Rom 13

Ba̱nyet tssup bu dityok

1Koyan a̱ tyong ba̱nyet dityok, rot cet n shyi ka̱bvwa ba se nying na Ka̱za ka wrak ni. Kozan a̱yin a ryi i dityok, Ka̱za a̱mi a̱n ku sak. 2Rot a̱mi a̱yin nu a̱ yya ba̱nyet dityok wipfong ni a̱ yya wipfong an kyang a Ka̱za ka ka̱n yya ni, a̱ kwak diccu nu shirya Ka̱za. 3Rot ba̱nyet ba a̱ cong ansham ni a̱ ni pfong ka̱wun ba̱gwam ba, seko ba̱ka̱tuk ba̱nyet. To ka cat pfong ka̱wun a̱gwam ba, a cong a̱tsatsak ka̱cyet na̱ ma̱ na̱ dyep. 4Rot nu a̱gwam, Ka̱za a̱mi na̱ ka̱ yya dikwwa ti a gi hok ansham. Ma ka cong a̱ka̱tuk ka̱cyet, dolet a hok ka̱wun nu rot cet yya shirya nu na shyi ba̱ a̱za̱ kpai; rot a̱ yet a̱kwwa Ka̱za a̱ breng diryen Ka̱za ti mbvak a̱zi ba̱nyet ba a̱ cong a̱ka̱tuk ka̱cyet u ni. 5Rot a̱mi dolet a tyong cet ba̱gwam a, ba rot diryen Ka̱za ti ba ma rot a bvwo kyang a myim a yya ni.

6Nkpa n byyi yin trang diga̱ndu ti, rot ba̱gwam ba a̱ yet ba̱pfong Ka̱za ki ba yya pfong mba na. 7Yi wrak koyan kyang a yet nnu ni: yi trang diga̱ndu nkyang nyin na, i bu tyong ba̱gwam ba.

Ka̱sak ka zi nin swat bu ba̱yaan ni

8Ryok swrang bu ta a̱yin ba, seko ta gwai ba̱nyet. A̱yin nu a̱ gwai a̱wumba nu ni a̱ yya kyang a Truwang ji zi cat i. 9Truwang ji hywa, “Ryok kan-a̱naan ba, ryok hywat a̱yin ba, ryok zzing tssang ba, i ryok hok swam kyang a̱yin ba.” Sa̱rei truwang jini bu zaan ji n shyi ni nwa ka̱yat ntruwang jring ka ni, “Gwai a̱wumba nwan ka̱sak ka an ya gwai ni.” 10A̱yin nu a̱ gwai a̱wumba nu ni a̱ naat ku bvwa a̱bvun ba. Rot a̱mi gwai ba̱nyet a sook sa̱rei Truwang ji.

11Yi yya a̱mi rot yi bvwo ka̱ram kani. Ka̱ram shyek nda nyin ka a̱ yya. Ka̱ram san sucet ndwam njit ka a̱ shyi shishrek naani a̱ ra̱u ka̱ram ka zi yin nwa tssup a ni. 12Ryin ka̱tuk a bvat ba̱cincong bu tyak; rot a̱mi zi wwon mpfong ndyin na. Nom sai a bvat ba̱cincong bu kyi; rot a̱mi se zi sook nkyang ka̱bvwa sai a. 13Se zi cam a̱ccu njit a, ba ga za cyang di ba̱nyet ba a̱ swat-swat a̱ta̱nom ni. Zi wwon hyong nkwwa bu kan-a̱naan, i ryok zwang bu swam. 14Se zi sook nkyang nzwang a A̱gwam Yesu Kristi na̱ za ryi ni, i wwon a̱huhwa nu a̱ ni za tyyi zi pfong ansham tazwa ndwam njit ka ni.

Currently Selected:

Rom 13: kaj

Highlight

Copy