Pfong Ka̱za 1

1Kpa nani tyyei kyang a Ka̱za ka yin wrak Yesu Kristi na̱ tyyei Yohana na̱ ma̱n tyyei ba̱nyet Ka̱za ba nkyang a bai ba̱nyying i. Yohana a̱ yet a̱kwwa Yesu, nu a̱mi Yesu na̱ yin tom a̱pfong Ka̱za nu na̱ bu ku kok nkyang ani sa̱rei. 2Yohana a̱ ma̱n tyyei sa̱rei kyang a na̱ yin dyi ni. Ba̱ryat bani mba a̱ yet ka̱ryong ka Yesu na̱ yin san di Ka̱za a̱ tyyei ba̱nyet ba ni. 3Ba̱nyet ba a̱ twang kpa nani ni a̱ ni hok ansham, ba̱nyet ba a̱ bo krok a̱pfo a̱ hok ba̱ryat ba n san di Ka̱za ni, a̱ bo yya kyang a ba jem ka̱yat kpa ka ni ni. Ba ni hok ansham rot ka̱ram a̱ bvat ba̱cincong nkyang ani i ba.

Yohana a̱ byei ba̱nyet tssup i na̱nkrang a̱tiyring

4Nzuk Yohana n byei ba̱nyet tssup ba i na̱nkrang a̱tiyring a a̱ shyi Asiya ni.

Ka̱za ka a̱n shyi nyyai ndoson ni a̱ bon shyi ba̱nyying i, a̱ bo ri naat i shyi di ka byyi tyak ba, ka ya ryi a̱liheri nka a̱ bo ya wwon nda, nta̱mak bu Tswa a̱tiyring ji nshyi a̱ta̱ssi a̱ntwam dityok nu ka ni, 5bu nyyai di Yesu Kristi, shaida ka̱ryong, nu a̱mi ka̱yat ba̱nyet ka a̱ kwi ni a̱ bo yet ka̱son a̱ ta̱za. Nu brak a̱ bo yet a̱gwam ba̱gwam ka̱sa a̱ni sa̱rei.

Nu a̱mi a̱ za cat ba̱gingang a̱ weyang ba̱sok nu a̱ kwu a̱ ga za san a a̱ka̱tukyya njit u a̱ kaai a̱ wwon. 6A̱ za yei i dityok nu ti a̱ si za brak a̱n yya ba̱gado Ka̱za, zi gi yya Ka̱za A̱tyyi nu nu pfong. Yesu Kristi nu a̱ byyi shii bu cet wi byyi ka̱hywat, amin.

7Yi cyang, a̱ bai a a̱ninyyan. Ba̱nyet ba sa̱rei a̱ ni ku ryi, nta̱mak bu ba̱nyet ba a̱ yin ku tywei ni. Ba̱nyet ka̱sa ba sa̱rei a̱ ni ku kun. Ka̱za yya! Amin.

8A̱gwam Ka̱za a̱ hywa, “Nzuk n yet Alfa (ka̱tsitsrang) bu Omega (a̱ngbom). Nyyai ndoson bu ba̱nyying bu nat a̱zanson n nin shyi. N bo n yet A̱gba̱dang A̱gwam.”

Kyang a Yohana na̱ yin hok a̱ jem coc a̱tiyring i ni

9Nzuk Yohana a̱wumba nyin, bu ka̱mon njit bu Yesu brak n nin shyi sswa ka̱bvung ka ba̱ nyin n bo n shyi i ya dityok nu ti ba̱ nyin bu yyak rya na. Ba yin nat ba̱ nzuk i ka̱babyen a̱katyyi ba̱shekwot, ba ka̱ yei Patmosa, i hywak a n tyyei ba̱ryat Ka̱za n bo shaida Yesu ni. 10Ka̱tuk nom A̱gwam Yesu ka Tswa Ka̱za n nwa n hok a̱gba̱d diwan a̱yin, ti swat di digba ni, ryat ma nzuk. 11Ti hywa da̱ nzuk. “Jem sa̱rei kyang a a ryi ni, i tom di kpa na di ba̱nyet tssup ba a̱ shyi i na̱nkrang ani ni: Afisa, Simirna, Bargamuma Tayatira, Sardisu, Filadalfiya, bu Lawudikiya.”

12N brak ni cyang a̱yin nu a̱ ryat ba̱ nzuk ni, n si ryi fitila ba̱ nji a̱tiyring nying zinariya. 13Katyyi fitila ka brak n dyi a̱yin na̱ tai bu ka̱won a̱neywu. A̱tro nu na̱ kup i a̱ kyrek a a̱ bu kpang a nyyan a̱byen na, a̱nying a̱za̱gbang ka̱hok u a̱ yet zinariya. 14Diccu nu ti i sai ba̱jijyat anye a̱bvwo, a̱ssi nu na anye diryem dong. 15A̱tak nu na a̱ shong anye a̱shong tswam u ba tyyi a ntswa ndong ni, diwan nu ti brak anye ba̱shekwot ba a̱ tyong a̱ nwai a̱ngam ni (di ba̱shekwot ntying ni). 16Na̱ breng na̱ta̱ngwat a̱tiyring an bvak yak nu na, a̱junjwwang ka̱krong na̱nu na̱hwa na wwut ka̱nu nu ka. Ka̱ta̱ssi nu ka ka sai da̱ni di nom ku nan ba a̱katyyi ni. 17Bu ku ryi na n brak n kpa a̱ta̱ssi nu ka anye n kwu. Na̱ n sak bvak yak nu na a̱ hywa da̱ nzuk, “Ryok hok ka̱wun ba. Nzuk n yet ka̱tsitsrang bu a̱ngbom. 18Nzuk n bo yet a̱ntyok byyi sso. N yi ye n kwu, ma n sso nani har a̱ba̱da. Nzuk n byyi na̱won a̱kwado dikwu bu a̱yabyen. 19Se a jem nkyang a a ryi ni, nying ba̱nyying bu nying a ri bai ni. 20Na̱ta̱ngwat ani a ryi an bvak yak nzuk a ni bu fitila nying zinariya ji a ryi ni byyi nkyang a na n sseng ni. Na̱ta̱ngwat a̱tiyring a a̱ yet ba̱pfong Ka̱za ba̱nyet tssup. Fitila a̱tiyring ji i yet ba̱nyet tssup i na̱nkrang a̱tiyring.”

Currently Selected:

Pfong Ka̱za 1: kaj

Highlight

Copy

Compare