Pfong Ka̱za 17
17
A̱ka̱tuk a̱kan-a̱naan a̱ra̱mbyring
1A̱pfong Ka̱za a̱yring ka̱yat a̱tiyring ka a̱ breng a̱cicyi a̱tiyring a ni a̱ hywa da̱ nzuk, “Ba, n na̱ tyyei ka̱bvung ka ba ni tyyi a̱mbyring kan-a̱naan a̱ywu ba bvwo koke ni, a̱gba̱dang ka̱nkrang u ba nok shishrek bu ba̱shekwot ba̱gingang ni. 2Ba̱gwam ka̱sa ba sa̱rei ba kan-a̱naan ba̱ nu, ba̱nyet ka̱sa ba sa̱rei a̱ hyong bu nkwwa kan-a̱naan nu na ba sswa ni.”
3A̱ n sook a̱ nat ba̱ nzuk ka̱yit, Tswa Ka̱za ji zi n breng. N dyi a̱mbyring a̱yaan na̱ swat tazwa nyam i shong ba̱tsuntsong. Nyam iya byyi a̱yiyrek ditok Ka̱za sa̱rei rwam nji na, i si bu byyi a̱ccu a̱tiyring ba̱ a̱tom swak. 4A̱mbyring a̱ywu a̱ kup ba̱tro ba ba kyyai jankara bu bvonsom ba̱ a̱shong a̱ byyi ba̱shekwot zinariya bu na̱sham nkpang ba̱gingang. A̱ breng kop nying zinariya a̱n hywat bu nkyang a̱shishyi na yet zang dikan-a̱naan ji na̱ yya ni. 5A̱ta̱ssi nu ka ban jem diyrek ti ba a̱yin nu a̱ bvwo kyang a ti yet i. Ba jem, “A̱gba̱dang Babila, a̱naa ba̱nyet kan-a̱naan bu a̱shishik nkyang ka̱sa nu.” 6N dyi a̱mbyring u na̱ hyong ba̱gingang bu ba̱sok ba̱nyet Ka̱za bu ba̱nyet ba ba hywaai rot ba rak wwon tssup Yesu na ni.
Ka̱ram ka n nin ku ryi ni n yya ka̱hat ba̱gingang. 7A̱pfong Ka̱za a̱ywu a̱ hywa da̱ nzuk, “Ka̱hat a a̱nzan a yya? N ni na̱ tyyei kyang ka̱nrang tazwa a̱mbyring a̱ywu bu nyam ji ku ccok ni, nji byyi a̱ccu a̱tiyring a ba̱ a̱tom swak a ni. 8Nyam iya a ryi ni yi yen yet a̱cet, ma i bu yet a̱cet ba. I shyi i cat wruk nyyai a̱yabyen a̱ nat ka̱bvwa ka na̱ nin sswa a̱gba̱dang ka̱bvung ni. Ba̱nyet ba nyyai ban yya ka̱sa ka a̱yiyrek mba a̱ ka̱n nwa i kpa nsso nani ba a̱ ni ryi nyam ji a̱ yya ka̱hat. I yi yen byyi sso, nnaani bu byyi sso ba, ma bu ni wruk brak.
9“Nkyang ani cat a̱tsatsak a̱huhwa ba̱ a̱za̱ncyi. A̱ccu a̱tiyring a a̱ yet tsok a̱tiyring ji a̱mbyring a̱ywu na̱n swat i. Tsok a̱tiyring iya i bu yet ba̱gwam a̱tiyring. 10Ba̱pfon a̱ ka̱n kwei, a̱yring a̱n shyi a̱ ri yya dityok ti, ma a̱yring u a̱ ka̱n ba ba. Ki a̱ ba a̱ ni da̱de ba̱cincong. 11Nyam ji yi yen yet a̱cet i, ma̱n shyi ka̱yat ba̱gwam ka. Nji yet a̱mba̱ninaai u ka̱yat a̱tiyring ka̱son ka a̱ wruk a̱ naat ka̱bvwa sswa a̱gba̱dang ka̱bvung ka ni.
12“A̱tom a a ryi ni a̱ yet ba̱gwam swak ba̱nying ba a̱ ka̱n wi kup dityok ti ni, ma ba ni ba̱ ryi cet dityok a bu nyam ji, ba yya bu saa a̱yring. 13Sa̱rei ba̱nyet swak iya, kyang a ba cat i ku yet bu yring. Ba ni wrak nyam ji cet mba na bu dityok mba ti. 14Ba ni ta̱za zwang ba̱ A̱truk, ma A̱truk u bu ba̱nyet ba na̱ tssa a̱ yei ni bu ba̱nyet ba a̱ ku tssup di ka̱ryong ni a̱ ni ba̱ ya, rot a̱ yet (A̱tyyi ba̱tyyi a̱ bo yet) A̱gwam ba̱gwam.”
15A̱pfong Ka̱za nu a̱ bo hywa da̱ nzuk. Ba̱shekwot ba a ryi a̱kan-a̱naan nu na̱n swat ni a̱ yet ba̱nyet na̱byen bu nwap ba̱ a̱riryem ka̱sa na. 16A̱tom swak a a ryi ni bu nyam jini ba ni rak a̱kan-a̱naan nu ba̱gingang. Ba ni kok nkyang nu na sa̱rei a̱ ku wwon bu ka̱gbyang. Ba ni ya dinam nu ti, wwon a̱ ku hywat di rong. 17Rot Ka̱za a̱ wa ka̱n tyyi a ndya mba na ka̱sak ka ba nin yya kyang a ka cat i, ka̱nu mba a̱ bo tyyi ka̱yring a̱ wrak nyam ji cet mba na zi yya dityok, se ku bu ba ba̱cicrak bu kyang a ba̱ryat Ka̱za ba ba ryat i.
18“A̱mbyring u a ryi ni nu a̱ yet a̱gba̱dang ka̱nkrang u a̱ breng sa̱rei ba̱gwam ka̱sa ba ni.”
Currently Selected:
Pfong Ka̱za 17: kaj
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
