JESAYA Bindu 11
Bindu 11
Raja Parpintor na humbani Ginompar ni si Daud ampa Harajaon Hadameion ai
1 Dob ai mandarat ma sada tunas humbani tutuho ni si Isai,
anjaha marbuah sada tumbor na roh humbani uratni. (bd. 4:2; 53:2)
2 Sogop ma hubani Tonduy ni Jahowa,
tonduy hauhuron ampa pangarusion,
tonduy panuturion ampa hagogohon,
tonduy habotohon ampa biar bani Jahowa. (bd. 42:1; Mat 12:18; Pangk. 1:4)
3Harosuh ni uhurni ai ma marhabiaran bani Jahowa.
Seng mangihutkon pangidah ni matani ia manguhumi,
anjaha seng mangihutkon pambogei ni pinggolni ia mamutuskon.
4Tapi marhitei hapintoron do uhumanni halak na masombuh,
anjaha marhitei hasintongon do dabuhonni timbangan bani halak na madoyuk i nagori in.
Marhitei simambu ni pamanganni do libasonni halak sipangodoh-odoh,
anjaha marhitei hosah ni bibirni bunuhonni halak parjahat. (Job 4:9; 2 Tes. 2:8; Ps. 72:4; 12-14; Pangk. 2:16)
5Hapintoron do gondit ni binongeini,
anjaha hasintongan do bonting ni angkulani.
6Jadi rap marianan ma sorigala ampa biribiri,
anjaha manggompang begu i lambung ni hambing;
rap manggagat ma anak ni lombu pakon anak ni singa,
anjaha dakdanak do na marmahan sidea. (bd. 65:25; Hos. 2:20)
7Lombu pakon gipul rap manggagat,
anak ni sidea rap manggompang,
singa mangan poyon-poyon songon lombu.
8Dakdanak na inumon marguro-guro i lambung liang ni ulog darih,
anjaha dakdanak na sirang minum manjukjukkon tanganni hu ruang ni ulog na marbisa. (Pod. 23:32)
9Seng be manjahati atap mangagou be sidea bani
sab dolog-Ku na pansing in,
tongon habotohon pasal Jahowa do manggoki tanoh in,
songon bah na manggoki laut. (Hab. 2:14)
Parsuang ni Israel ampa Panggomgomion ni Sidea bani Bangsa-bangsa.
10Bani ari ai
roh ma pindah-pindah halak si pajuh begu-begu bani urat ni si Isai,
na pinajongjong songon mandera partanda bani bangsa-bangsa,
gabe marmulia ma iananni. (Rom 15:12)
11Bani panorang ai ulakan ni Jahowa ma pagostong tangan-Ni,
laho manobus teba-teba ni bangsa-Ni
na tading ope i Assur, i Masir,
i Patros, i Etiopia, i Elam, i Sinear, i Hamat ampa i pulou-pulou na i laut. (5 Mus 30:1-5)
12Pajongjongon-Ni ma sada mandera partanda bani bangsa si pajuh begu-begu,
anjaha patumpuon-Ni ma sagala na binuang humbani Israel ampa na merap humbani Juda;
ipatumpu do sidea humbani deisa na ompat i tanoh on.
13Jadi maronti ma parsimburuon ni Efraim,
anjaha iboiskon ma na manosak Juda.
Seng be simburu Efraim bani Juda anjaha Juda seng be sosakonni Efraim. (Hes. 37:22)
14Tapi rap ma sidea habang bani raboyon ni halak Palistim dompak hasundutan,
rap do sidea manrampas dompak halak parhapoltakan.
Edom pakon Moab patundukon ni tangan ni sidea do,
anjaha ginompar ni Amon mambalosi bani sidea.
15Anjaha pahorahon ni Jahowa do laut tadur ni Masir,
anjaha ondamkonon-Ni tangan-Ni hu bani Bah Eprat marhitei milas ni hosah-Ni,
anjaha bogbogon-Ni do ai gabe pitu binanga,
gabe boi diparan marsipatu.
16Gabe dong ma dalan na bolon sada bani teba-teba ni bangsa-Ni,
na tading hun Assur,
songon na bani Israel sanggah mandarat sidea
hun tanoh Masir. (2 Mus. 14:21, 22, 29)
Currently Selected:
JESAYA Bindu 11: BTS
Highlight
Share
Copy
Want to have your highlights saved across all your devices? Sign up or sign in
Bibel, Simalungun Bible (revised ed.) © Indonesian Bible Society, 2007.