Rom 15

Yi yya kyang a ni myim ba̱wumbeyang nyin ni

1Njit ba̱nyet ba sseng di cet i tssup a ni, dolet zi brang ba̱nyet ba a̱ sang ncet a ni, rot ba shyi bu a̱bibyek ndya bu ka̱wun a nkyang a myim ni. Zi ryok myim ba̱ a̱ccu njit ba. 2Se koyan a̱ cat ba̱wumbeyang nu ba a̱ tssup ni shok, a̱ ga ba̱ brang ba rai i tssup a. 3Kristi a̱ yin myim bu diccu nu ba, seko da̱ni di ba̱ryat Ka̱za ba ban hywa ni, “Ditok ti ba na̱ pfwei ni, nzuk ba pfwei a̱ n kwot i.” 4Kozan kyang a ba yin jem i ba̱ryat Ka̱za ba ni ba yin jem a̱ ga za zzek a̱ za brang a̱ bo za ryi hakuri, zi gin byyi rya. 5To, n naai Ka̱za ka a̱ za brang a̱ bo za jyet hakuri nu ni ka ya brang yi mon a̱ccu i cong da̱ni di Yesu na̱ yin cong ni, 6yi gi yya kozan kyang, ka̱nu nyin ka̱yring ba̱ a̱huhwa a̱yring, i dyep Ka̱za, A̱tyyi A̱gwam njit u Yesu Kristi.

Nwap nzaan bu ba̱nyet Yahuda i ya tyong

7Rot a̱mi yi san ba̱yaan di mbvak nhwa da̱ni di Yesu Kristi na̱n ya san ni, rot ba̱nyet a ga ryi shii Ka̱za na a̱ ka̱ dyep. 8Rot kyang a yin byyi Yesu Kristi a̱n tyyi a̱kwwa ba̱nyet Yahuda nu ni Ka̱za a̱ ga shya ryen na ka nin yya kyang a ka rop a̱wwon di ka̱ryong a̱ ni wrak ba̱tyyi a̱kwop ba ni. 9Yesu brak a̱ bo yin yya a̱mi, kpikpit nwap a i gi shya dyep Ka̱za ka̱sak ka kan hok dizot mba ni. Da̱ni di ba̱ryat Ka̱za ba ban hywa ni.

“Rot a̱mi n ni na̱ dyep di nwap nzaan na,

n bvom a̱bvom na̱ gwai.”

10Ka̱bvwa ka̱yaan ba bo hywa,

“Nyin kpikpit nwap a yi nwa bu ba̱nyet ba Ka̱za ka tssa ni, i gwai Ka̱za ndung.”

11A bo hywa brak,

“Yi dyep Ka̱za nyin kpikpit nwap a,

yi dyep Ka̱za sa̱rei ba̱nyet ba.”

12Ishaya a̱ bo hywa,

“A̱tuba nu a̱ nyyai a byit Yassa ni a̱ bai;

Ka̱za a̱ ni ku yrek na̱ yet A̱gwam nwap u,

mba meyang ba ma̱n ku ryi ndya mba na.”

13N naai a̱zi hywak nyin ba̱nyet tssup, Ka̱za a̱ ya ryi gwai bu myyi rya rot yi wrak ka̱ryong da̱ nka, a̱ ga si ya brang nsak rya nyin na shii ka̱yat nka, rot cet Tswa nka na shyi ka̱yat nyin ni.

Kyang a tyyi Bulut jem wasika nu ni

14Ba̱wumbeyang nzuk ba̱nyet tssup, n bvwo sa̱rei yi sseng ba̱tsatsak ba̱nyet, yi bu byyi bvwo i maai zzek ba̱yaan. 15Ma har ba̱nyying n ri sseng i ya tyyei nkyang nzaan na n ka̱ ya yring i ni. N yya ba̱set rot Ka̱za a̱ n dyi pfong ani, 16a̱ n tyyi n yya dikwwa Yesu Kristi ka̱yat nwap nzaan ka. N dyi di gado ni i tyyei Ka̱sham Ba̱ryat ka Ka̱za ka n dyi ni, kpikpit nwap a i gi yet za̱nang ji Ka̱za ka ni san ni, ba̱nyet ba Tswa Ka̱za zi gang tun ba yet ba̱nkaa ni. 17N ya gba an kyang a Yesu na̱ yya ka̱yat nzuk ni i yya Ka̱za dikwwa nzuk. 18N dyat ba̱set ba, se ba an kyang a Yesu na̱ ka̱n yya ni an bvak nzuk n kwwat nwap nzaan n ba mi ba tyong Ka̱za. Na̱ yya a̱mi i ryen ba̱ryat nzuk, bu mpfong nzuk, 19bu cet nkyang ka̱hat, bu alama cet Tswa Ka̱za; har n tyak Urushalima bu na̱nkrang a a̱ tyong a̱ krang Urushalima nu ni har n si nat Ilirikum, n tyyei sa̱rei Ka̱sham Ba̱ryat ka tazwa Kristi. 20I cat nzuk a n tyyei Ka̱sham Ba̱ryat Yesu ka i na̱bvwa na ba ka̱n hok ni ba, rot n cat a̱yanyet a̱mi a̱ tuk n si n nok ba. 21Da̱ni di ba̱ryat Ka̱za ba ban hywa ni,

“Ba̱nyet ba ba ka̱n ba̱ tyyei ba̱ryat nu ni ba ba ni ba̱ tyyei ba bo ryi,

ba̱nyet ba meyang a̱ ka̱n hok ni ba ba ni ryi a̱ bvwong.”

22Nkpa n byyi n da̱de n shya diwat ba da̱ nyin ba.

Bulut a̱ zzop nat Urushalima bu Rom

23Nyyai gba̱gbang n cat bu tat da̱ nyin ma n shya diwat ba, ma naani pfong nzuk a kun tyak a̱za̱gbang a̱ni ni 24n byyi rya n ni ya byyek ka̱ram ka n nin swrap naat Asbaniya ni. N ni yen bvwa nnom da̱ nyin yi n brang ka̱cyet n naat Asbaniya ka. 25Ma naanini n ye naat Urushalima n si brang ba̱nyet tssup ba ka̱ yemi. 26Rot ba̱nyet tssup ba a̱ shyi ka̱byen Makidoniya ni bu Akaya a̱ ryi ku myim ba tung nkyang a̱n brang ba̱nyet tssup ba a̱ kpa dizot Urushalima ni. 27Mba dei ba hok ansham yya na a̱mi, ba ryi ku myim ba ba̱ brang. Ma ki ba cyang ansham ban byyi bvak i brang ba̱nyet dizot ba. Ka̱sak ka ba̱nyet Yahuda na ba ka̱n ka za̱nang ka̱nu-a̱tan Tswa Ka̱za ji ba̱ mba ni, a̱mi meyang mba nwap a ku myim ba ma̱n ya ka nkyang a ba byyi ni bu ba̱nyet Yahuda na. 28Ki n si tyak ba̱ mba n ba̱ ryi sa̱rei krum ji ba ba̱ tung i ni, i ka̱cyet nzuk ka naat Asbaniya n nin nwa n ya byyek. 29N bvwo ki n ba da̱ nyin n ni ya ba ba̱ a̱jyem ka̱nu-a̱tan Kristi nu.

30N ya naai ba̱wumbeyang, da̱ni di yi bvwo yi tssup A̱gwam njit Yesu Kristi ni, i bu bvwo cat a Tswa Ka̱za zi ya jyet i, yi n brang naai Ka̱za ba̱gingang. 31Yi naai Ka̱za a̱ n gang a̱ tun bu ba̱nyet ba a̱ shyi ka̱byen Yahudiya a̱ yet ba̱nyet tssup ni ba. Yi naai Ka̱za ba̱nyet tssup ba a̱ shyi Urushalima ni ba hok ansham pfong a n ni yya ka̱ yemi ni a̱ bo kpo san mbvak hwa. 32Wwon, ki Ka̱za a̱ shim n ba da̱ nyin bu ba̱gwai ba̱gingang zi bu hok ansham ndung. 33Ka̱za ka a̱ wwat myyi rya ni a̱ ya brang ba̱sa̱rei nyin, amin.

Currently Selected:

Rom 15: kaj

Highlight

Copy