1 Hteˉsaˍlawˉniˆ 2

Hteˉsaˍlawˉniˆ vengˍ hkaoˍ veu Pawˉluˆ kanˉ vaˍ jiˍ awˍ lawng

1Yaˍ changˍ mawngˉ namˉ yawng veuˉ, gu nawng kawngˉ lui jiˉ ningˉ ngaˍ, ang aeˍ nae hpeuˍ naeˍ uiˉ baˍ aˍ nae nawng ang bae yaˇ. 2Nawng bae jiˉ lawˉ, Hpiˉliˉpiˆ vengˍ hkaoˍ veu tuk naeˉ hpan naeˉ uiˉ nae baˍ saˍ baˍ nyamˍ nae ha laˍ naeˍ na gu ya hkamˉ buˉ byaˇ. Caˇ, nawng na Hpaˍcaoˍ beu mawnˍ pyawˉ naeˉ uiˉ ang buinˉ tangˍ maˍ laˍ beu, ya haenˉ laeˍ naeˍ uiˉ ang byaˍ ca yao muiˉ, gu beu Hpaˍcaoˍ mangˍ pa nae gu nuing ba hatˆ yao maˍ laˍ naeˍ yaˇ. 3Gu aˍ vaˍ si kuitˆ si jiˉ na baˍ upˍ, baˍ seungˍ baˍ sangˍ nae hkaoˉ veu na baˍ upˍ, htiˍ kaeˍ kaeˍ naeˍ hkaoˉ veu na baˍ upˍ, nawng na kaˍ piˍ htaengˍ laˍ naeˍ baˍ aˍ. Caˇ, mawnˍ pyawˉ naeˉ ang buingˉ tangˍ na yumˉ naeˉ uiˉ saˍ laiˍ hpeuˍ naeˍ yaˇ. 4Mawnˍ pyawˉ naeˉ uiˉ ang buinˉ tangˍ maˍ naeˍ uiˉ saˍ laiˍ Hpaˍcaoˍ gu na nuing ba buiˍ yao piˉ vaˍ laˍ jiˍ lawˉ naˇ gu maˍ naeˍ. Changˉ nuing ba buiˍ naeˍ uiˉ saˍ laiˍ gu maˍ naeˍ baˍ aˍ. Gu beu nuing ba na camˍ laˍ naeˍ yumˉ suingˉ mangˉ Hpaˍcaoˍ nuing ba buiˍ naeˍ uiˉ saˍ laiˍ gu maˍ naeˍ yaˇ. 5Aˉ mae yao nae baoˉ vaˍ, nawng bae myang jiˉ lawˉ, hao nuing ba veu capˆ naeˉ uiˉ saˍ laiˍ gu hao na chiˍ mawng naeˉ baˍ aˍ. Hao keungˍ hao kawˉ na gu seu lai yao gu maˍ naeˍ uiˉ muiˉ baˍ aˍ nae Hpaˍcaoˍ saˉ hkiˉ hkamˉ yao ang kaˍ yaˇ. 6-7Gu aˍ Hkrit beu naiˍ htangˍ uiˍ hpeuˍ yao, nawng htaˍ veu laˍ htiˍ na caiˍ kaˍ yao muiˉ, nawng kawngˉ na baˍ upˍ, aw htaˍ veu changˉ na baˍ upˍ, changˉ ang yaˍ uiˍ kawngˉ baˍ upˍ, chiˍ mawng naeˉ ang tangˍ ya naeˉ uiˉ saˍ laiˍ gu baˍ saˍ. Ang muing htiˍ hu maˇ, yang beu ang yaˍ htiˍ baˍ uiˍ na hak sa naeˉ lawˉ, gu nawng kawngˉ nuing ba dawˍ naeˍ hkaoˉ veu ca naeˉ yaˇ. 8Hingˉ pa nae, gu nawng na ang hak laˍ nae yao, Hpaˍcaoˍ beu mawnˍ pyawˉ naeˉ ang buinˉ tangˍ hingˍ htiˍ yaˍ nae piˍ laˍ naeˍ uiˉ baˍ aˍ. Gu beu a sak ningˉ muiˉ nawng na piˍ laˍ yao ang pawngˍ laˍ siˍ maˉ manˉ yaˇ. Aˉ mae yao nae baoˉ vaˍ, nawng ngaˍ gu hak ngaeˉ sutˆ nae uiˉ changˉ hpeuˍ laˉ byaˇ.

9Yaˍ changˍ mawngˉ namˉ yawng veuˉ, gu kanˉ vaˍ naeˍ ningˉ aˉ mawk yapˆ naeˉ na nawng ang kuitˆ puiˉ laeˍ yaˇ. Gu nawng na Hpaˍcaoˍ beu mawnˍ pyawˉ naeˉ uiˉ ang buinˉ tangˍ maˍ laˍ beu, nawng htiˍ hu nae muiˉ baˍ ya yapˆ nae uiˉ saˍ laiˍ, gu muˍ hkiˍ nuing kawngˉ kanˉ vaˍ yao cangˉ ngaeˉ yaˇ. 10Nawng Hkritˆ yanˍ uiˍ na gu ha laˍ jiˍ ningˉ ngaˍ, ang seungˍ ang sangˉ, ang sui ang pawng nae naˍ hokˍ chiˉ kyaˉ baˍ ca laˇ nae, nawng muiˉ Hpaˍcaoˍ muiˍ saˉ hkiˉ hkamˉ yao ang kaˍ yaˇ. 11Nawng bae jiˉ lawˉ, ang vangˉ htiˍ hu maˇ, aˍ sangˍ yang beu ang yaˍ htiˍ baˍ uiˍ na pawngˉ naeˉ lawˉ, gu nawng kaˉ hko laˉ hko na pawngˉ laˍ naeˍ yaˇ. 12Hpaˍcaoˍ nuing ba capˆ naeˉ laˉ mawk nae vaˍ gao nae nawng na paˉ laˍ naeˍ yaˇ. Yang beu ang meungˉ nae yang beu mun hpungˉ hkaoˉ veu awngˉ lae naeˉ uiˉ saˍ laiˍ, yang nawng na haoˉ nga laˍ byaˇ. 13Nawng ngaˍ, gu maˍ laˍ jiˍ Hpaˍcaoˍ beu ang tangˍ na ya kyaˍ beu, hap yuˉ naeˉ pa nae, Hpaˍcaoˍ na gu aˉ mae beu muiˉ chiˍ mawng naˇ. Ang tangˍ hingˍ na changˉ beu ang tangˍ laˍ mae nawng sawnˉ yao hap yuˉ naeˉ baˍ aˍ. Hpaˍcaoˍ beu ang tangˍ maˍ manˉ nae nawng sawnˉ yao hap yuˉ naeˉ yaˇ. Ang tangˍ hingˍ nga nawng Hkritˆ yanˍ htiˍ baˍ uiˍ kawngˉ kanˉ vaˍ yao cangˉ ngaeˉ yaˇ. 14Yaˍ changˍ mawngˉ namˉ yawng veuˉ, Yuˉdaˆ ang meungˉ veu ca naeˉ Yeˍsuˆ Hkrit hkaoˍ veu ca naeˉ Hpaˍcaoˍ beu Hkritˆ yanˍ ang muˉ htiˍ baˍ uiˍ ya tuk ya hpan naeˉ lawˉ nawng muiˉ ya tuk ya hpan naeˉ yaˇ. Yawng ngaˍ Yuˉdaˆ changˉ uiˉ beu laˍ puˍ hkaoˍ veu tuk naeˉ hpan naeˉ na ya hkamˉ beu lawˉ, nawng muiˉ nawng beu ang meungˉ hkaoˉ veu ca naeˉ changˉ htiˍ baˍ uiˍ beu laˍ puˍ hkaoˍ veu tuk naeˉ hpan naeˉ na ya hkamˉ naeˉ yaˇ. 15Yuˉdaˆ changˉ hingˉ uiˉ aˍ, Ang suingˉ Yeˍsuˆ na muiˉ, Hpaˍcaoˍ beu pa rawˉ hpaet htiˍ baˍ uiˍ na muiˉ saeˍ yao, gu na muiˉ hkeˍ taw langˍ ngaeˉ. Yawng ngaˍ Hpaˍcaoˍ nuing ba capˆ naeˉ uiˉ baˍ vaˍ nae htaˍ veu muiˉ, changˉ hkaˉ hko laˉ hko uiˉ beu lanˍ suˍ hpeuˍ naeˍ yaˇ. 16Yuˉdaˆ changˉ baˍ aˍ nae changˉ uiˉ htaiˍ awkˍ naeˍ uiˉ na ya naeˉ uiˉ saˍ laiˍ gu maˍ biˍ naeˍ na Yuˉdaˆ changˉ hingˉ uiˉ haenˉ tap laˍ naeˍ. Yawng ningˉ mae ha naeˉ ningˉ ngaˍ, aˍ sangˍ yang beu naˍ hokˍ puing laˉ naeˉ uiˉ saˍ laiˍ vaˍ yao ca naeˉ yaˇ. Hingˉ pa nae, Hpaˍcaoˍ nuing ba yinˍ naeˍ uiˉ htiˍ ceuˍ yawng htaˍ veu htiˍ puing hkeu luing byaˇ.

Pawˉluˆ yawng kawngˉ baˍ ya aeˉ nae uiˉ awˍ lawng

17Yaˍ changˍ mawngˉ namˉ yawng veuˉ, tiˍ hkaoˍ htiˍ nyamˍ gu nawng na ya hpakˍ lang naeˉ pa nae, gu nawng na myangˉ siˉ laˍ yao kaˍ haenˍ vaˍ yao cangˉ ngaeˉ yaˇ. Ang to ningˉ nawng na ya hpakˍ lang yao muiˉ, gu beu nuing ba ningˉ nawng na baˍ hpakˍ lang. 18Hingˉ pa nae ga Pawˉluˆ nawˍ, nawng kawngˉ ang byaˍ cangˍ laˉ siˉ naeˉ. Caˇ, Saˍtanˍ gu na haenˉ tap laˍ naeˍ. 19Gu beu Ang suingˉ Yeˍsuˆ Hkrit lui laeˍ beu, yang tawngˍ naˍ veu gu beu kuitˆ yao chiˉ jiˉ hingˉ, mawnˍ saˉ naeˉ uiˉ nae mun hpungˉ ca naeˉ uiˉ hkamˍ tiˍ chawngˍ hingˉ ngaˍ ba ceuˇ. Nawng baˍ aˍ la. 20Aˉ mae yao nae baoˉ vaˍ, nawng ngaˍ gu beu mun hpungˉ ya kyaˉ uiˉ nae gu beu mawnˍ pyawˉ kyaˉ uiˉ hpeuˍ naeˍ yaˇ.

Currently Selected:

1 Hteˉsaˍlawˉniˆ 2: pyy

Highlight

Copy