Rom 5

Ka̱sak ka zi nin myim Ka̱za ni

1To, naani zin shya shot rot ntyyi ndya njit a, zi bu shyi bu myyi ndya a̱ta̱ssi Ka̱za rot Yesu Kristi A̱gwam njit u. 2Rot zi wrak ka̱ryong di Yesu, na̱ za tyyei ka̱sak ka Ka̱za kan za nang za̱nang nka ji nkpa yet kyang a zi bvwo Ka̱za a̱ za yya mi ni. Rot a̱mi zi pfong ba̱set rot zi bvwo zi nin byyi bvak i dityok Ka̱za ti. 3Ban ba̱ a̱mi ma, zi gwai ka̱yat ka̱bvung ka zin shyi ni rot zi bvwo sswa ka̱bvung ka na nang a̱yin cet sseng, 4sseng a na tyyi Ka̱za a̱ hok ansham a̱yin. Ki Ka̱za a̱ hok ansham a̱yin, a̱ nan byyi rya an nkyang a Ka̱za ka ryat a̱wwon a̱ ni yya ni. 5A̱yin nu a̱ byyi rya a nkyang a Ka̱za ka ryat a̱wwon ni a̱ byyi hok nsum ba, rot Ka̱za a̱ ka̱n tom za̱nang nka ji yet Tswa Ka̱za ji zi bu tyyi cat nka na ndya njit a.

6Rot nyyai zi ka̱n maai yya kyang ba, Kristi a̱ kwu ka̱ram ka Ka̱za ka tssa ni rot njit ba̱nyet ba a̱ wi pfong Ka̱za ni. 7Ku bvwa dikwu a̱yin a̱ kwu zi hywak a̱zizrak a̱yin. Shim a̱yanyet a̱ drok a̱ jing rya a̱ kwu a̱zi hywak a̱tsatsak a̱yin. 8Ma Ka̱za a̱ za tyyei ka̱sak ka kan za cat i, nkpa yet dikwu Kristi ti a̱zi hywak njit nyyai zi ri shyi ka̱yat a̱ka̱tukyya. 9Dikwu nu ti a̱mi za jyi swat a bu Ka̱za. Ki a̱mi a̱ bo ni za san a̱ tun i diryen Ka̱za ti. 10Zi yin yet ba̱ra̱ndwan Ka̱za, ma ka za brak zi yet ba̱rywai rot bu dikwu Ka̱won nka ti a̱zi hywak njit. Naani zi yet ba̱rywai Ka̱za, zi bvwo ba̱zizrak a̱mi zi bun shya shot a rot Kristi a̱ yet a̱cet. 11Ma a̱ngbom nu a̱ yemi ba; zi shyi bu rya sai ka̱sak ka Yesu Kristi A̱gwam njit na̱n za brak zi yet ba̱rywai Ka̱za ni.

A̱damu bu Yesu

12A̱damu a̱mi a̱ yin ba da̱ a̱ka̱tukyya i ka̱sa ka. A̱ka̱tukyya nu a̱ ba di dikwu. Dikwu i tyak ka̱sa ka, rot koyan a̱ yet a̱ntyok a̱ka̱tukyya. 13Nyyai ba ka̱n shya Truwang Musa ji ba, a̱ka̱tukyya na̱ shyi i ka̱sa ka. Ma ba̱nyet ba a̱ byyi Truwang ji ni ba Ka̱za a̱ twang a̱ka̱tukyya mba nu ba. 14Ma nyyai ka̱ram A̱damu bu tat ka̱ram Musa ryik dikwu yin shyi a mpfwa koyan, sa̱rei bu ba̱nyet ba a̱ yin kpa ba bu ryen yring bu dikpak A̱damu ti ni ba ka̱ram ka na̱ yin dak hok Ka̱za ni.

A̱damu a̱ yin yet ma̱nwwuk a̱ntyok cong bai u. 15Ma mba ba̱mba ba̱hwa ba yet kyang yring ba, rot za̱nang Ka̱za ji mon ba̱ a̱ka̱tukyya A̱damu nu ba. Ku yet ka̱ryong a̱mi ba̱nyet ba̱gingang a̱ yin kwi rot dikpak a̱tuba a̱yring ti. Ma za̱nang Ka̱za ji bvwon bu shii ra̱u kyang a dikpak A̱damu ti ba mi ni, rot ba̱nyet ba̱gingang a̱ shya za̱nang ji ka̱bvwa Yesu Kristi. 16Kuma za̱nang Ka̱za ji bvwon bu a̱ka̱tukyya a̱tuba a̱yring a̱ywu. A̱ka̱tukyya a̱tuba a̱yring u a̱ yin ba di shirya, ba tyyi koyan hywak. Ma ba bvwa ka̱ram, za̱nang Ka̱za i nyyai bu byyik ba̱nyet ba̱gingang ba ka̱ san ni an shirya ji. 17Ku yet ka̱ryong a̱mi dikpak a̱tuba a̱yring tyyi dikwu i san ka̱sa ka, ma kyang a Yesu Kristi na̱ yya ni ra̱u a̱mi ba̱zinzan. Rot sa̱rei ba̱nyet ba a̱ shya za̱nang Ka̱za ji ni, Ka̱za a̱ bo hok ansham mba ni, ba breng dityok ti bu sucet rot kyang a Yesu Kristi na̱ yya ni.

18Da̱ni di ba̱nyet sa̱rei ban hwan ni i hywak dikpak tiyring ti a̱tuba a̱yring na̱ kpa ni, a̱mi meyang sa̱rei ba bon shya shot bu sucet i hywak a̱tsatsak a̱yring u a̱tuba a̱yring u na̱ yya ni. 19Da̱ni di ba̱nyet ba̱gingang ba yin tyyi ba̱nyet a̱ka̱tukyya ni i hywak a̱tuba a̱yring u a̱ yin dak hok ni, a̱mi brak ba̱nyet ba̱gingang ba ni tyyi ba̱zizrak i hywak a̱tuba a̱yring u a̱ tssup Ka̱za ni.

20Ba yin wrak Truwang ji a̱ ga tyyang a̱ka̱tukyya; ma ka̱bvwa ka a̱ka̱tukyya na̱n da̱u ni, za̱nang Ka̱za ji na si shii seyak a̱ka̱tukyya nu. 21To, da̱ni di a̱ka̱tukyya na̱ yin byyi cet a̱ tyyi koyan a̱ kwu ni, a̱mi meyang za̱nang Ka̱za ji cong di cet a̱ tyyi koyan na̱ yet a̱zizrak a̱ta̱ssi nka, a̱ za jyet sucet wityak rot A̱gwam njit Yesu Kristi.

Currently Selected:

Rom 5: kaj

Highlight

Copy