Pfong Ka̱za 18

Babila a̱ kpa

1Ka̱sak iya ka bu sseng, n dyi a̱pfong Ka̱za a̱yaan na̱ kyrep nyyai Tazwa a̱ byyi cet ba̱gingang. Kyrep nu na i tyyi ka̱bvwa ka a̱ brak sai i ka̱sa ka ba̱sa̱rei. 2Na̱ kam ba̱ ntazwa a̱ hywa, “A̱ kpa! A̱gba̱dang Babila a̱ kpa. A̱ brak a̱ tyyi ka̱ryi a̱ka̱tuk tswa, ka̱bvwa tung kozan a̱ka̱tuk tswa bu kozan taka̱i a̱shishik na̱non. 3Rot sa̱rei ba̱nyet ka̱sa ba a̱ sswa nkwwa nu na, nkwwa kan-a̱naan nu na. Sa̱rei ba̱gwam ka̱sa ba a̱ kan-a̱naan ba̱ nu. Ba̱nyet nzwa ka̱sa ba a̱ tyyi cet rot ka̱sak ka na̱n wi ya breng ansham ni.”

4N bo n hok diwan tiyaan nyyai Tazwa,

“Ba̱nyet nzuk ba, yi wruk i ku wwon!

Yi ryok ntyyi bvak a a̱ka̱tukyya nu nu ba,

ho yi bu san ka̱bvung nu ka!

5A̱ka̱tukyya nu nu a̱ rai a̱ si tat tazwa,

Ka̱za a̱ yring na̱kpot nu na.

6Yi ma̱n ku yya mi ka̱sak ka na̱n ya yya mi ni;

yi ku tan nkrang a̱hwa kyang a na̱ ya yya mi ni.

Yi ma̱n ku mak ka̱bvung nkrang ka̱hwa

da̱ni na̱ yin ya mak i ni.

7Yi ku mak ka̱bvung bu byyan rya

ba̱cicrak bu shii bu hok ansham a na̱ yin tyyi diccu nu mi ni.

Rot a̱ ryat kozan ka̱ram a̱ ya yet diccu nu a̱ yya:

‘Cyang, nzuk n yet a̱gwam,

n sang a̱ntyok ba.

Kyang n shyi ni n byyan rya ba.

8Nkpa tyyi ka̱bvung ba̱ a̱zi ntaka̱i ka nin tung a̱za̱ nu bu i nom bu yring:

wato hywu bu zong bu rya byyan.

Wwon ba si ku hwwi di rong,

rot A̱gwam Ka̱za nu a̱ ka̱n ku yya shirya ji ni a̱ yet a̱gba̱dang a̱gwam ncet.’ ”

9Sa̱rei ba̱gwam ka̱sa ba a̱ kan-a̱naan ba̱ nu a̱ bo hok ansham ba̱ nu ni ba ni ryi ncing ndong a ku ya ni a̱ kun ba̱ ntazwa. 10Ba ni kwwat a̱ sseng zan, rot ba pfong ka̱wun ka̱bvung ka na̱ sswa ni, a̱ hywa, “Kaito! Oo Babila, a̱gba̱dang ka̱nkrang byyi cet! Nwan nu ba tyak bu ka̱yat saa a̱yring!”

11Ba̱nyet nza ka̱sa ba a̱ ma̱n dyi a̱ kun bu byyan rya ba̱gingang, rot a̱yin a̱n shyi a̱ bo ni ba̱ kwei nkyang mba na ba, 12wato nkyang zinariya bu nkyang a̱zurfa, bu na̱sham nkpang ya a̱ssi, bu na̱sham ba̱tro, bu na̱sham nkyang ka̱tako bu nkyang a ba yya da̱ a̱nyyi nzwon ni, bu nying ditrap a, bu tswam ji ba zzap i, 13bu kirfa bu nkyang-yaji, bu turare ndong bu mur, bu nkwwa bu dihywu, bu yak a ban yei alka̱ma ni, bu mpyyi alka̱ma, bu nyak bu bvon-tsaap, bu tsaap bu ba̱keke ntsaap, bu ba̱kwwa, har bu sso na̱won ba̱neywu. 14Ba̱nyet nza ba a̱ hywa da̱ nu, “Na̱sham nkyang a a cat i a̱ bon shyi ba. Zwa nwan ji bu shisham nwan ji tyak, da̱ nwan ba bu nin na̱ shya ba.” 15Ba̱nyet nza ba a̱ tyyi krum rot za bu ka̱nkrang iya ni a̱ ni tyong a̱ sseng zan, rot ba pfong ka̱wun sswa ka̱bvung ka ka sswa ni. Ba ni kun a̱ hok byyan rya. 16A̱ hywa, “Yi cyang kyang ka̱wun da̱ a̱gba̱dang ka̱nkrang a̱ni! Nka nu a̱ yin tssup na̱sham ba̱tro ni, nkyang ba̱gwai nu na i yet nkyang ba̱shekwot zinariya bu na̱sham nkpang ya a̱ssi ni. 17Ka̱yat nsaa a̱yring na̱ wai zwa iya ba̱sa̱rei.”

Sa̱rei ba̱nyet ba a̱ ruk njirgi ba̱shekwot a bu sa̱rei ba̱nyet ba a̱n nwai ni bu ba̱nyet ba ryen kyangya mba na ku shyi a a̱yuywu na ni a̱ kwwat a̱ sseng zan, 18a̱ nwa tyei nkun ka̱ram ka ban dyi ncing ya rong ka̱nkrang a ni, a̱ hywa, “Ka̱nkrang ka̱yaan a̱n shyi a̱ shii di ka̱nkrang kani ni e?” 19A̱ bvei dibvuk a̱ ya wop i, a̱ tyei nkun bu ndya byyan a̱ yya, “A̱nzan kyang ka̱wun a̱ ri-ryi na ni! A̱gba̱dang ka̱nkrang u ba̱nyet ruk njirgi ba̱shekwot a ban tyyi zwa an zwa nka ni, kanka a̱ wai nkyang ani sa̱rei bu a nsaa a̱yring.”

20Tazwa, yi gwai ka̱sak ka ban ku byyan ni. Ba̱nyet Ka̱za ba, bu ba̱nyet tyyei ba̱ryat nka ba, ba bu ba̱pfong Yesu ba, yi gwai ba̱sa̱rei nyin, rot Ka̱za a̱ ku yya shirya nkyang ji na̱ ya yya mi ni.

21A̱gba̱dang a̱pfong Ka̱za a sook a̱gba̱ryet nkpang di naan ni a̱ ta i kei ba̱shekwot ti a̱ hywa, “A̱mi ba nin sook Babila a̱ ta di cet, di ba bo ni ku ryi brak ba. 22A̱bvom zinzom bu na̱wan ba̱neywu, ba̱nyet tyap na̱shirwa ba̱ a̱gba ba bo ni na̱ hok da̱ nwan ba. Ba a̱yin nu a̱ yya kozan pfong ba bo ni shya da̱ nwan ni, di ba bo ni hok diwan nkpang kwang ti brak ba. 23Fitila bu byyi sai ka̱yat nwan ba, di ba bo ni hok diwan ango bu a̱mariya ka̱yat nwan ba. Ba̱nyet nza nwan ba a̱mi a̱ yin yet ba̱nyet ncet ba i sa̱rei ka̱sa ka. A raai ba̱nyet ka̱sa ba sa̱rei rot bvok nwan na.”

24Ba yya Babila shirya rot ba shya ba̱sok ba̱nyet Ka̱za bu ba̱nyet tyyei ba̱ryat nka ba ka̱yat ka̱nkrang ka, sa̱rei ba̱sok ba̱nyet ba ba yin hywaai i ka̱sa ka ni.

Currently Selected:

Pfong Ka̱za 18: kaj

Highlight

Copy

Compare