2 Timoti 4
4
1N na̱ kam a̱ta̱ssi Ka̱za bu a̱ta̱ssi Yesu Kristi, a̱tuba nu a̱ ni yya ba̱nyet swat a̱cet bu ba̱nyet ba a̱ ka̱n kwi ni shirya, ka̱ram ka na̱ nin brek a̱ bu sak dityok nu ti ni, 2a yya wa'azi ba̱ryat Ka̱za, i sseng di cet i ba̱ tyyei, ko a byyi ka̱ram ko a byyi ba, i kwwat hankali mba na, i ba̱ tssap, i ba̱ ta̱gbak, i zzek bu hakuri. 3Rot ka̱ram a̱ bai ba̱nyet a̱ ni cat pfong ba̱ryat ka̱ryong ba ba. Ba ni wwon a̱pfo mba na nat i pfong kyang a ba̱ myim ni, a̱ tung ba̱malam ba a̱ ni ba̱ tyyei kyang a a̱pfo mba na seyang a̱ cat pfong ni. 4Ba ni wwon pfong ba̱ryat ka̱ryong ba a̱ tyyi a̱pfo mba na i pfong ninyying nkhang. 5Ma nwan a cam diccu nwan ka̱yat kozan kyang. Sseng di cet i ka̱bvung ka, i yya pfong a myim a̱ntyok wa'azi Ka̱sham Ba̱ryat u ni, bu yya sa̱rei kyang a myim a̱kwwa Ka̱za a̱ yya ni.
6Nzuk, ka̱ram ka ba nin nin sook a̱ n hywuk ka̱bvwa ni a̱ yya. Ka̱ram wwon sucet ka ni a̱ yya. 7N tyong ncyi ji ka̱sak ka n nin maai ni. N ka̱n tyong tyak ka̱gra ka, n breng wrak ka̱ryong nzuk a. 8Naani n pfong rawoni ka̱ryong a ba ni n dyi ni. Nying na Kristi a̱ntyok shirya ka̱ryong na̱ ni n dyi Ka̱tuk iya ni, ba ba̱ nzuk ba̱diyin ba ma sa̱rei ba̱nyet ba a̱ pfong nom ba nu na bu gwai ni.
A̱ngbom ba̱ryat
9Ntyyi ka̱ssi i ba da̱ nzuk ba̱nyying. 10Dimat a̱ tun rya nu a̱ wrak ka̱sa a̱ n tyong a̱ wwon a̱ nat Tasalonika. Karaskat a̱ nat ka̱byen Galatiya, Titut a̱ ma̱n nat ka̱byen Dalmatiya. 11Bu Luka ba̱diyin a̱ bvat a̱ shyi ba̱ nzuk. Yei Markut na̱ ba ba̱ nwan da̱ nzuk, rot a̱ n byyi kpungtun ka̱yat mpfong nzuk ka. 12Tikikut a̱nu ni n tun n tom Afisa. 13Ki a cong bai a n breng a̱lkeba̱ nu bu a̱kpa na n yin bring n wwon ka̱nkrang Taruwasa ka an bvak Karbut ka ni, tun ba a̱kpa ta̱ka̱rda na ba yya da̱ a̱kpa na ni ba.
14Alezanda a̱tuba nu a̱ yet a̱pfu nu ni a̱ n hok hywu ba̱gingang. A̱ ni san zang kyang ji na̱ yya ni di Ka̱za. 15Se a ta̱rwam ba̱ nu, rot a̱ yin dak wa'azi njit u di jyik ni.
16Nom ka̱tsitsrang a n nin sseng a̱ta̱ssi nshirya ni ba a̱yin nu a̱ yin n brang ni, koyan a̱ tyong a̱ n wwon. Ki di Ka̱za a̱ sook ku ba̱ yet a̱ka̱tuk kyang ba, ma ka ba̱ cii. 17Ma A̱gwam Yesu a̱ sseng ba̱ nzuk a̱ n dyi cet rya ka̱sak ka n nin maai n tyyei sa̱rei ba̱ryat nu ba, sa̱rei kpikpit nwap a i hok ni. Nu a̱mi a̱ yi n san ka̱nu zaki. 18Nu a̱mi a̱ bo ni n san di kozan a̱ka̱tuk nkyang u a̱ ni n shya ni, a̱ nat ba̱ nzuk i Dityok Tazwa nu ti. Zi dyep diyrek nu har a̱ba̱da! Amin.
A̱ngbom byet
19N byei ba̱nyet Briska bu Akila bu ba̱nyet a̱gbang Unasifarat. 20Arastat a̱ yen sseng Korinti. N wwon Tarufimat Militut, na̱ ya pfong ba. 21Ntyyi ka̱ssi i ba, za zi ka̱n kpa ka̱byen ba.
Aubulut bu Budat bu Linat bu Kalaudiya bu sa̱rei kpikpit ba̱wumbeyang a a̱ na̱ byei.
22A̱gwam Yesu a̱ swrang ba̱ nwan. A̱liheri nu a̱ swrang bu tswa nyin ji sa̱rei. Amin.
Currently Selected:
2 Timoti 4: kaj
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
