Pfong Ka̱za 16

A̱cicyi diryen Ka̱za

1N bo n hok a̱gba̱dang diwan tiyaan nyyai bat Ka̱za na ti hywa di ba̱pfong Ka̱za a̱tiyring ba, “Yi nat si brak a̱cicyi iya ba̱na a̱tiyring a̱nying diryen Ka̱za na krok ka̱sa ka mi.”

2A̱pfong Ka̱za ka̱son nu a̱ brak cicyi nu na a̱ krok tazwa ka̱sa ka. A̱ka̱tuk ba̱ghap a̱ tang ba̱nyet ba a̱ byyi lamba nyam iya ni bu ba̱nyet ba a̱ kok ma̱nwwuk nu na ntong ani.

3A̱pfong Ka̱za a̱mba̱hwa nu a̱ brak cicyi nu na a̱ krok i kei ba̱shekwot ti, ba̱shekwot ba a̱ brak a̱ tai ba̱sok nkom a̱yin, sa̱rei nkyang sso na shyi i kei ti ni i kwi.

4A̱pfong Ka̱za a̱mba̱tat u a̱ brak cicyi nu na a̱ krok a ncen na bu nrang ba̱shekwot a a̱ tyong nyyai ka̱byen ka ni, sa̱rei ba brak a̱ tyyi ba̱sok. 5Wwon n hok a̱pfong Ka̱za ba̱shekwot u na̱ hywa, “Shirya ji a yya ni yet a̱zizrak. Nwan a̱zizrak, a yin shyi nyyai ndoson, nwan ba bu rin shyi. 6Rot mba a̱mi a̱ weyang ba̱sok ba̱nyet Ka̱za ba bu ba̱nyet tyyei ba̱ryat nka ba, nwan ba ma̱n ba̱ ryi ba̱sok ba sswa. Kyang a ba yya ni nkpa bvwot bai a a̱ccu mba.” 7Diwan tiyaan i bu hyok nyyai i ka̱bvwa ba̱hyum ka, i hywa, “A̱mi za̱m, Ka̱za, A̱gba̱dang A̱gwam, shirya nwan ji yet a̱zizrak i bu yet ka̱ryong.”

8A̱wwon a̱pfong Ka̱za a̱mba̱naai u a̱ ma̱n brak cicyi nu na a̱ krok tazwa nom a, ba kpo wwon ku wum ba̱gingang hwwi ba̱nyet ba. 9Nom a ku bu ba̱ hwwi ba pfwei diyrek Ka̱za ti, Ka̱za ka a̱ byyi cet tazwa ka̱bvung ka ba sswa ni, di ba wa wwon a̱ka̱tukyya mba nu a̱ ka̱ yya sujada ba.

10A̱pfong Ka̱za a̱mba̱pfon nu a̱ brak cicyi nu na a̱ krok a̱ntwam dityok nyam iya, sa̱rei ka̱byen dityok nu ka a̱ tyyi ba̱gbyik bu ryin, ba̱nyet a̱ rywei a̱riryem rot ba pfong dikwu ka̱bvung ka ba sswa ni. 11Ba nwa pfwei Ka̱za nTazwa rot ka̱bvung ka ba sswa bu nhwot ni, di ba wa brak a̱ wwon a̱ka̱tukyya mba nu ba.

12A̱pfong Ka̱za a̱mba̱kitat u a̱ brak cicyi nu na a̱ krok a̱gba̱dang ncen u ban yei Furatu ni, ba̱shekwot ba a̱ hwwuk, sa̱rei ba̱gwam ba a̱ nyyai a̱za̱gbang dityin nu ni a̱ ga shya ryen byyek. 13N dyi a̱ka̱tuk ntswa ba̱nji tsat zi ryi da̱ a̱mbvat i zi wwut nyyai ka̱nu a̱ka̱tuk nyam iya ban yei gajimale nu ni bu ka̱nu nyam jring ka bu ka̱nu a̱tuba ka a̱ bvei diraa di ka tyyei ba̱ryat Ka̱za ni. 14Ba yin yet a̱ka̱tuk tswa nu a̱ yya nkyang ka̱hat ni. Tswa tsat jini i wruk nat di ba̱gwam ka̱sa ba sa̱rei i gi ba̱ tung sak a̱n tot nom nzwang a, ka̱tuk A̱gba̱dang A̱gwam Ka̱za ka.

15“Cyang, bai nzuk a ryi di bai a̱tang ni. A̱ntyok hok ansham nom a̱ywu nu a̱ yet a̱yin nu a̱ swat a̱ cam nom a ni, a̱ bo tssu ba̱tro nu a̱ wwon ba̱zizrak i, ho a̱ bu cong ka̱gbyang a̱ hok nsum ka̱yat ba̱nyet.”

16Wwon tswa iya i tung ba̱gwam ba sa̱rei ka̱bvwa ka ban yei Armagadan zi diryem ba̱nyet Yahuda ti ni.

17A̱pfong Ka̱za a̱mba̱tiyring u a̱ brak cicyi nu na a̱ krok ka̱yat nwun ka. A̱gba̱dang diwan a̱ hyok nyyai a̱ntwam dityok u ka̱yat bat Ka̱za ka a̱ hywa, “Ba tyak.” 18Za nwa bvei na̱krong i bu zzang bu tssak. Sa̱rei ka̱sa ka a̱ nwa trim. Nyyai ban yya ka̱sa ka ka̱byen a̱ ka̱n trim a̱mi ba; a̱nu ni a̱ yet a̱kpok sa̱rei. 19A̱gba̱dang ka̱nkrang u a̱ trya a̱n yya a̱tat. A̱gba̱dang ka̱nkrang a̱nying kozan ka̱byen a̱ byyan. Ka̱za a̱ yring a̱gba̱dang Babila, a̱ ku ryi kop nu ji na̱ sswa nkwwa diryen nu na. 20Na̱byen na a̱ shyi a̱katyyi ba̱shekwot i a̱ brik, a̱huhwan na meyang a̱ ma̱n bvwut. 21A̱cecet a̱kukwang ditaat a̱ ssik di cot ka̱janki ni a̱ wwut nyyai ntazwa a̱ cong a̱ mang ba̱nyet ba kyi ka̱byen. Ba bo pfwei Ka̱za rot ka̱bvung ditaat ka na̱ ba̱ krok i ni, rot ku yin yet a̱gba̱dang ka̱bvung.

Currently Selected:

Pfong Ka̱za 16: kaj

Highlight

Copy

Compare