1 Hteˉsaˍlawˉniˆ 1

Ang changˍ uiˍ na kuitˆ puiˉ naeˉ uiˉ ang tangˍ

1Pawˉluˆ, Siˉlaˍnuˆ nae Tiˉmoˉseˍ yawng ngaˍ, gu beu A vangˉ Hpaˍcaoˍ nae Ang suingˉ Yeˍsuˆ Hkrit hkaoˍ veu ca naeˉ Hteˉsaˍlawˉniˆ Hkritˆ yanˍ ang muˉ na ang laiˍ ningˍ htiˍ pap taemˉ laˍ yaeˍ yaˇ. Ang buinˉ lapˍ sawngˍ nae mawnˍ pyawˉ naeˉ uiˉ nawng hkaoˉ veu ca bu.

Yawng ngaˍ hao saˍ laiˍ henˍ yaˍ cangˉ yaˍ kyaˍ hpeuˍ jiˍ

2Nawng hkaˉ hko laˉ hko saˍ laiˍ gu aˉ mae beu muiˉ Hpaˍcaoˍ na ang buinˉ huiˍ yao, gu ang buinˉ paˉ beu nawng saˍ laiˍ kuitˆ hkeu laˍ naeˍ yaˇ. 3Nawng yumˉ naeˉ pa nae kanˉ vaˍ yao na baˍ upˍ, hak naeˉ paengˉ naeˉ pa nae kanˉ yapˆ yao na baˍ upˍ, gu beu Ang suingˉ Yeˍsuˆ Hkrit na kuitˆ puiˉ yao yeunˉ hkamˍ naeˍ na baˍ upˍ, gu beu A vangˉ Hpaˍcaoˍ tawngˍ naˍ veu, ningˉ uiˉ kanˉ na gu aˉ mae beu muiˉ kuitˆ puiˉ yao ang ca yaˇ. 4Hpaˍcaoˍ hak naeˉ yaˍ changˍ mawngˉ namˉ yawng veuˉ, Hpaˍcaoˍ nawng na cheˉ yuˉ yao chiˉ laˍ jiˍ nae gu ang bae yaˇ. 5Aˉ mae yao nae baoˉ vaˍ, gu maˍ yao ca naeˉ mawnˍ pyawˉ naeˉ ang buinˉ tangˍ ningˉ ngaˍ, ciˍ tangˍ ning hpeuˍ laˉ yao nawng kawngˉ hkeu lui naeˉ baˍ aˍ. Tanˉ hkoˉ hkaoˉ veu na baˍ upˍ, Ang hkawˍ laˉ ang seungˍ sangˉ veu na baˍ upˍ, yumˉ naeˉ uiˉ nuing ba hkaoˉ veu na baˍ upˍ, nawng kawngˉ hkeu lui naeˉ yaˇ. Gu nawng kawngˉ ca beu, nawng saˍ laiˍ ang buinˉ ca naeˉ uiˉ saˍ laiˍ gu aˉ mae aˉ sak teˍ yaˍ yao ca naeˉ na nawng bae yaˇ. 6Nawng ngaˍ gu na muiˉ Ang suingˉ Yeˍsuˆ na muiˉ henˍ yaˍ yao vaˍ naeˍ yaˇ. Aˉ mae yao nae baoˉ vaˍ, ang buinˉ tangˍ ningˍ pa nae nawng ya tuk ya hpan yao muiˉ, Ang hkawˍ laˉ ang seungˍ sangˉ piˍ laˍ naeˍ mawnˍ pyawˉ naeˉ uiˉ htiˍ ceuˍ hkaoˍ veu ang buinˉ tangˍ na nawng hap yuˉ naeˉ yaˇ. 7Ningˉ pa nae, nawng ngaˍ, Maˍkeˍdawˉniˆ ang meungˉ nae Aˍhkaˍyaˆ ang meungˉ hkaoˉ veu ca naeˉ yumˉ naeˉ uiˉ changˉ hkaˉ hko laˉ hko saˍ laiˍ henˍ yaˍ cangˉ yaˍ nae uiˉ changˉ hpeuˍ laˉ jiˉ yaˇ. 8Aˉ mae yao nae baoˉ vaˍ, nawng pa nae Ang suingˉ Yeˍsuˆ beu ang tangˍ hingˍ nga, Maˍkeˍdawˉniˆ ang meungˉ nae Aˍhkaˍyaˆ ang meungˉ hkaoˉ veu buingˉ yao aengˉ jiˉ hingˉ naeˍ nae baˍ aˍ. Nawng Hpaˍcaoˍ na yumˉ jiˉ hingˉ htiˍ tawngˍ peunˉ yao htiˍ tawngˍ buingˉ nga aengˉ jiˉ pa nae, hingˉ awˍ lawng gu htiˍ ceuˍ ciˍ seuˍ baˍ ca. 9Aˉ mae yao nae baoˉ vaˍ, nawng ngaˍ gu na mawnˍ mawnˍ pyawˉ pyawˉ hap yuˉ laˍ jiˍ awˍ lawng hao ciˍ lang yao ca ngaeˉ yaˇ. Ningˉ htaˍ veu muiˉ, teˍ yaˍ nae ningˉ ngaˍ maˉ manˉ nae uiˉ Hpaˍcaoˍ na koˉ koiˍ naeˍ uiˉ saˍ laiˍ, awˍ hang sangˉ htuˆ na nawng paek nga saˍ yao, Hpaˍcaoˍ kawngˉ hpap yao laˉ laeˍ naeˍ awˍ lawng na muiˉ, hao ciˍ lang yao cangˉ ngaeˉ yaˇ. 10Siˉ kyaˉ veu Hpaˍcaoˍ piˉ teˍ laˉ laeˍ naeˍ mangˉ yang beu Ang yaˍ buingˍ htaˍ veu lungˍ luiˍ naeˍ mangˉ na nawng hawˍ yao ca naeˉ na muiˉ, hao hkai lang yao caˉ ngaeˉ jaˇ. Ang yaˍ ang pawnˍ hiˍ maˇ, hpeuˍ laˉ naeˉ uiˉ nuing ba yinˍ naeˍ uiˉ htiˍ ceuˍ hkaoˍ veu gu na piˉ caeˉ laˍ naeˍ mangˉ Yeˍsuˆ Hkrit mangˍ yaˇ.

Currently Selected:

1 Hteˉsaˍlawˉniˆ 1: pyy

Highlight

Copy