Titut 1

1Nzuk a̱mi Bulut a̱kwwa Ka̱za ba̱ a̱pfong Yesu Kristi.

Nzuk ba yin tssa, a̱ tom n si brang ba̱nyet ba Ka̱za ka tssa ba ka̱ tyyi ndya mba na ni, n ga ba̱ brak n tyyi i ka̱ryong ka tssup njit a ku zzek ni. 2Ku hyok i breng ndya bu bvwo njit a i sucet cong bai a byyi tyak ni ba. Ka̱za ka di ka bvei diraa ni ba a̱mi a̱ yin dyat ba̱ryat sucet ba a̱ wwon nyyai ndoson, 3ba bu tat ka̱ram ka na̱ sak ni na̱ yrang ba̱ryat nu ba. A̱ n tyyi da̱ mba bvak n ga tyyei kyang a Ka̱za A̱ntyok zasan ka ni n tyyi ni.

4Titut, n na̱ jem mi rot tssup a za mon ni, da̱ni di ka̱won ka̱hwa nzuk ni.

N naai Ka̱za A̱tyyi bu Yesu Kristi A̱ntyok zasan, ba na̱ ryi a̱liheri nu, a̱ na̱ wwon nda.

Pfong Titut ka̱byen Karita

5N yi na̱ wwon Karita a gi jyi nkyang a n yin wi jyi ntyak a ni, i tssa ba̱nekwo a̱bat tssup a kozan ka̱nkrang. Ryok bring nkyang a n yi na̱ tyyei ni ba: 6Dolet a̱nekwo a̱ yet a̱ntyok sang hywak, a̱ byyi a̱mbyring a̱yring, na̱won nu na brak a̱ yet ba̱nyet tssup, a̱ byyi a̱tsatsak shaida, ba ba̱kaat ba ko ba̱nyet wipfong ba. 7Da̱ni di a̱ntyok breng pfong Ka̱za ni dolet na̱ yet a̱ntyok sang hywak. A̱ ryok ya gba ba, ko gwai diryen, ko na̱ rot ka̱nu a nkwwa ba, ko cat jyi, a̱ ryok cat a̱ka̱tuk ka̱ssok ba. 8A̱ ni gwai ba̱yecen, a̱ cat kyang a yet i. A̱ bvwo breng diccu nu nta̱mak ba̱ a̱zizrak ka̱cyet a̱ bo ya tot. 9Dolet na̱ breng zzek ka̱ryong a kpunkpam, da̱ni ba yin kpo zzek ni. A̱mi na̱ nin brang ba̱nyet ba di zzek ka̱ryong a, a̱ si bo tyyei ba̱nyet ba a̱ kpo rak ni ka̱ywap mba ka.

10Rot ba̱yanyet ba̱gingang a̱n shyi a̱ kwot a̱ hywop a̱ bo shyi i raai ba̱yanyet di ba̱ryat nwun, tun ba ba̱nyet ba a̱ brak nyyai i tssup ba̱nyet Yahuda na ni ba. 11Dolet a ba̱ muk na̱nu mba na, rot ba hwwei na̱sa ba̱gingang bu taka̱i zzek a di ku myim ni ba. Ba kyang yaan ban cat ba, seko ba ga shya bu krum i ryen diraa. 12A̱ntyok cyang a̱yaan mba a̱ ka̱n hywa, “Karitawa ba̱jyem ba̱nyet diraa a̱mi, ba̱ka̱tuk nyam ka̱yit, bu ba̱nyet ndan, bu ba̱nyet ka̱hwa a̱dyying.” 13Kyang a na̱ hywa ni brak i yet ka̱ryong, rot a̱mi se a ba̱ ta̱twang ka̱ta̱hrung, ba ga jyi tssup mba na ku tyyi a̱zizrak, 14ba ga pfwi tssup tashikum ba̱nyet Yahuda nu, bu truwang ba̱neywu ji yet zzek ba̱nyet a a̱ ka̱n dak ka̱ryong ka ni. 15Kozan nkyang yet a̱zizrak di ba̱nyet ba ndya mba na yet a̱zizrak ni; ma ba kyang a ryi zizrak di ba̱nyet ba ndya mba na na bwi, di ba tssup ka̱ryong ka ni ba, rot ndya mba na ba̱ a̱huhwa mba nu a̱ ka̱n bwi. 16Ba ya yei ba̱nyet tssup Ka̱za, ma ka̱cyet mba ka a̱ ton. Ba yet kyang tyong, ba̱nyet wipfong, di ba byyi kyang a ba maai yya ku yet ni ba.

Currently Selected:

Titut 1: kaj

Highlight

Copy

Compare