Rom 14

Ryok yya a̱wumba nwan shirya ba

1Da̱ni da̱ a̱yin nu a̱ ka̱n sseng di cet i tssup a ni ba yi ku san mbvak nhwa, i ryok ya a̱cecet ba nu an kyang a na̱ yya ni ba. 2A̱yanyet tssup nu na ku wwon na̱ ya kyang a na̱ cat i; a̱tuba nu a̱ ka̱n sseng di cet i tssup a ni ba, a̱n za dinam ba. 3To, a̱tuba nu a̱ ya kozan kyang ni na̱ ryok byyai a̱tuba nu a̱ wi ya na ni ba, a̱tuba nu a̱ wi ya dinam ni na ma̱n dyok yya a̱tuba nu a̱ ya kozan kyang ni shirya ba, rot Ka̱za a̱ ka̱n ku san mbvak nhwa. 4Nwan yet a̱nyan ni yya a̱kwwa a̱yanyet shirya? Ko na̱ sseng ko na̱ kpa, ba̱ryat a̱ntyok ka̱ryi nu a̱mi. A̱ ni ya ka̱son rot A̱gwam Ka̱za a̱mi a̱ maai ku tyyi na̱ ya ka̱son.

5A̱yanyet a̱ cyang nom yaan ku ran kpikpit nnom a; a̱yanyet a̱ cyang sa̱rei nnom a na yet bu kyang yring. To, koyan a̱ sseng an kyang a na̱ sseng ni di cet. 6A̱yin nu a̱ cyang nom yaan ku ra̱u kpikpit nnom a ni, a̱ yya a̱n dyep A̱gwam Ka̱za. A̱yin nu a̱ bo ma̱n za kozan kyang ni, a̱ yya a̱mi a̱n dyep Ka̱za rot a̱ gwai Ka̱za mi rot kyangya na ka ku ryi ni. Sa̱rei a̱yin nu a̱ rak ya nkyang zaan ni a̱ yya a̱mi a̱n dyep Ka̱za mi a̱ bo ka̱ gwai i. 7Rot ba a̱yin njit u a̱ swat-swat diccu nu ni ba, da̱ a̱yin a̱n shyi a̱ ni ya tssa dikwu ba. 8Rot ki zi swat a̱cet zi swat-swat A̱gwam Yesu a̱mi, ki zi ma̱n kwi zi kwi mbvak A̱gwam Yesu a̱mi. Rot a̱mi, di dikwu njit di swat a̱cet njit zi shyi an bvak A̱gwam Yesu a̱mi. 9Rot Yesu a̱ yin kwu a̱ bo ta̱za a̱cet a̱ ga yet a̱gwam ba̱nyet u a̱ ri swat a̱cet i bu ba̱nyet ba a̱ ka̱n kwi ni. 10To, nwan hwa, a̱nzan a̱n byyi an yya a̱wumba nwan nu shirya? Nwan meyang, a̱nzan a̱n byyi an byyai a̱wumba nwan nu? Sa̱rei njit zi ni sseng a̱ta̱ssi Ka̱za ba za yya shirya. 11Rot Ka̱za a̱ hywa i ba̱ryat nka ba,

“Ka̱sak ka n yet a̱cet i,

a̱mi meyang koyan a̱ ni ta̱gbok a̱ta̱ssi nzuk,

koyan a̱ tyyei di ka̱nu nu nzuk a̱mi n yet Ka̱za.”

12To, zi bvwo koyan a̱ ni twang di ka̱nu nu a̱ta̱ssi Ka̱za.

Ryok tyyi a̱wumba nwan a̱ kpa ba

13Rot a̱mi se zi ryok yya ba̱yaan shirya; di zi yya a̱mi seko koyan a̱ ta̱rwam na̱ bu tyyi a̱wumba nu ka̱grap na̱ kpa a a̱ka̱tukyya. 14N bvwo ba̱zizrak, i yet a̱ntyok tssup Yesu, kyangya n shyi ba kpo yya ku yet a̱shishik a̱ta̱ssi Ka̱za ba; se da̱ a̱yin nu a̱ kpo sook ku yet a̱shishik ni, ku ma̱n ku yet a̱shishik u. 15Ki ya nwan na yet a̱wumba nwan dikpak, to ashe swat nwan na yet nying ku cat ba. Rot a̱mi se a ta̱rwam ya nwan na ku bu tyyi a̱wumba nu Yesu Kristi na̱ kwu zi hywak nu ni dikwu. 16Ta̱rwam, kyang a a sook ku yet a̱tsatsak ni ku bu yet kyang ditok di ba̱yanyet. 17Rot Dityok Ka̱za ti yet bu tinying ya bu sswa ba, ma ti yet tinying yya a̱zizrak nkyang, bu myyi ndya bu ba̱yaan, bu sai ndya na nna ni Tswa Ka̱za ji zi cong i ni. 18A̱yin nu a̱ tssup Yesu Kristi ryen nani ni, Ka̱za a̱ pfong ansham nu, ba̱nyet a̱ bo ma̱n pfong ansham nu.

19Rot a̱mi se zin tyyi ka̱ssi a nkyang a ni za ba di myyi ndya ni i bu brang ba̱yaan i ka̱ryong mba ka. 20Ta̱rwam a bu byyan pfong Ka̱za i hywak kyangya. Kozan kyangya yet a̱zizrak, ma a̱ka̱tuk kyang a̱mi a ya kyang a ni tyyi a̱yanyet a̱n kpa a a̱ka̱tukyya ni. 21Kyang a myim ni a ryok ya dinam, ko sswa nkwwa ko kyang a a ni yya n tyyi a̱wumba a̱ kpa ni. 22Breng kyang a an sseng bu Ka̱za nwan ka ni. A̱yin nu a̱ wi hok ka̱hwa prip ka̱ram ka na̱n yya kyang a na̱ hwa ku myim ni a̱ ni hok ansham. 23Ma ka̱ a̱yin a̱ byyi a̱huhwa an kyang a na̱ ya ni, na̱ bvwo Ka̱za a̱ ku yya shirya yemi, rot kyang a na yya ni ku yet ntyyi rya ba. Kozan kyang a yya bu ntyyi rya ni ba, a bvwo ku yet a̱ka̱tukyya.

Currently Selected:

Rom 14: kaj

Highlight

Copy