PSALMEN Bindu 18
Bindu 18
Doding Tarima Kasih ni Raja Daud halani Hamonanganni
1Bani pambobai koor. Humbani juakjuak ni Jahowa, ai ma si Daud,
na manluarhon hata ni doding on bani Jahowa, bani panorang ipaluah
Jahowa ia humbani tangan ni munsuhni pakon humbani tangan ni si Saul,
2nini, “Holong tumang do uhurhu bamu Jahowa, hagogohonku.
3Jahowa, dolog batu bangku, batar-batarhu, na paluahkon ahu,
Naibatangku, batu gingging anjaha parlingodanku,
gantarhu, tanduk haluahonku pakon benteng bangku. (Ps. 71:3; 1 Mus. 15:1; 5 Mus 32:4; 33:17; 1 Sam. 2:1; Jes. 31:16)
4“Pinuji ma Jahowa!” ningku mandilohon,
ai ipaluah do ahu humbani munsuhku. (Ps. 146:2)
5Iinggoti gilumbang ni hamatean do ahu,
anjaha bah hamatean manonggoti ahu; (Ps. 55:5; 116:3; Jon. 2:6; Lah. 2:24)
6isangkut tali ni nagori toruh do ahu,
siding ni hamatean tagang dompak ahu. (Pod. 14:27)
7Ibagas hasosakankai hudilo ma Jahowa,
dilo-dilo ma ahu bani Naibatangku.
Gabe itangihon do sorangku humbani rumah-Ni,
anjaha das do doruhkai hu pinggol-Ni. (Ps. 11:4; Jon. 2:3)
8Munjei anjaha dugur ma tanoh on,
onjolan ni dolog pe murdug ma, munjei halani ringis-Ni. (Ps. 68:9; 77:16-20; Jes. 24:18)
9Maripul do timus humbani igung-Ni,
haluar apuy na mangankon humbani pamangan-Ni,
narnar na gara marjimbur hun Bani. (2 Mus. 19:18; Ps. 97:2-4)
10Iondun ma langit, turun ma Ia,
lotir do i toruh ni nahei-Ni. (Ps. 144:5)
11Mangajak herub do Ia,
anjaha habang mayap-ayap bani habong ni logou. (Ps. 99:1; Hes. 1:4-28)
12Na golap do ibahen manrungkub-Si,
lampolampo-Ni inggot ni bah na mamirong ampa hombun na hapal. (5 Mus 4:11; Jes. 50:3; Job 36:29)
13Humbani sinalsal na i lobei-Ni luar do hombun-Ni,
ambolas pakon gara ni apuy.
14Marhata ma longgur ibahen Jahowa i langit,
ipamaling Na Timbul in ma sora-Ni.
15Isiorhon ma panah-Ni laho pamerap sidea,
ibahen do mardejep-dejep hilap laho mardakdak sidea. (1 Sam. 7:10-17; Ps. 144:6)
16Jadi taridah ma holbung ni bah,
mulgap ma onjolan ni dunia on,
halani pangasupimu Jahowa,
halani pangombus ni hosah ni igung-Mu.
17Idurdurhon do tangan-Ni hun babou manangkap ahu,
idokdok do ahu humbani bah banggal. (Ps. 32:6; 69:2, 3; 144:7)
18Ipaluah do ahu humbani munsuhku na gogoh,
humbani halak na mandondoni ahu, sigogohan humbangku. (Ps. 69:15)
19Idorab sidea do ahu bani ari hasunsahanku,
tapi Jahowa do hatundalanku.
20Itogu do ahu bani ianan na lumbang,
ipaluah do ahu, ai marosuh do Ia bangku. (ay. 37; Ps. 31:9; 91:15)
21Ibahen Jahowa do hu bangku romban hubani hapintoronku,
romban hubani haborsihon ni tanganku ipasuang hu bangku, (Job 22:30)
22ai huihutkon do dalan ni Jahowa,
seng dong manjahati ahu, marbalik humbani Naibatangku.
23Sai tong do i lobei ni matangku sagala aturan-Ni,
anjaha seng hupadaoh titah-Ni humbangku. (Ps. 119:167; 5 Mus 6:2; 7:11; 8:11; 17:19)
24Seng dong sihataon bangku i lobei-Ni,
hujaga do diringku dompak hajahaton. (Ps. 15:2; 5 Mus 18:13; Pod. 20:9)
25Halani ai ibalos Jahowa do hu bangku romban hubani hapintoronku,
romban hubani haborsihon ni tanganku i lobei-Ni. (ay. 21)
26Hubani na bujur uhur, bujur do Ham,
hubani halak parpintor, pintor do Ham.
27Bani halak paruhur na pansing ipatidak Ham do hapansingon-Mu,
tapi marah do uhur-Mu dompak halak pargeduk.
28Ipaluah Ham do bangsa na madoyuk,
tapi ipatoruh Ham do mata na toal. (Job 22:29; Pod. 6:17; 1 Ptr. 5:5)
29Ai Ham do, alo Jahowa, mambahen palitangku marsinalsal;
Jahowa Naibatangku do palihar hagolapanku. (1 Raj 11:36; 15:4; 2 Raj 8:19; Job 29:3)
30Marhasoman Ham tardorab ahu do hulanan ni bala,
mangunsagahkon Naibatangku tarlumpat ahu do tembok. (Ps. 60:14)
31Gokan dear do dalan ni Naibata,
pitah do hata ni Naibata,
Ia do gantar ni ganup halak,
na marlingod hu Bani. (ay. 13; Ps. 12:17; 19:9; 5 Mus 32:4; Pod. 30:5)
32Ai ise ma Naibata sobali Jahowa, ise batar-batarta sobali Naibatanta? (1 Sam. 2:2)
33Naibata do na manggonditkon hagogohon bangku,
anjaha ipatorsa do dalanku.
34Ia do mambahen naheihu songon nahei ni ursa boru-boru,
anjaha ipajongjong do ahu i atas buntu-buntu. (5 Mus 32:13; 33:29; Jes. 58:14)
35Ia do mangajari tanganku marmunsuh,
gabe pandei tanganku manintak sior tombaga. (Ps. 144:1)
36Ibere Ham do bangku gantar ni hatuahon-Mu,
itungkoli tangan siamun-Mu do ahu,
anjaha halayakon-Mu pabanggal ahu. (2 Sam 22:36)
37Ipalumbang Ham do ianan panlangkahanku,
anjaha seng tarsimpok mata ni ari ni naheihu. (Ps. 31:9; Job 18:7; Pod. 14:12)
38Hupardakdak do munsuhku ronsi dapot sidea,
seng mulak ahu paima rasei sidea.
39Huropuki do sidea, gabe seng tarbahensi be jongjong,
radag do sidea i toruh ni naheihu.
40Igonditkon Ham do bangku hagogohon laho marporang,
ipatunduk Ham do imbangku hu toruhku.
41Ipaundur Ham do munsuhku i lobeihu,
anjaha siap do hubahen sagala na mandomdomi ahu. (2 Mus. 23:27)
42Dilo-dilo sidea, tapi seng dong na paluahkon,
hubani Jahowa homa, tapi seng itangihon sidea. (Job 27:9; Pod. 1:28)
43Jadi hulumati ma sidea songon orbuk sihabangkonon ni logou,
hulotloti ma sidea songon hubang i tongah dalan. (2 Raj 13:7)
44Ipaluah Ham do ahu humbani paringoran ni bangsa-bangsa,
anjaha ipabangkit Ham do ahu gabe kopala ni bangsa-bangsa,
bangsa na so hutanda pe marsombah do hu bangku; (2 Sam 5:8)
45ibogeihonsi pasal ahu, mintor itangihon do ahu,
halak silegan pe tunduk do sidea papuji-puji ahu.
46Mandatei do halak silegan,
hitir-hitir do sidea luar humbani bentengni.
47Manggoluh do Jahowa, sai tarpuji ma batar-batarhin,
sai timbul ma Naibata ni hatuahonku, (5 Mus 32:40)
48Naibata sibere pambalason hu bangku,
anjaha na patundukkon bangsa-bangsa bangku.
49Na paluahkon ahu humbani munsuhku,
nai ma, na pagijangkon ahu mangimbang sagala na manlawan ahu,
na paluahkon ahu humbani halak sipangodoh-odoh.
50Halani ai pujionku do Ham Jahowa i tongah-tongah ni sagala bangsa,
anjaha dodingkononku do goran-Mu. (Rom 15:9)
51Ia do sibere hatuahon banggal bani raja-Ni,
anjaha sibere idop ni uhur bani na mininakan-Ni,
ai ma hubani si Daud ampa hubani ginomparni ronsi sadokah ni dokahni.” (Ps. 89:29, 30; 2 Sam 7:12-16)
Currently Selected:
PSALMEN Bindu 18: BTS
Highlight
Share
Copy
Want to have your highlights saved across all your devices? Sign up or sign in
Bibel, Simalungun Bible (revised ed.) © Indonesian Bible Society, 2007.