Rom 4

Zi tssup a̱nyyan Ibrahim a

1To, a̱nzan zi ni hywa tazwa a̱tyyi a̱kwop njit ka, Ibrahim? A̱ yin hok ni? 2Ka̱ a̱ yin yet a̱tsatsak a̱ta̱ssi Ka̱za rot a̱tsatsak nkyang u na̱ yin yya ni, to a̱ byyi kyang a na̱ hyong ni, ma ba a̱ta̱ssi Ka̱za ba. 3Ba̱ryat Ka̱za a̱ hywa, “Ibrahim a̱ yin wrak Ka̱za rya nu na; rot a̱mi Ka̱za a̱ ku san da̱ a̱zizrak a̱yin ni.” 4A̱yin nu a̱ yya pfong ni ba na ku tan. Kyang a ba ku ryi ni ku yet za̱nang ba, ku yet ka̱tan. 5Ma ka̱ a̱yin a̱ yya pfong a̱ gan tyyi a̱tsatsak a̱ta̱ssi Ka̱za ba, ma a̱ tyyi rya di Ka̱za ka a̱ na brak a̱ntyok hywak a̱n yya a̱ntyok sang hywak ni, ka cyang tyyi rya nu na a̱ ku brak na̱ sang hywak. 6Nkpa a̱mi Dawuda na̱ yin dyat ka̱ram ka na̱ yin dyat sai rya a̱tuba nu Ka̱za ka san da̱ a̱ntyok ka̱myim ni, ba di pfong nu na Ka̱za kan ku san ba. 7A̱ yin hywa,

“Ba̱nyet ba Ka̱za ka ba̱ tssu a̱ka̱tukyya mba nu ni a̱ hok ansham,

ba̱nyet ba Ka̱za ka sook a̱ka̱tukyya mba nu ni.

8A̱tuba nu Ka̱za ka ku tyyi hywak a̱ka̱tukyya nu nu ni ba a̱ ni hok ansham.”

9Hok ansham a Dawuda na̱ yin dyat ni yet bu nyyi ba̱nyet a ba ba̱ tyyi ncen ni e? Kaai. Sa̱rei bu ba̱nyet ba ba wi ba̱ tyyi na ni mi. Rot zi ka̱n yei ka̱bvwa i ba̱ryat Ka̱za ka ban hywa, “Ibrahim a̱ yin wrak Ka̱za rya nu na; rot a̱mi Ka̱za a̱ ku san da̱ a̱zizrak a̱yin ni.” 10Ma a̱nzan ka̱ram ba yin yya a̱mi? Ba si wa bvwa a̱n tyyi Ibrahim ncen na a? Ki ba ka̱n ku tyyi ncen na? Ka̱za a̱ yin ku san ba si ku tyyi ncen na. 11Tyyi ncen na yin ba riryim, i si bu yet shaida ji Ka̱za kan ku san da̱ a̱zizrak a̱yin ni ka̱ram ka ba ka̱n ku tyyi ncen na ni ba. Rot a̱mi Ibrahim a̱ tyyi a̱tyyi ba̱nyet u sa̱rei a̱ wrak Ka̱za ndya mba na ni Ka̱za a̱ ba̱ san di ba̱zizrak ba̱nyet i, di ba̱nyet ba ba ba̱ tyei ncen ni, di ba̱nyet ba ba wi ba̱ tyei ncen ni. 12Nu a̱ bo yet a̱tyyi ba̱nyet u ba ba̱ tyyi ncen na ni, rot ba ba̱ tyyi ncen ba, ma rot ba tyyi rya a̱ cong taka̱i a̱zizrak ka̱cyet a Ibrahim na̱ yin cong ba si bun ku tyyi ncen na ni.

Zi ni san kyang a Ka̱za ka ryat a̱ sak a̱ ni za ryi ni

13Ka̱za a̱ yin dyat a̱wwon a̱ ni wrak Ibrahim bu na̱won nu na sa̱rei ka̱sa ka, ba wei di Ibrahim a̱ yin tssup Truwang ba, seko a̱ yin wrak Ka̱za rya nu na, Ka̱za a̱ ku san da̱ a̱zizrak a̱yin ni. 14Rot ki kyang a Ka̱za ka ryat a̱wwon a̱ ni wrak a̱yin ni naat di ba̱nyet ba a̱ tssup Truwang ni, to, tyyi rya na bu byyi kpungtun ba, rop-wwon nu a̱ bo yet kyang ba. 15Truwang Musa ji ba di diryen Ka̱za ti, ma ba̱nyet ba a̱ byyi truwang ni ba, ba byyan truwang ba.

16Ka̱za a̱ yin dyat a̱wwon rot Ibrahim a̱ yin ka̱ ryi rya nu na. Kyang a Ka̱za ka yin dyat a̱wwon ni nkpa yet ntyyi rya, ba ga san di za̱nang Ka̱za ni di sa̱rei na̱won Ibrahim a, ba bu ba̱nyet ba a̱ tssup Truwang ni ba, ma ba̱nyet ba a̱ wrak Ka̱za ndya mba ni di Ibrahim ni. Ibrahim nu a̱ yin yet a̱tyyi ba̱nyet tssup u ba̱sa̱rei; 17da̱ni di ba̱ryat Ka̱za ba ban hywa ni, “N na̱ tyyi a yet a̱tyyi nwap ka̱sa ba̱gingang.” Rot a̱mi kyang a Ka̱za ka ryat a̱wwon ni yet assi nka, nka Ibrahim na̱ yin ka̱ ryi rya nu na. Nka a̱mi a bo tyyi nkyang a yin srang ni nan shyi. 18Ibrahim a̱ yin wrak Ka̱za rya nu na, a̱ breng rya nu na an kyang a na̱ si bun breng rya ni ba; rot a̱mi ku tyyi na̱ yet a̱tyyi nwap ba̱gingang; da̱ni di ba̱ryat Ka̱za ba ban hywa ni, “A̱mi zwa nwan ji zi nin tyyi ka̱tswa.” 19Tyyi rya nu na ku tyyi tintying ba, di na̱ hwa dikop nu ti ba; ka̱ram iya na̱ yet di za ncyi, di na̱ hwa ka̱sak ka ka̱ram ntyei ka ka̱n seyak Saratu ni ba. 20Tyyi rya nu na byyi ku wwon ba, di rya nu na ku tyyi bibyek an kyang a Ka̱za ka ryat a̱wwon a̱ ni ku ryi ni ba. Tyyi rya na i ku ryi cet na̱ dyep Ka̱za. 21A̱ yin tyyi rya sa̱rei Ka̱za a̱ maai yya kyang a ka ryat a̱wwon ni. 22Nkpa yin byyi Ka̱za “a̱ yin san Ibrahim da̱ a̱zizrak a̱yin ni” rot yin tyyi rya nu na. 23Ba̱ryat ba a̱ hywa “a̱ yin san Ibrahim da̱ a̱zizrak a̱yin ni” ba ba̱ a̱zi hywak nu ba̱diyin ba yin jem ba. 24Njit ma ba za san di ba̱zizrak ni ba ma̱ za jem, njit ba za san di ba̱zizrak ba̱nyet i rot zi wrak ndya njit a da̱ a̱tuba nu a̱ yin shyek A̱gwam njit u Yesu nyyai i dikwu ti ni. 25Ba yin ku wrak na̱ kwu rot a̱ka̱tukyya njit u, ba bo ku yrek di sucet zi gi shot shirya Ka̱za ji.

Currently Selected:

Rom 4: kaj

Highlight

Copy