ kyaˍ baˍ ca nae, hao hkai lang ga beu, ang yaˍ keutˆ yaˍ naeˍ uiˉ hkaˍ ba yaˍ htiˍ hu htiˍ chit nae daˉ sutˆ nae ya hkamˉ beu lawˉ, kangˍ naeˍ chaw naeˉ uiˉ yawng hkaoˉ veu htiˍ chitˍ nae hkeu lui naeˉ yaˇ. Yawng caeˉ taw naeˉ uiˉ iˉ yaˍ nae muiˉ baˍ ca. 4Caˇ, yaˍ changˍ mawngˉ namˉ yawng veuˉ, nawng ang vuingˉ vangˉ hkaoˉ veu baˍ ca nae yao, ang nuing ningˉ ngaˍ, daengˍ hkaoˍ laˍ mae nawng hkaoˉ veu hkeu lui naeˉ baˍ aˍ. 5Aˉ mae yao nae baoˉ vaˍ, nawng hkaˉ hko laˉ hko nawˍ ang chit uiˉ beu ang luˍ ang han nae nuing kawngˉ uiˉ beu ang luˍ ang han uiˉ yaˇ. Gu aˍ muˍ hkiˍ veu uiˉ htiˍ ceuˍ na baˍ upˍ, vuingˉ vangˉ naeˉ uiˉ ceuˉ na baˍ upˍ, baˍ chaˍ lang. 6Hingˉ pa nae yao, aw htaˍ veu uiˉ yuˍ nuˍ awngˉ naeˉ laˉ mae gu aˍ yuˍ nuˍ awngˉ ngangˉ yao aˍ ca jo. Gu maenˍ nae hawˍ yao saˍ tiˍ ca baiˉ seuˍ. 7Aˉ mae yao nae baoˉ vaˍ, yuˍ nuˍ awngˉ ngangˉ jiˉ uiˉ changˉ ngaˍ, muˍ hkiˍ beu yuˍ nuˍ awngˉ ngangˉ jiˉ uiˉ yaˇ. Taengˍ hkaˍ tangˉ maoˍ laeˍ jiˍ uiˉ changˉ muiˉ, muˍ hkiˍ beu tangˉ maoˍ laeˍ jiˍ yaˇ. 8Gu aˍ nuing kawngˉ veu chaˍ lang naeˉ uiˉ changˉ hpeuˍ naeˍ paˉ nae, saˍ tiˍ ca yao ca baiˉ seuˍ. Yumˉ naeˉ hingˉ nae hak naeˉ paengˉ naeˉ hingˉ nuing ba veu hpuingˍ laeˍ seuˍ laˉ mae kaˍ tum nga laeˍ yao, htaiˍ awkˍ naeˍ uiˉ na chaˍ lang naeˉ uiˉ kuitˆ yao chiˉ jiˉ nae ha naeˉ hingˉ samˉ tiˍ chawngˍ hingˍ na chawngˍ nga laeˍ baiˉ seuˍ. 9Aˉ mae yao nae baoˉ vaˍ, nuing ba inˍ naeˍ hingˉ na ya hkamˉ naeˉ uiˉ saˍ laiˍ Hpaˍcaoˍ gu na cheˉ taw laˍ jiˍ baˍ aˍ. Gu beu Ang suingˉ Yeˍsuˆ Hkrit mangˍ pa nae htaiˍ awkˍ naeˍ uiˉ na ya naeˉ uiˉ saˍ laiˍ, yang gu na cheˉ taw laˍ jiˍ yaˇ. 10Yeˍsu lungˍ luiˍ laeˍ beu, Gu teˍ yaˍ yao ca naeˉ na baˍ upˍ, siˉ yao na baˍ upˍ, yang kawngˉ htuˍ yaˍ laˉ mae ya teˍ yaˍ naeˍ uiˉ saˍ laiˍ, yang gu saˍ laiˍ hkamˉ siˉ byaˇ. 11Hingˉ pa nae, ya muiˉ nawng vaˍ yao ca naeˉ lawˉ, htiˍ hu nae htiˍ hu kaˍ piˍ htaengˍ lang yao, htiˍ hu nae htiˍ hu huiˍ laˉ mawng laˉ naeˉ uiˉ saˍ laiˍ pawngˍ lang voˍ.

Pawˉluˆ yawng na kaˍ piˍ jiˍ

12Yaˍ changˍ mawngˉ namˉ yawng veuˉ, gu nawng na ningˉ mae paˉ laˍ naeˍ yaˇ. Nawng hkaoˉ veu kanˉ vaˍ yao, Ang suingˉ Yeˍsuˆ hkaoˉ veu nawng na hak sa laˍ yao saˍ tiˍ piˍ laˍ naeˍ uiˉ changˉ na saˍ nyamˉ voˍ. 13Yawng vaˍ jiˍ uiˉ kanˉ uiˉ pa nae, hak naeˉ hkaoˉ veu ya caeˉ nae saˍ nyamˉ yao chiˍ mawng voˍ. Nawng muiˉ, htiˍ hu nae htiˍ hu yaˍ lang tuingˉ lang bu.

14Yaˍ changˍ mawngˉ namˉ yawng veuˉ, gu nawng na ningˉ mae paˉ laˍ naeˍ yaˇ. Kanˉ baˍ vaˍ nae uiˉ changˉ na saˍ tiˍ piˍ voˍ. Nuing ba ang iˉ yaˍ uiˍ na kaˍ piˍ htaengˍ vo. Kaˍ dawˍ naeˍ uiˉ changˉ na kaˍ piˍ vo. Changˉ hkaˉ hko laˉ hko htaˍ veu nuing ba ang mongˉ nae kuitˆ voˍ. 15Hao ang haiˉ kanˉ ha laˍ beu nawng htiˍ hu nae muiˉ ang haiˉ kanˉ na baˍ ya ha laeˍ naeˍ uiˉ saˍ laiˍ saˍ tiˍ ca bu. Nawng htiˍ hu nae htiˍ hu na baˍ upˍ, changˉ hkaˉ hko laˉ hko na baˍ upˍ, aˉ lawˍ beun muiˉ maenˍ naeˍ hingˉ ceuˉ na vaˍ yao ca vo.

16Aˉ mae beu muiˉ mawnˍ yao pyawˉ yao ca voˍ. 17Aˉ mae beu muiˉ ang buinˉ paˉ yao ca voˍ. 18Aˉ mae uiˉ hkaoˉ veu na baˍ upˍ Hpaˍcaoˍ na chiˍ mawng yao ca voˍ. Aˉ mae yao nae baoˉ vaˍ, ningˉ mae nawng ha naeˉ uiˉ saˍ laiˍ Yeˍsuˆ Hkrit hkaoˍ veu Hpaˍcaoˍ a loˍ capˆ naeˉ yaˇ.

19Ang hkawˍ laˉ ang seungˍ ang sangˉ beu kanˉ na baˍ tuiˍ suˍ jo. 20Hao Hpaˍcaoˍ beu ang tangˍ maˍ laˍ naeˍ na baˍ saˍ baˍ nyamˍ nae aˍ ha jo. 21Maˍ naeˍ tangˍ ang ceuˉ hkaˉ hko laˉ hko na camˍ hu yao ang maenˍ ang ceuˉ hingˉ na aˉ mae beu muiˉ hap yuˉ yao ca voˍ. 22Ang haiˉ keungˍ ku ceuˉ ceuˉ na hpaeˉ saˍ vo.

23Kuitˆ mawnˍ kuitˆ pyawˉ biˍ laˍ naeˍ mangˉ Hpaˍcaoˍ nawˍ, nawng na ku ceuˉ ceuˉ hkaoˉ veu piˉ seungˍ piˉ sangˉ laˉ voˍ. Gu beu Ang suingˉ Yeˍsuˆ Hkrit lung yao lui laeˍ beu, nawng beu nuing ba, ang hkawˍ laˉ, ang to puing kawˉ yao ca naeˉ hkaoˉ veu naˍ hokˍ chiˉ naeˉ uiˉ baˍ ya ca naeˉ uiˉ saˍ laiˍ, Hpaˍcaoˍ nawng na hak sa laˍ bu. 24Nawng na haoˉ laˍ jiˍ maˇ, saˉ caˉ ca yao, nawng na ningˉ mae ha laˍ naeˍ yaˇ.

Tawngˍ tin veu ang tangˍ nae ang buinˉ piˍ jiˍ ang tangˍ

25Yaˍ changˍ mawngˉ namˉ yawng veuˉ, gu saˍ laiˍ ang buinˉ paˉ voˍ. 26Yaˍ changˍ mawngˉ namˉ uiˉ hkaˉ hko laˉ hko na seungˍ sangˉ naeˉ hkaoˉ veu hawmˉ lang yao laˍ puˍ kuinˍ lang voˍ.

27Yaˍ changˍ mawngˉ namˉ uiˉ hkaˉ hko laˉ hko na ang laiˍ ningˍ hpatˆ yao naˉ biˍ naeˍ uiˉ saˍ laiˍ, Ang suingˉ Yeˍsuˆ na ga cuˉ yao nawng na ang tangˍ piˍ laˍ naeˍ yaˇ. 28Gu beu Ang suingˉ Yeˍsuˆ Hkrit beu ang buinˉ lapˍ sawngˍ nawng hkaoˉ veu ca biˍ vo.

Currently Selected:

1 Hteˉsaˍlawˉniˆ 5: pyy

Highlight

Copy