1 Hteˉsaˍlawˉniˆ 4

Hpaˍcaoˍ nuing ba buiˍ naeˍ uiˉ saˍ laiˍ yawng aˉ mae ya ha naeˇ

1Yaˍ changˍ mawngˉ namˉ yawng veuˉ, ca suiˍ naeˍ ang tangˍ htiˍ htaeˍ yangˍ maˇ, Ang suingˉ Yeˍsuˆ hkaoˉ veu gu nawng na paˉ tawngˍ nga laˍ yao kaˍ piˍ laˍ naeˍ yaˇ. Nawng aˉ mae ya ha naeˉ nae baoˉ vaˍ, Hpaˍcaoˍ nuing ba buiˍ naeˍ uiˉ saˍ laiˍ aˉ mae ya ha naeˉ nae uiˉ gu kawngˉ ya henˍ yaˍ saˍ jiˍ lawˉ, ya muiˉ nawng ya vaˍ yao cangˉ jiˉ lawˉ, ningˉ htaˍ chae nae kaˉ huˍ kaˍ seu kaˍ haengˍ nae vaˍ yao ca voˍ. 2Ang suingˉ Yeˍsuˆ beu tanˉ hkoˉ hkaoˉ veu gu nawng na ang tangˍ piˍ laˍ jiˍ hingˉ na nawng ang bae yaˇ. 3Aˉ mae yao nae baoˉ vaˍ, nawng ya seungˍ ya sangˉ naeˉ uiˉ saˍ laiˍ, ningˉ ngaˍ Hpaˍcaoˍ beu a loˍ capˆ naeˉ yaˇ. Hingˉ pa nae, suˉ yaˍ linˉ yaˍ lang naeˉ ningˉ uiˉ ceuˉ na hpaeˉ taw yao ca voˍ. 4Nawng hkaˉ hko laˉ hko seungˍ naeˍ sangˉ naeˉ maenˍ nae mang naeˉ uiˉ hkaoˉ veu aˍ sangˍ yang beu hkaˍ ba na maenˍ nae yuˉ yao ca voˍ. 5Hpaˍcaoˍ na baˍ bae nae uiˉ changˉ ceuˉ htiˍ baˍ uiˉ aˍ, hyaˍ naeˍ cui naeˉ hingˉ hkaoˉ veu vaˍ yao lae naeˉ yaˇ. Nawng ngaˍ haeˉ mae aˍ ha jo. 6Hyaˍ naeˍ cui naeˉ ningˉ uiˉ ceuˉ hkaoˉ veu changˉ htiˍ hu nae muiˉ aˍ sangˍ yang beu Hkritˆ yanˍ uiˍ na baˍ ya vaˍ punˍ vaˍ leuˍ nae baˍ ya vaˍ si laeˍ. Aˉ mae yao nae baoˉ vaˍ, caeˉ langˉ saˍ jiˍ beu, gu nawng na saˍ tiˍ piˍ laˍ jiˍ lawˉ, Ang suingˉ Yeˍsuˆ nawˍ ningˉ hkaˉ hko laˉ hko saˍ laiˍ yawng na kuingˉ lang naeˉ uiˉ naˍ hokˍ piˍ naeˍ mangˉ yaˇ. 7Baˍ seungˍ baˍ sangˍ nae uiˉ changˉ hpeuˍ naeˍ uiˉ saˍ laiˍ gu na Hpaˍcaoˍ haoˉ yuˉ laˍ jiˍ baˍ aˍ. Changˉ ang seungˍ ang sangˉ hpeuˍ laˍ naeˉ uiˉ saˍ laiˍ yang haoˉ yuˉ laˍ jiˍ yaˇ. 8Hingˉ pa nae, seungˍ maˍ jiˍ hingˉ na paek nga saˍ jiˍ changˉ uiˉ aˍ, maˍ naeˍ uiˉ changˉ na paek nga saˍ jiˍ baˍ aˍ. Ningˉ htaˍ muiˉ, yang beu Ang hkawˍ laˉ ang seungˍ sangˉ piˍ laˍ jiˍ mangˉ Hpaˍcaoˍ na muiˉ paek nga saˍ byaˇ.

9Yaˍ changˍ mawngˉ namˉ htiˍ hu nae htiˍ hu hak lang naeˉ uiˉ awˍ lawng gu nawng na ang laiˍ taemˉ yao piˍ laˍ naeˍ uiˉ na baˍ loˍ. Aˉ mae yao nae baoˉ vaˍ, htiˍ hu nae htiˍ hu hak lang naeˉ uiˉ saˍ laiˍ Hpaˍcaoˍ nawng na maˍ saˍ laˍ byaˇ. 10Maˉ manˉ nae ciˍ baoˉ vaˍ, Maˍkeˍdawˉniˆ ang meungˉ ku ti ti veu ca naeˉ yaˍ changˍ mawngˉ namˉ hkaˉ hko laˉ hko uiˉ na nawng hak yao ang ca yaˇ. Caˇ, yaˍ changˍ mawngˉ namˉ htiˍ baˍ yawng veuˉ, ningˉ htaˍ chae nae yawng na hak laˉ hkiˍ naeˍ uiˉ saˍ laiˍ gu nawng na paˉ laˍ naeˍ yaˇ. 11-12Ningˉ htaˍ veu muiˉ, ang ngiˉ kaˉ seu ca naeˉ uiˉ changˉ htiˍ baˍ nawng na nuing ba capˆ naeˉ uiˉ saˍ laiˍ nae nawng changˉ uiˉ na htiˍ hu nae muiˉ baˍ ya cuˉ naeˉ uiˉ saˍ laiˍ, gu nawng na hkai nga laˍ jiˍ lawˉ, a chuiˉ nae ca yao, aˍ sangˍ yang ang to aˍ sangˍ yang beu kanˉ na vaˍ naeˍ uiˉ saˍ laiˍ nawng na kaˍ piˍ laˍ naeˍ yaˇ.

Ang suingˉ Yeˍsuˆ lui laeˍ naeˍ uiˉ awˍ lawng

13Yaˍ changˍ mawngˉ namˉ yawng veuˉ, kuitˆ yao chiˉ jiˉ laˉ mae baˍ ca nae uiˉ aw htaˍ veu changˉ htiˍ baˍ kuitˆ manˍ laeˍ yao ca naeˉ laˉ mae, nawng baˍ ya kuitˆ manˍ laeˍ naeˍ uiˉ saˍ laiˍ, siˉ peunˉ jiˉ uiˉ changˉ htiˍ baˍ uiˍ awˍ lawng gu nawng na piˉ bae laˍ siˍ naeˉ yaˇ. 14Aˉ mae yao nae baoˉ vaˍ, Yeˍsuˆ siˉ yao teˍ laˉ laeˍ jiˍ na gu ang yumˉ yaˇ. Hingˉ pa nae, yang teˍ laˉ laeˍ jiˍ lawˉ, Hpaˍcaoˍ nawˍ Yeˍsuˆ na cuˉ naeˉ hkaoˉ veu, siˉ peunˉ jiˉ changˉ uiˉ na yang kawngˉ htuˍ yaˍ laˉ mae suiˍ yao laˉ laeˍ naeˍ yaˇ.

15Ang suingˉ Yeˍsuˆ beu ang tangˍ hingˍ na gu cuˉ yao, nawng na ningˉ mae upˍ kyaˍ laˍ naeˍ yaˇ. Ang suingˉ Yeˍsuˆ hkeu lui laeˍ beu tiˍ hkeu gu a sak teˍ yaˍ yao ca naeˉ uiˉ changˉ ngaˍ, siˉ peunˉ jiˉ changˉ htiˍ baˍ uiˍ huˍ veu Yeˍsuˆ na ya myangˉ naeˉ uiˉ baˍ aˍ. 16Ang suingˉ Yeˍsuˆ nawˍ, buingˍ htaˍ veu ca yao lungˍ luiˍ laeˍ naeˍ hingˉ nyamˍ veu, kaˍ haengˍ nae haoˉ naeˉ uiˉ ang tangˍ na ya kyaˍ naeˍ yaˇ. Ningˉ htaˍ veu muiˉ, buingˍ htaˍ naiˍ htangˍ ang huiˍ htiˍ hu beu ang tangˍ nae Hpaˍcaoˍ beu taˍ boˉ hkeu naeˉ ang tangˍ muiˍ buingˉ laˉ naeˉ yaˇ. Haeˉ mae beu, Hkrit hkaoˍ veu siˉ peunˉ jiˉ changˉ hingˉ uiˉ kaˉ huˍ veu teˍ laˉ laeˍ naeˍ yaˇ. 17Hingˉ nawngˍ veu, a sak teˍ yaˍ suing ngaeˉ gu uiˉ aˍ, buingˍ htaˍ veu Ang suingˉ Yeˍsuˆ na myangˉ lang naeˉ uiˉ saˍ laiˍ, changˉ hingˉ uiˉ kawngˉ htuˍ yaˍ laˉ mae buingˍ hkaiˍ ca naeˉ veu gu na chi ta laeˍ laˍ naeˍ yaˇ. Haeˉ mae yao, Ang suingˉ Yeˍsuˆ kawngˉ gu htuˍ yaˍ laˉ mae ya ca naeˉ uiˉ yaˇ. 18Ningˉ pa nae, nawng nuing ba buiˍ hkiˍ naeˍ uiˉ saˍ laiˍ, ang tangˍ ningˍ uiˉ na hkai lang ga yao, htiˍ hu nae htiˍ hu kaˍ piˍ htaengˍ lang voˍ.

Currently Selected:

1 Hteˉsaˍlawˉniˆ 4: pyy

Highlight

Copy