Rom 2

Shirya Ka̱za

1A̱kpondang nzuk, nwan a̱tuba nu yya ba̱yanyet shirya ni, a hwa da a ni shot o? Ka a yya ba̱yanyet shirya, a ya tyyi an shirya ji, rot a yya hywak yring ba̱ mba, ko ba na̱ yei a̱nyan. 2Zi bvwo shirya Ka̱za yet ka̱ryong zi ba̱nyet ba a̱ yya ntaka̱i nkyang ani ni. 3Ma nwan a̱tuba nu yya shirya tazwa hywak ba̱yanyet, ma a bu ma̱n yya bu kyang yring ba̱ mba ni, a hwa da a ni shot shirya Ka̱za ji e? 4Ka a byyai dizot ti bu hakuri nu Ka̱za ka byyi tazwa nyin ni e? A bvwo baa? -- Ka̱za a̱ pfong dizot a̱ cat a̱ na̱ brang a wwon a̱ka̱tukyya nwan nu. 5Ma nwan ba tyyi bu rya nwan ba̱ kpa̱u swrang, da̱ nwan ba ni shei ba. A bvwo an ya brang bu shirya a̱mi, ka̱tuk ka Ka̱za ka nin tyyei diryen nka bu a̱zizrak shirya nka ni. 6Rot koyan Ka̱za a̱ ni ku ryi zang nu ba̱cicrak bu kyang a na̱ yya ni. 7Ba̱yanyet a̱n tyyi ka̱ssi bu yya ansham, a̱ ga shya shii bu gwai bu sucet wityak an bvak Ka̱za. Taka̱i ba̱nyet iya Ka̱za a̱ ni ba̱ ryi sucet wityak. 8Ma ba̱yanyet a̱n shyi a̱ cat ba̱ a̱ccu mba, di ba cat kok ka̱ryong ba seko kyang a yet a̱ka̱tuk i. Ntaka̱i ba̱nyet iya a̱mi Ka̱za a̱ ni ba̱ yya shirya di diryen nka. 9Ka̱bvung bu rwam hyut tot ba̱nyet ba a̱ yya a̱ka̱tuk nkyang ni, ka̱tsitsrang ka ba̱nyet ba ya yei ba̱nyet Yahuda bu kpikpit nwap a brak. 10Ma ba̱nyet ba a̱ yya kyang a Ka̱za ka cat i, Ka̱za a̱ ni ba̱ ryi shii a̱ bo ba̱ ryi tsswa nda; ka̱tsitsrang ka ba̱nyet Yahuda a̱ si wa bvwa a̱n wrak kpikpit nwap a brak. 11Ka̱za a̱ yya shirya nka a̱n tyong a̱ssi ba.

12Kpikpit ba̱nyet a a̱ bvwo Truwang Musa ni ba, ba yya a̱ka̱tukyya ba ni brik a̱n byyi Truwang ji ba. Ba̱nyet Yahuda na byyi Truwang Musa ji ni a̱ ma̱n yya a̱ka̱tukyya ni, Truwang ji a̱mi ba nin ba̱ yya shirya ji. 13Ba byyi Truwang na a̱mi ni tyyi ba̱nyet ba a̱ yet a̱tsatsak a̱ta̱ssi Ka̱za ba, seko ba yya kyang a Truwang ji zi ba̱ tyyi yya na ni. 14Ko kpikpit nwap a ban byyi Truwang ni ba, kozan ba yya a a̱tsatsak a̱huhwa mba nu Truwang ji zi hywa ni, a̱tsatsak a̱huhwa mba nu a̱mi a̱ yet truwang mba ji, ko di ban byyi Truwang Musa ji ni ba. 15Hali mba tyyei ka̱sak ka kyang a Truwang Musa ji zi hywa ni shyi an ndya mba na. A̱huhwa mba nu a̱ bo tyyei iyemi yet ka̱ryong. Rot ka̱ram ka̱yaan ndya mba na na ba̱ tyyei a̱ka̱tuk u ba yya ni, ka̱ram ka̱yaan na ba̱ tyyi ka̱ryong. 16Rot a̱mi da̱ni di Ka̱sham Ba̱ryat ka n tyyei ni a̱mi ku nin dyi ka̱tuk iya, ka̱tuk ka Ka̱za ka nin wrak Yesu ka̱nu yya shirya an nkyang a ba̱nyet ba hwa na shyi nrang i.

Ba̱nyet Yahuda bu Truwang ji

17To, nwan hwa? A ya yei a̱ntyok ba̱nyet Yahuda, a hyong byyi Truwang bu byyi Ka̱za kaa? 18A bvwo kyang a Ka̱za ka cat a yya ni, nna ni myim ni, rot Truwang ji bu na̱ zzek a̱mi. 19A ryi a maai kwak a̱ntyok a̱tutwan shan, i bu yet fitila di ba̱nyet ba a̱ shyi an dyin ni. 20A zzek ba̱bvwon bu da̱bawon. A hyong di ka̱yat Truwang ka an shai sa̱rei bvwo bu ka̱ryong. 21To, a zzek ba̱yanyet, ma a maai ya zzek ba. A yya wa'azi yya, “Ryok yyi tsang ba,” ma nwan zzing tsang. 22I bu hywa, “Ryok kan-a̱naan ba”, ma nnu an shyi. A rak ryi ba̱nyet ba a̱ bvan nkyang a ba yya ni a̱n yya ka̱za, ma a tsaai a̱bat nna na. 23A hyong byyi Truwang, ma a̱ tyyi Ka̱za nsum rot a tssup Truwang nka ji ba. 24Ba̱ryat Ka̱za a̱ hywa, “Nyin ba̱nyet Yahuda a̱mi n byyi kpikpit nwap a ban byyan diyrek Ka̱za.”

25Ka tssup Truwang ji, to, tyyi ncen na yet; ma ka tssup Truwang ji ba, ku shyak bu sang ncen na ba. 26A̱tuba nu a̱ yet wap yaan ni, ka̱ a̱ tssup Truwang ji, ko ba ku tyyi ncen ba, Ka̱za a̱ ku breng da̱ a̱tuba nu ba ka̱n ku tyyi ncen ni. 27Yi cyang, kpikpit nwap a ni ya yya shirya rot yi tssup Truwang Ka̱za ji yi jem sak ni ba, ko di byyi ncen nyin na, ma mba ba tssup Truwang ji ko di ban tyei ncen na ni ba. 28Dama a̱nyan a̱mi a̱ yet a̱tsatsak a̱ntyok ba̱nyet Yahuda nu ba ku tyyi ncen ka̱ryong ni? Ba a̱yin nu ba ku tyyi ncen bu rwam i ba. 29Ma a̱ntyok ba̱nyet Yahuda ka̱ryong u nu a̱ yet a̱tuba nu a̱ yet a̱ntyok ba̱nyet Yahuda ka̱yat mpfwa ni, wato, a̱tuba nu ba ku tyyi ncen ka̱yat mpfwa ni. A̱ yemi a̱ yet pfong ntswa Ka̱za ma ba pfong Truwang ji ba jem ni ba. Taka̱i a̱yin iya shai dyep nu na di Ka̱za, ba di ba̱nyet ba.

Currently Selected:

Rom 2: kaj

Highlight

Copy