Pfong Ka̱za 2
2
Ba̱ryat naat di Afisa
1“Jem tom a̱pfong Ka̱za ba̱nyet tssup u ka̱yaani Afisa:
“Ba̱ryat bani a̱ nyyai da̱ a̱tuba nu a̱ breng na̱ta̱ngwat a̱tiyring an bvak yak nu ni a̱ bo cong a̱katyyi fitila zinariya a̱tiyring ka ni. 2N bvwo kyang a a ka̱n yya ni. N bvwo a ka̱n yya pfong ba̱gingang, n bvwo hakuri nwan nu. N bvwo a cat ryi ba̱nyet a̱ka̱tukyya ba. Ba̱nyet ba a̱ ya yei ba̱pfong Yesu ba ni a ka̱n ba̱ me sa̱rei cyang, i ryi ba yet ba̱pfong dira. 3A ka̱n yya hakuri i sswa ka̱bvung zi hywak nzuk, da̱ nwan ba si wu kaai wwon ba. 4Ma kyang yring n shyi n dak da̱ nwan: a n cat ba̱nyying da̱ni di nnyyai ni ba. 5Yring ka̱bvwa ka a yin shyi si bun kpa ni. Wwon a̱ka̱tukyya nwan nu, i yya da̱ni a yin yya ka̱tsitsrang ka ni. Ki a rak, n bai n bu sook fitila nwan ji ka̱bvwa swat nji ka. 6Ma ka̱bvwa kani a yya ansham an dak kyang a Nikolatawa na ba yya ni. Nzuk ma n cat kyang a ba yya ni ba.
7“Koyan a̱ rot a̱pfo a̱ hok kyang a Tswa Ka̱za zi tyyei ba̱nyet tssup ba ni.
“A̱yin nu a̱ sseng a̱ si tyak i, n ni ku sak na̱ ya disum ka̱kon sso ti shyi a la̱mbu Ka̱za nu ni.”
Ba̱ryat naat di Simirna
8“Bu jem a̱pfong Ka̱za ba̱nyet tssup u ka̱yaani Simirna:
“Ba̱ryat bani a̱ nyyai da̱ a̱tuba nu a̱ yet ka̱tsitsrang ba̱ a̱ngbom ni, a̱tuba nu a̱ yin kwu na̱ bo byyi sso ni. 9N bvwo kyang a na̱ dama ni. N bvwo a byyi dizot (ma i ba̱ryat ka̱ryong a byyi dizot ba). N bvwo sa̱rei a̱ka̱tuk ba̱ryat u ba̱yanyet ba a̱ ya yei ba̱nyet Yahuda na ni ba na̱ ryat i ni, di ba si wa yet ba̱nyet Yahuda na ba. Ba yet ba̱nying Ka̱ta̱nyrang. 10Ryok pfong ka̱wun ka̱bvung ka a ni sswa ni ba. Hok ansham ra! A̱gwam a̱ka̱tuk tswa a̱ ni pyyem ba̱yanyet nyin a̱ tyyi a a̱jaru, a̱ ya me. Yi ni sswa ka̱bvung iya bu tat nom swak. N dyi bu rya nwan na ko ka̱nu dikwu. N ni na̱ ryi rawoni nsso.
11“Koyan a̱ rot a̱pfo a̱ hok kyang a Tswa Ka̱za zi tyyei ba̱nyet tssup ba ni.
“Ba̱nyet ba a̱ ya nasara a̱ si tat a a̱ngbom u ni a̱ bo ni nwa dikwu a̱mba̱hwa ba.”
Ba̱ryat naat di Bargamuma
12“Bu jem a̱pfong Ka̱za ba̱nyet tssup u ka̱yaani Bargamuma:
“Ba̱ryat ba a̱ nyyai da̱ a̱ntyok u a̱ byyi a̱junjwwang ka̱krong a̱kpat na̱nu na̱hwa ni bambaa ni: 13N bvwo ka̱bvwa swat nwan ka. A shyi ka̱bvwa ka Ka̱ta̱nyrang kan yet a̱gwam u ni. Ma a n tssup di ka̱ryong. Ko ka̱ram ka ma Antibat na̱ yin wrak shaida nzuk har ba ku hywat ka̱ yemi ka̱bvwa ka Ka̱ta̱nyrang kan swat i, a n tyyi bu rya nwan n tssup. 14Ma na̱mankyang na̱yaan a̱n shyi n dak da̱ nwan. Ba̱yanyet a̱ shyi ka̱ yemi ba̱ nwan a̱ ssang zzek Balama, nu a̱ yin zzek Balak ka̱sak ka na̱ nin tyyi na̱won Isreila na a̱ yya a̱ka̱tukyya a̱ ya nkyangya na ba yin wrak na̱za na̱yaan ni, a̱ bo nwa kan-a̱naan. 15Bu ka̱yat nyin a bun byyi ba̱yanyet ba a̱ tssup zzek Nikolatawa na ni. 16Rot a̱mi se a brak ryok a̱ka̱tukyya nwan nu. Ki a rak, n bai n bu kwan bu ba̱nyet iya bu ka̱krong a̱kpat ka a̱ shyi ka̱nu nzuk ka ni.
17“A̱yin nu a̱ byyi a̱pfo ni na̱ hok kyang a Tswa Ka̱za ji zi tyyei ba̱nyet tssup ba ni.
“Ba̱nyet ba a̱ ya nasara ni, n ni ba̱ ryi manna nu a̱ shyi ka̱rek nyat i. N bo wrak kozan a̱yin a̱jijyat nkpang, tazwa nji ban jem a̱hwai diyrek tinying ti a̱yin na̱ bvwo ni ba, se ba̱ a̱tuba nu a̱ san kpang ji ni.”
Ba̱ryat naat di Tayatira
18“Bu jem a̱pfong Ka̱za ba̱nyet tssup u ka̱yaani Tayatira:
“Yi hok ba̱ryat Ka̱won Ka̱za, a̱ntyok byyi a̱ssi di diryem dong ni, a̱tak nu na a̱ ya a̱ssi da̱ a̱shong tswam u ba shok i. 19N bvwo nkyang a a yya ni. N bvwo ka̱sak ka a ni n cat i bu ka̱sak ka a ni n dyi rya nwan na ni. N bvwo hakuri nwan nu bu mpfong nwan na sa̱rei. N bvwo ka̱sak ka an yya naani ran ka̱tsitsrang ka ni. 20Ma kyang yring n shyi n dak da̱ nwan. A wwon a̱mbyring a̱ywu, Jazabila ba̱shishak. Nu a̱ ya yei a̱mbyring tyyei ba̱ryat Ka̱za. A̱ zzek ba̱nyet nzuk ba a̱kang zzek a̱ ba̱ raai a̱ tyei i kan-a̱naan, a̱ bo ya kyangya na ba wwat na̱za na̱yaan ni. 21N ku nang ka̱ram na̱ brak a̱ wwon a̱ka̱tukyya nu nu, ma a̱ cat wwon kan-a̱naan ti ba. 22Rot a̱mi n ni ku myyi tazwa a̱ngbrak ka, nu bu ba̱nyet ba a̱ yet ba̱kan-a̱naan ba ba̱ nu, ba nin sswa ka̱bvung ba̱gingang ni. N ni yya a̱mi ba̱nyying, seko ki ba brak a̱ wwon nkyang a ba yya ba̱ nu ni. 23N bo ni hywaai sa̱rei ba̱nyet ba a̱ ku tssup ni, ba̱nyet n tssup ba a̱ ga ryi a̱ bvwo nzuk a̱mi n bvwo a̱huhwa ba̱nyet sa̱rei bu kyang a ba cat i. N ni tan koyan nyin ba̱cicrak bu kyang a na̱ yya ni.
24“Ma kpikpit nyin na ka̱ yemi Tayatira ka a̱ ka̱n tssup a̱ka̱tuk zzek nu nu ba. Yi rak myyam kyang a ba̱yanyet ban yei ‘a̱tssung bvwo Ka̱ta̱nyrang u a̱ shyi nrang ni.’ N bo ni ya tyyi digboryet tiyaan ba. 25Ma n cat yi sseng di ka̱ryong an kyang a yi ka̱n shya ni har ka̱ram ba nzuk ka. 26-27Ba̱nyet ba a̱ ya nasara a̱ bo yya kyang a n cat a̱ si tat a̱ngbom u ni, n ni ba̱ ryi cet ba̱cicrak bu nying na n san da̱ A̱tyyi nzuk u ni. N ni ba̱ ryi cet tazwa ka̱sa ka sa̱rei, ba̱ mba A̱tyyi nzuk na̱ ka̱ n dyi n yya cet mba di shan ntswam ni n ba̱ kprom n yya a̱kukum ni di ron diryem ni. 28N bo ni ba̱ ryi ka̱ta̱ngwat a̱shong a̱ntson.
29“A̱yin nu a̱ byyi a̱pfo ni na̱ hok kyang a Tswa Ka̱za ji zi tyyei ba̱nyet tssup ba ni!”
Currently Selected:
Pfong Ka̱za 2: kaj
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
