Rom 8

Sucet ka̱yat Tswa Ka̱za

1Shirya ji ba̱nyying yet nyyi ba̱nyet mon diccu ka̱yat Yesu Kristi ba. 2Rot Tswa Ka̱za ji ba bu sucet n mon diccu di Yesu Kristi ni n tun kai wwon a a̱ka̱tukyya bu dikwu. 3Truwang ji yin maai ba di dizizrak ba, rot hali a̱neywu na yet a̱ka̱tuk, ma Ka̱za a̱ ba mi. A̱ka̱tukyya nu a̱ shyi i rwam a̱neywu ni Ka̱za a̱ yin yya shirya i tom a ka tom Ka̱won nka ka ka ba i rwam di nyyi a̱ka̱tuk a̱neywu ni a̱ ga bu za gang bu a̱ka̱tukyya. 4Ka̱za a̱ yin yya a̱mi zi gi yya kyang a Truwang ji zi cat sa̱rei ni, njit ba̱nyet ba Tswa Ka̱za zi breng ni, ba ba̱nyet ba rwam ku breng ni ba. 5Ba̱nyet ba rwam ku breng ni a̱ tyyi ndya mba na i yya kyang a myim ndwam mba na ni; ba̱nyet ba Tswa Ka̱za zi breng ni a̱ ma̱n tyyi ndya mba na i yya kyang a myim Tswa Ka̱za ji ni. 6Ba̱nyet ba Tswa Ka̱za zi breng ni, zang mba ji yet sucet bu myyi rya; ma ba̱nyet ba rwam ku breng ni, zang mba ji yet dikwu; 7ba yet ba̱ra̱ndwan Ka̱za, rot ba tssup truwang Ka̱za ba, ko ba cat ba ni maai ba. 8Ba̱nyet ba rwam ku breng ni a̱ ni maai myim Ka̱za ba.

9Ma nyin yi yet ba̱nyet tssup ndwam ba; ki Tswa Ka̱za shyi ka̱yat ndya nyin ka, yi tssup Tswa Ka̱za ji. A̱yin nu a̱ byyi Tswa Kristi ka̱yat mpfwa nu ni ba a̱ yet a̱nuu ba. 10Ndwam nyin na ni kwi rot a̱ka̱tukyya. Ma ki Yesu a̱ swat ka̱yat ndya nyin tswa nyin ji ni yet a̱cet, rot ba ka̱n jyi swat nyin na bu Ka̱za. 11Ki Tswa Ka̱za ji yin shyek Yesu nyyai yabyen ni shyi a mpfwa nyin, to nu a̱tuba nu a̱ yin shyek Yesu ni a̱ ma̱ ni ya tyyi sucet a ndwam nyin na ni kwi ni rot shyi na Tswa nka ji shyi ka̱yat ndwam nyin ka ni.

12To, ba̱wumbeyang, zi byyi pfong, ma ba nkpa yet zi tssup kyang a ndwam njit a na cat i ba. 13Rot ki yi tssup ndwam nyin na yi ni kwi; ma ki yi jing a̱ka̱tukyya nyin nu rot Tswa Ka̱za ji ya brang, yi ni kaat. 14Rot ba̱nyet ba Tswa Ka̱za zi kwak ka̱son mba ni, mba a̱mi a̱ yet na̱won Ka̱za na. 15Rot yi san tswa dikwwa ba, ba̱lle yi bu npfong ka̱wun ba, ma yi san Tswa yet na̱won Ka̱za, nji za jyet cet a zi nin yei Ka̱za “A̱tyyi njit” ni. 16Tswa Ka̱za ji na si mon bu njiit ji i za tyyi zi hok zi yet na̱won Ka̱za. 17Da̱ni di zin yet na̱won Ka̱za ni zi ni shya ka̱nu-a̱tan nu na̱ wwat ba̱nyet nu ba ni, i bun byyi a nkyang a ka sak a̱ ni wrak Yesu ni. Ki zi sswa ka̱bvung ka bu Yesu zi bu ni shya digba̱dang ba̱ nu.

Digba̱dang ti zi ni shya ni

18I ryi nzuk a, ka̱bvung ka zi sswa naani ni a̱ ni maai ba ka̱ mak bu digba̱dang ti zi ni shya ni ba. 19Sa̱rei ka̱sa ka a̱ swat ba̱pfo gang a̱ pfong nom a Ka̱za ka nin tyyei na̱won nka na ni. 20Rot Ka̱za a̱ ywwai shii nkyang ka̱sa na, ka̱sa ka a̱ bo byyi kpungtun ba, ba di cat ka̱sa na ba, seko a̱mi Ka̱za kan cat. Ma ka̱sa ka a̱ mbyyi rya 21nom yaan Ka̱za a̱ ni ka̱ tun a̱ wwon a bwi dikwwa nu, ka shot, a̱ shya a̱gba̱dang hok ansham u na̱won Ka̱za na na ni shya ni. 22Rot zi bvwo nyyai bu tat nom ka̱pfun ka̱sa ka a̱ gwat bu ka̱bvung da̱ni da̱ a̱mbyring u a̱ kun di byin ni. 23Ba bu ka̱sa ka diyin ba, ko da̱ njit ma ba̱nyet ba a̱ byyi Tswa Ka̱za ji ka za nang ka̱tsitsrang ni. Zi shyi gwat pfong ka̱ram ka Ka̱za ka nin za sook zi yet na̱won nka a̱ za san a̱ kaai a̱ wwon i ka̱bvung ka zi sswa ni. 24Rot i breng rya njit a a̱mi zin shya sucet a; ma ki zi ryi kyang a zin breng rya na ni ku bu yet mbreng rya brak ba. Rot kyang a a̱yin na̱ ryi da̱ a̱ssi nu ni ku bu yet mbreng rya ba. 25Ma ki zi tot kyang a zi wi ryi ni zi ni kpo pfong bu hakuri.

26A̱mi brak Tswa Ka̱za ji zin za brang njit ba̱nyet sang cet, rot zi bvwo ka̱sak ka zi ni naai ni ba. Tswa Ka̱za ji a̱mi na za brang zi naai Ka̱za i bu wwut da̱ a̱nyyi ba̱ryat a ba̱nyet ba maai a̱ wwut i ni ba. 27Ka̱za ka a̱ cyang mpfwa ba̱nyet a ni a̱ bvwo kyang a a̱huhwa Tswa Ka̱za nu na̱ yet i. Rot Tswa Ka̱za ji a̱mi na brang ba̱nyet nka ba naai a ka̱sak ka ban ka̱ naai kyang a ka cat ba̱ ryi na ni.

28Zi bvwo kozan kyang a za shya ni Ka̱za a̱ yya a̱tsatsak di ba̱nyet ba a̱ ka̱ cat i, ba̱nyet ba ka yei i cat nka na ni. 29Ba̱nyet ba Ka̱za ka bvwo nyyai gba̱gbang ni mba ka tssa ba ryi di Ka̱won nka ka ni, Ka̱won ka a̱ ga yet a̱yekwo ba̱wumbeyang ba̱gingang. 30A̱mi ba̱nyet ba Ka̱za ka tssa ni, mba ka bo yei. Ba̱nyet ba ka yei ni, mba ka bo tun a̱ wwon. Ba̱nyet ba ka tun a̱ wwon ni, mba ka ba̱ ryi digba̱dang nka ti.

Cat Ka̱za na Yesu na̱ za ryi ni

31Sa̱rei nkyang ani shyi a̱ta̱ssi njit ni a̱nzan zi bu ni hywa? Ki Ka̱za a̱ shyi ba̱ njit, a̱yin a̱n shyi a̱ ni yya dinccok ba̱ njit o? 32Ka̱za ka di kan bvwo di Ka̱won nka ni ba a̱ ka̱ tun a̱ wrak ka kwu a̱zi hywak njit, a̱nzan a̱ nin bvwo ka za ryi kozan nkyang? 33A̱nyan a̱ ni tok ba̱nyet ba Ka̱za ka tssa ni? Ka̱za a̱mi a̱ bo ba̱ tun a̱ wwon. 34A̱nyan a̱n shyi a̱ maai za yya shirya ji, se bu Yesu Kristi? Ma nu a̱mi a̱ kwu a̱zi hywak njit, a̱ bo ta̱za a̱zi hywak njit, a̱ yya dityok di cet a̱zi hywak njit, a̱ si bo naai sabo ba̱ njit. 35A̱nzan a̱n shyi a̱ ni za gang bu cat Yesu na? Kyang shyi ba. Ko ba za nyep ko ka̱bvung, ko cihywat, ko dizot, ko ka̱wun, ko dikwu? 36Da̱ni di ba̱ryat Ka̱za ban hywa ni,

“A̱zi hywak nwan a̱mi ban za breng ka̱nu dikwu kozan ka̱tuk;

ba yya ba̱ njit di bvon-tsaap ji ba naat i ka̱bvwa hwak i.”

37Ko ba̱cincong! Sa̱rei nkyang ani shyi a̱ta̱ssi njit ni zi sswa cet nna sa̱rei rot a̱tuba nu a̱ za cat i. 38Rot n bvwo kyang n shyi ni za gang bu cat nu na ba, ko dikwu ko sucet, ko ba̱pfong Ka̱za ko ba̱nyet a̱tityok Tazwa ko cet, ko nkyang ka̱pfun ko nying cong bai, 39ko Tazwa ko ka̱byen. Kyang n shyi i ka̱sa kani ni maai za gang bu cat a Ka̱za ka za cat i ba, rot A̱gwam njit Yesu Kristi.

Currently Selected:

Rom 8: kaj

Highlight

Copy