Rom 6

Zi kwi i yya a̱ka̱tuk i gi shya sucet ka̱yat Kristi

1To, A̱nzan zi bu ni hywa? Zi nin tyyi ka̱ssi i yya a̱ka̱tukyya, aliheri Ka̱za nu a̱ ga shii o? 2Ko ba̱cincong! Njit ba̱nyet ba ka̱n kwi da̱ a̱ka̱tukyya ni, zi ni yya ni bun tyyi ka̱ssi bu ku yya na? 3Yi bvwo dei ka̱ram ka ba yin za yya baptisma nu zi mon diccu bu Yesu, baptisma nu a̱ yin yet mon diccu ba̱ nu i dikwu nu ti. 4Ka̱ram ka ban za yya baptisma ni zi kwu ba̱ nu ba za nyat ba̱ nu; da̱ni di cet dityok A̱tyyi na yin shyek Yesu nyyai yabyen ka ni, a̱mi meyang zin shya ryen swat ahwai sucet u.

5Rot zi yet kyang yring ba̱ nu i dikwu nu ti, a̱mi ba bo nin za shyek nyyai i dikwu ti ka̱sak ka ba yin ku shyek ni. 6Da̱ni di zin bvwo ni ka̱ram ka ba yin ku teyang tazwa dikum ka ni ba yin hywat a̱kukwo a̱yin njit u tazwa dikum ka a̱nta̱mak bu Yesu, a̱ ga hywat cet a̱ka̱tukyya njit a, zi gi wruk i yya a̱ka̱tuk dikwwa nu. 7Rot ka̱ram ka a̱yin na̱n kwu ni a̱ wruk dikwwa a̱ka̱tuk ti. 8Da̱ni zin kwu bu Yesu ni zi wrak ka̱ryong zi bu ni kaat ba̱ nu. 9Da̱ni zin bvwo Yesu a̱ ka̱n ta̱za nyyai a̱yabyen, di na̱ bo byyi kwu ba; dikwu bu byyi cet tazwa nu ba. 10Dikwu ti na̱ yin kwu ni a̱ yin kwu rot a̱ka̱tukyya bu nkrang ka̱yring; ma sucet a na̱ swat i a̱ swat a̱ta̱ssi Ka̱za. 11A̱mi meyang yi nin ya cyang di ba̱nyet ba a̱ ka̱n kwu a a̱ka̱tukyya ni, sucet a yi swat naani yi swat-swat Ka̱za rot mon diccu bu Yesu Kristi.

12Rot a̱mi yi bu ryok wwon a̱ka̱tukyya a̱ sswa cet ndwam nyin na ba, yi gi wi yya kyang a ndwan nyin na na cat i. 13Da̱ nyin ba ni wwon ko kap yring ma a̱ka̱tukyya a̱ kpo san ba, ho ba bu ya sook a̱n yya ka̱hwabyyi. Seko yi wrak Ka̱za a̱ccu nyin di ba̱nyet ba ba tun nyyai i dikwu a̱ bu ba̱ ryi sucet i. Yi kaai nkap nyin na ka̱ wwon ni ka ga ya brak yi yya kyang a myim ni. 14Yi yya a̱mi rot a̱ka̱tukyya a̱ ri byyi cet a̱za̱n nyin ba; rot yi shyi an bvak truwang ba, ma an bvak za̱nang Ka̱za.

Zi yet ba̱kwwa a̱ka̱tukyya ba

15To, naani? Zi bu nin tyyi ka̱ssi ba̱ a̱ka̱tukyya ho zi shyi an bvak truwang ba, ma an bvak aliheri Ka̱za a? Ko ba̱cincong! 16To, nyin ma yi bvwo ka̱ram ka a̱yin na̱n sook diccu nu a̱ tyyi i dikwwa a̱yin ni a̱ yet a̱kwwa a̱yin a̱ywu na̱ pfong ni. Ka̱ a̱ka̱tukyya a̱mi, a̱ngbom u a̱ yet dikwu; ki Ka̱za a̱mi, a̱ngbom u a̱ yet myim Ka̱za. 17Zi dyep Ka̱za, rot ka̱ram iyemi yi yi yen tssup a̱ka̱tukyya, yya a̱ka̱tukyya dikwwa, ma ka̱ram ka yin hok ba̱ryat ka̱ryong ba ni yi ba̱ san bu rya yring, 18ba ya san a̱ kaai a̱ wwon i dikwwa a̱ka̱tukyya ti yi brak tyyi ba̱kwwa Ka̱za i gi yya a̱tsatsak. 19N dyat ba̱ nyin a nkyang a yi cyang kozan ka̱ram ni, rot ndya nyin na ka̱n tyyi cet ba. Ka̱ram iyemi, yi yin wrak ndwam nyin na yet ba̱kwwa dishishik bu kozan taka̱i na̱kpot, a̱mi brak yi nin wrak a̱ccu nyin na sa̱rei i yya Ka̱za dikwwa a nkyang a myim ni.

20Ka̱ram ka yi yin yet ba̱kwwa a̱ka̱tukyya ba ni, kyang yin ya mon bu dizizrak Ka̱za ti ba. 21A̱nzan yi yin tun an nkyang a yi yin yya, nyin ba pfong nsum nna naani? Ku seyak dikwu ba. 22Ma naani ni ba ya tun a̱ wruk i dikwwa a̱ka̱tukyya ti yi brak tyyi ba̱kwwa Ka̱za. Yi ya gang tun naani yi ni yet ba̱nying Ka̱za, a̱ngbom nyin nu a̱ yet sucet sang ka̱hywat. 23To! Ka̱tan a̱ka̱tukyya ka a̱ yet dikwu, ma za̱nang Ka̱za ji yet sucet sang ka̱hywat di ba̱nyet ba a̱ mon a̱ccu mba bu Yesu Kristi A̱gwam njit ni.

Currently Selected:

Rom 6: kaj

Highlight

Copy