Rom 3

1To, ba̱nyet Yahuda na byyi kyang a ban dan kpikpit nwap a ni e? Ka̱ a̱nzan tyyi ncen na ku ba̱ yya mi? 2Ee, ba ra̱u i kozan ryen; rot mba ba̱nyet Yahuda na a̱mi ba yin ba̱ tyyi ba̱ryat Ka̱za ba mbvak. 3Ma ki ba̱yanyet a̱ yya dira̱ntong bu ba̱ryat Ka̱za ba, nkpa ni tyyi Ka̱za a̱n yet a̱ra̱ntong o? 4Ko ba̱cincong. Ko ba̱nyet ba sa̱rei a̱ ni yet ba̱nyet dira, Ka̱za ka kok bu ka̱ryong. Da̱ni di ba̱ryat Ka̱za ban hywa ni,

“Ka̱ram ka an dyat i,

dolet koyan a̱ na̱ tyyi ka̱ryong;

ki ba ma̱ na̱ tyyi an shirya,

dolet ba bu shya a byyi ka̱ryong.”

5Ma ki a̱ka̱tuk na̱hywak njit u a̱ si tyyi dizizrak Ka̱za ti i wruk a̱za̱kpai, zi bu byyi kyang hywa a? Zi ni hywa di Ka̱za a̱ byyi a̱bvun an shirya ji na̱ za yya mi ni e? (N dyat da̱ a̱neywu ni fa.) 6Ko ba̱cincong! Ki Ka̱za a̱ byyi ka̱ram ka kan tyyi ba̱nyet a̱bvun ni, ka ni yya ni a̱n ba̱ yya shirya ji?

7A̱yanyet a̱ drok a̱ hywa, ka̱ a̱ka̱tukyya nzuk u a̱ si tyyi ba ryi ka̱ryong Ka̱za ka a̱ si bo ryi shii nka na, a̱nzan a̱n byyi ba ni n yya shirya da̱ a̱ntyok a̱ka̱tukyya ni? 8A̱nzan a̱ ni za bvwo zi hywa, “Ryok zin tyyi ka̱ssi ba̱ a̱ka̱tukyya nu na̱ ga za ba da̱ a̱tsatsak?” Ba̱yanyet a̱ n bvei dira di n dyat a̱mi. Ba ni ba̱ yya shirya an kyang a ba yya ni.

A̱tsatsak a̱n shyi ba

9To njit ba̱nyet Yahuda na, da̱ a̱nzan zin dan kpikpit ba̱nyet a? Ko kyang. N ka̱n dyat tazwa ba̱nyet Yahuda bu kpikpit nwap a sa̱rei, ba shyi cet a̱ka̱tukyya. 10Da̱ni di ban jem Ba̱ryat Ka̱za ni, a̱ hywa:

“A̱tsatsak a̱n shyi ba, ko a̱yring,

11a̱ntyok bvwo a̱n shyi ka̱yat mba ba,

da̱ a̱yin na̱n shyi a̱ cat Ka̱za ba.

12Sa̱rei mba ba brak a̱ wwon Ka̱za,

da̱ a̱ntyok byyi kpungtun na̱ bon shyi ka̱yat mba ba.

A̱yin mba a̱n shyi a̱ yya-yya ntswa ba, ko a̱yring.

13Zzwak mba ji yrang da̱ a̱kukwo ndyak ni.

A̱ka̱tuk ba̱ryat nu a̱ shyi a̱riryem mba na.

Kyang a wwut i na̱nu mba na ni i byyi ryen di anguma ni.

14Na̱nu mba na a̱ tyei a̱n hywaai bu ditok.

15Ba̱nyet gha i hok ba̱nyet hywu bu zzwam ba̱sok,

16koke ba si nwa, se ba byyan ka̱rek ka a̱ wwon ba̱nyet ba bu ka̱nak.

17Ba bvwo diwat swat ansham bu ba̱nyet ba,

18di ba bvwo tyong Ka̱za ba.”

19Zi bvwo naani, sa̱rei Truwang ji tssup ba̱nyet ba a̱ swat an Truwang ji ni, koyan a̱ ga ryin kyang ryat, a̱ bo bvwo sa̱rei ba̱nyet nta̱mak ba̱nyet Yahuda na a̱ shyi an bvak shirya Ka̱za. 20Rot a̱yin a̱ ni yet a̱tsatsak a̱ta̱ssi Ka̱za di ho a̱ tssup Truwang ji ba. Truwang ji ni brang a̱yin, na̱ ga bvwo ka̱sak ka na̱n byyi a̱ka̱tukyya ni.

Ka̱sak ka a̱yin na̱ nin myim Ka̱za ni

21Ma naanini ba tyyei ba̱zizrak ka̱sak ka a̱yin na̱ nin yet a̱tsatsak a̱ta̱ssi Ka̱za ni, di ku mon kyang bu tssup truwang ba. Truwang Musa ji bu ba̱nyet tyyei ba̱ryat Ka̱za a̱ wrak shaida mba ka̱sak ka da̱ a̱yin na̱ nin yet a̱tsatsak a̱ta̱ssi Ka̱za ni. 22Ryen na a̱yin na̱ nin yet a̱tsatsak a̱ta̱ssi Ka̱za ni nkpa yet na̱ wrak Yesu Kristi rya nu na. Ka yya a̱mi a̱zi koyan nu a̱ wrak Yesu rya nu na ni, rot ba̱nyet Yahuda na bu kpikpit nwap a bvwon ba: 23sa̱rei ba̱nyet ba a̱ nwa a̱ka̱tukyya a̱ si rat shii Ka̱za na. 24Ma rot a̱gba̱dang za̱nang Ka̱za nu a̱ ba̱ brak ba yet ba̱tsatsak a̱ta̱ssi nka, a̱zi san na Yesu Kristi na̱ ba̱ san a̱ kaai a̱ wwon ni. 25Ka̱za a̱ yin ku tun a̱ wrak na̱ ga kwu a̱ tssu a̱ka̱tukyya ba̱nyet u sa̱rei, ki ba ku ryi ndya mba na. Ka̱za a̱ yya a̱mi a̱ ga tyyei dizizrak nka ti. Nyyai ka a̱ yi yen kula ba̱ a̱ka̱tukyya ba̱nyet u ba, 26ma naanini wrak Yesu na di a̱truk mbang ni tyyei ka̱sak ka nu diccu nu na̱n yet a̱zizrak a̱ntyok shirya ni. A̱mi na̱n cii a̱yin nu a̱ wrak Yesu rya nu na ni.

27To, a̱nzan zi byyi nin ya cin? Kyang ba. Rot a̱nzan? Rot bvwo tssup Truwang njit a̱mi e? Kaai, rot zin tyyi ndya. 28To, a̱ngbom kyang u zi ni hywa ni nkpa yet: ka̱ a̱yin a̱ ni yet a̱tsatsak a̱ta̱ssi Ka̱za, na̱ ka̱ ryi rya nu na ba di tssup Truwang ba. 29Naanini, Ka̱za a̱ yet bu ka̱nyyi ba̱nyet Yahuda a̱mi e? Kpikpit nwap a hwa? Ka yet ka̱nyyi koyan. 30Ba̱nyet Yahuda na bu nwap nzaan na Ka̱za mba ka a̱ yet bu ka̱yring. Kuma di ba̱nyet Yahuda di nwap nzaan na ni yet a̱ta̱ssi nka rot ntyyi ndya mba na. 31To, Truwang ji bu byyi kpungtun baa? Ko ba̱ cincong! Zi wwat Truwang ji ka̱ryong cat ka zi yet ni.

Currently Selected:

Rom 3: kaj

Highlight

Copy