Rom 16

Byei

1Fibi a̱wumba njit a̱nu ni n ya mon ba̱ nu, nu ma a̱ shyi i ba̱nyet brang ba̱nyet tssup ba a̱ shyi Kankiriya ka ni. 2Yi ku san mbvak nhwa di ba̱nyet tssup A̱gwam Yesu ni i ku tyyei a̱tsatsak hali di ba̱nyet tssup Yesu ni. Yi ku brang di kyang a na̱ ni cat da̱ nyin ni, rot a̱ ka̱n brang ba̱nyet ba̱gingang har ba̱ nzuk ma.

3Yi n byyek Briskila bu Akila, ba̱nyet yya dikwwa Yesu Kristi ba̱ nzuk. 4Mba a̱mi a̱ jing sso mba a̱za̱ nzuk. N ba̱ gwai -- ba nzuk ba̱diyin ba bu ba̱yanyet ba̱gingang ba a̱ yet ba̱nyet tssup a nwap nzaan ni ma. 5Yi byyek ba̱nyet tssup ba a̱ tung a̱gbang mba ka ni.

Yi n byyek a̱kinkreng a̱rywai nzuk u Abainitat. Nu a̱mi a̱ yet ka̱tsitsrang a̱ntyok tssup ka a̱ shyi i ka̱byen Asiya ni. 6Yi byyek Maryamu; a̱ ya yya pfong ba̱gingang. 7Yi n byei Andaranikat bu Yuniyat, ba̱wumbeyang nzuk ba̱nyet Yahuda, n ka̱n yya a̱jaru ba̱ mba. Ba yet ba̱cecet ba̱nyet ka̱yat ba̱pfong ka, ba yin nwa tssup a ma a̱ n wwon.

8Yi n byei Amfiliyat, a̱kinkreng a̱rywai nzuk ka̱yat tssup Kristi. 9Yi n byei Urbanat a̱kpondang mpfong njit i dikwwa Kristi, nta̱mak ba̱ a̱rywai nzuk Istakit. 10Yi n byei Abalit, a̱yin nu koyan na̱ bvwo sseng nu na ka̱yat Kristi ni. I bu n byei kyang bvak Aristobulut. 11Yi n byei a̱wumba nzuk, Hirudiyan a̱ yet a̱ntyok ba̱nyet Yahuda ni. Yi n byei ba̱nyet tssup ba a̱ shyi mbvak Narkisat ka ni.

12Yi n byei Tarafina bu Tarafusa, ba̱nyring ba a̱ yya Ka̱za dikwwa ni. Yi n byei a̱wumba nzuk Barsisa, a̱ra̱mbyring u a̱ ma̱n yya Ka̱za pfong ba̱t i. 13Yi n byei Rufat, a̱gba̱dang a̱ntyok tyyei ba̱ryat Ka̱za, nta̱mak ba̱ a̱naa nu nu, a̱ yin breng di ka̱won nu ni. 14Yi n byei ba̱nyet Asinkiristat bu Filiguna, bu Hamit bu Baturobat bu Hamasa bu ba̱wumbeyang ba a̱ shyi ba̱ mba ni. 15Yi n byei Filulugusa bu Yuliya bu Niriyat ba̱ a̱wumba ka̱neyang nu nu, bu Ulumfat nta̱mak sa̱rei ba̱nyet tssup ba a̱ shyi ba̱ mba ni.

16Yi ya byei ansham di ba̱nyet tssup ni. Sa̱rei ba̱nyet tssup Kristi ba a̱ ya bvwo ni a̱ ya byei.

A̱ngbom kyang u Bulut na̱ ba̱ tyyei ni

17N ya tyyei, ba̱wumbeyang, yi ta̱rwam bu ba̱nyet ba a̱ kyyai swat ba̱nyet a a̱ bo ta̱ruk ba̱nyet tssup ba ni. Mba a̱mi a̱ rak tssup zzek a yi ka̱n san ni. Yi wruk ryen mba na sem. 18Ba̱nyet yya nkyang iya a̱ yet ba̱nyet tssup Yesu A̱gwam njit ba ba, ba kwan bu di na̱hwa mba. Ka̱sak ka ban bvwo ba̱ryat ba ni, se ba raai ba̱nyet sang hywak ba̱gingang a̱ tyyi an dong. 19Koyan a̱ ka̱n hok ka̱sak ka yin sook tssup a di ka̱ryong ni. Rot a̱mi n hok ansham nyin ba̱gingang. N cat yi yet ba̱nyet a̱za̱ncyi a nkyang a yet ni, i bu yet ba̱nyet sang hywak a nkyang a yet a̱ka̱tuk ni. 20Ka̱za ka a̱ wwat myyi rya ni a̱ ni tyyi yi shai Ka̱ta̱nyrang a̱nyyan a̱byen nyin ba̱nyying.

N naai aliheri Yesu Kristi a̱ swrang a̱za̱ nyin.

21Timoti a̱kpondang mpfong nzuk, a̱ ya byei. Lukiyat bu Yasan, bu Susibatarat, ba yet ba̱wumbeyang nzuk ba̱nyet Yahuda ni a̱ ya byei.

22Nzuk meyang, Tartiyat, a̱ntyok jem wasika a̱ni, n ya byei ka̱yat Kristi.

23Gayat, a̱tuba nu n swat a̱gbang nu ka ni, a̱ ya byei. A̱gbang nu a̱mi sa̱rei ba̱nyet tssup ba ban tung. Arastat, a̱tuba nu a̱ yet ma'aji ka̱nkrang a̱ni ni nta̱mak bu Kawartat, a̱wumba njit u, a̱ ya byei.

[ 24N naai aliheri A̱gwam njit u Yesu Kristi a̱ swrang ba̱ nyin sa̱rei. Amin.]

Naai a̱ngbom a

25Zi dyep Ka̱za, a̱ntyok cet, nu a̱mi a̱ maai a ya breng yi sseng di cet i tssup nyin na ni di Ka̱sham Ba̱ryat Yesu Kristi ka n tyyei ni; ka̱yat mba a̱mi ban tyyei kyang ka̱ryong a yin shyi nrang nyyai gba̱gbang ni. 26Ba̱nyying ka a̱mi ba sin kpo tyyang a̱ si bo tyyei nwap a sa̱rei, ka̱sak ka ba yin jem ka̱yat a̱kpa ba̱nyet tyyei ba̱ryat Ka̱za ba ni. A̱mi Ka̱za ka shyi nyyai ndoson ni ka yin tyyi ba yya, a̱ ga kwwat nwap a ba san ba̱ryat ba a̱ bo ba̱ tssup.

27Zi dyep Ka̱za har a̱ba̱da, nka ba̱diyin a̱ byyi bvwo ba̱ a̱za̱ncyi, zi ka̱ dyep rot Yesu Kristi! Amin!

Currently Selected:

Rom 16: kaj

Highlight

Copy