1 Hteˉsaˍlawˉniˆ 3
3
Pawˉluˆ Tiˉmoˉseˍ na poiˉ ngangˉ jiˉ
1Haeˉ mae yao, nawng beu awˍ lawng gu baˍ ya kyaˍ baˍ ya bae nae pa baˍ otˍ taw nae beu, Siˉlaˍnuˆ gaˉ yetˍ Aˍhtenˍ vengˍ hkaoˍ veu cangˉ saˍ naˇ nae kuitˆ chae laeˍ yaeˍ. 2-3Gaˉ yetˍ beu yaˍ changˍ mawngˉ namˉ kanˉ vaˍ changˍ Tiˉmoˉseˍ na nawng kawngˉ saˍ luiˍ laˍ yaeˍ. Yaˇ, Hkrit beu mawnˍ pyawˉ naeˉ uiˉ ang buinˉ tangˍ maˍ naeˍ mangˉ Hpaˍcaoˍ beu yaˍ cenˍ mangˍ yaˇ. Tuk naeˉ hpan naeˉ ningˉ uiˉ ceuˉ na nawng ya hkamˉ yao muiˉ, nawng nuing ba yiˍ naenˉ naeˉ uiˉ na baˍ upˍ, yumˉ naeˉ saˉ naeˉ hkaoˉ veu nawng maenˍ nae ca naenˉ yao kaˍ piˍ naeˍ uiˉ saˍ laiˍ na baˍ upˍ, gu yang na sa luiˍ laˍ yaeˍ yaˇ. Tuk naeˉ hpan naeˉ ningˉ uiˉ na gu ya hkamˉ naeˉ yaˇ nae nawng ang bae yaˇ. 4Aˉ mae yao nae baoˉ vaˍ, tuk naeˉ hpan naeˉ ningˉ na, gu ya hkamˉ naeˉ yaˇ nae gu nawng kawngˉ ca beu ciˍ saˍ byaˇ. Ciˍ saˍ jiˍ lawˉ hpeuˍ laˉ naeˉ na muiˉ nawng ang bae yaˇ. 5Ningˉ pa nae, ga baˍ otˍ taw nae beu, nawng aˉ mae yumˉ yao ca naeˉ na gu ya bae naeˉ uiˉ saˍ laiˍ, Tiˉmoˉseˍ na gu sa luiˍ laˍ yaeˍ yaˇ. Saˍtanˍ nawng na hpawngˍ laˍ yao, gu kanˉ yapˆ jiˉ hingˉ na ang aeˍ nae hpeuˍ laˉ vaˉ na ga kuitˆ hkae laeˍ yao ang ca yaˇ.
6Caˇ, ya muiˉ Tiˉmoˉseˍ muiˍ hkeuˉ lui laeˍ yao, nawng yumˉ naeˉ uiˉ ang ceuˉ hingˉ ngaˍ hak naeˉ paenˉ naeˉ uiˉ awˍ lawng, mawnˍ pyawˉ naeˉ uiˉ huiˍ sutˆ nae uiˉ ang tangˍ gu na upˍ kyaˍ laˍ byaˇ. Nawng aˉ mae beu muiˉ gu na kuitˆ puiˉ laˍ yao, gu nawng na myangˉ lang siˉ naeˉ lawˉ, nawng muiˉ gu na myangˉ laˍ siˍ naeˉ uiˉ awˍ lawng na muiˉ, Tiˉmoˉseˍ upˍ kyaˍ laˍ byaˇ. 7Yaˍ changˍ mawngˉ namˉ yawng veuˉ, gu kuitˆ manˍ laeˍ jiˍ nae tuk naeˉ hpan naeˉ ku ceuˉ ceuˉ na ya hkamˉ yao muiˉ, nawng Yeˍsuˆ na yumˉ naeˉ hingˉ yiˍ naenˉ naeˉ pa nae nuing ba buiˍ naeˍ na gu ya naeˉ yaˇ. 8Aˉ mae yao nae baoˉ vaˍ, Ang suingˉ Yeˍsuˆ hkaoˉ veu nawng yiˍ naenˉ yao ca baoˉ vaˍ, ya muiˉ aˉ sak teˍ yaˍ bongˍ ang laˉ yaˇ. 9Nawng pa nae gu beu Hpaˍcaoˍ beu tawngˍ naˍ veu gu mawnˍ pyawˉ naeˉ uiˉ ang byaˍ ang ca yaˇ. Mawnˍ pyawˉ naeˉ uiˉ ang ceuˉ hkaˉ hko laˉ hko na gu kuitˆ ngangˉ laeˍ beu, nawng saˍ laiˍ Hpaˍcaoˍ na ang byaˍ chiˍ mawng naˇ. 10Gu nawng na ya myangˉ laeˍ lang yao, nawng yumˉ yao baˍ puing ngangˉ suing nae uiˉ ang ceuˉ puing laˉ naeˉ uiˉ saˍ laiˍ, cu hkiˍ cu nuing gu kaˍ yuˉ taw laeˍ nae ang buinˉ paˉ yao cangˉ ngaeˉ yaˇ.
11Nawng kawngˉ gu ya lui taw naeˉ uiˉ saˍ laiˍ, gu beu A vangˉ Hpaˍcaoˍ maˇ gu beu Ang suingˉ Yeˍsuˆ gu saˍ laiˍ kaˉ ba haenˍ htaˍ laˍ biˍ vo. 12Gu nawng na hak laˍ naeˍ lawˉ, nawng muiˉ htiˍ hu nae htiˍ hu hak lang naeˉ na baˍ upˍ, changˉ hkaˉ hko laˉ hko na hak naeˉ na baˍ upˍ, nawng hkaoˉ veu huiˍ laˉ byaˍ laˉ naeˉ uiˉ saˍ laiˍ, Ang suingˉ Yeˍsuˆ taeng laˍ biˍ vo. 13Gu beu Ang suingˉ Yeˍsuˆ nawˍ, yang beu changˉ ang seungˍ sangˉ hkaˉ hko laˉ hko kawngˉ lui laeˍ beu, gu beu Ang vangˉ Hpaˍcaoˍ beu tawngˍ naˍ veu nawng beu nuing ba seungˍ sangˉ naeˉ hkaoˉ veu naˍ hokˍ na chiˉ naeˉ uiˉ baˍ ya ca naeˉ uiˉ saˍ laiˍ, Yeˍsuˆ nawng beu nuing ba na yiˍ naenˉ laˉ biˍ vo.
Currently Selected:
1 Hteˉsaˍlawˉniˆ 3: pyy
Highlight
Share
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc.
