Yakubu 2
2
Zi ta̱rwam bu tssa ba̱nyet
1Ba̱wumbeyang nzuk, yi yet ba̱nyet tssup Yesu Kristi, a̱gba̱dang A̱gwam njit u. Rot a̱mi yi ryok tssa ba̱nyet ba̱yaan wwon ba̱yaan ba. 2Ryok nhywa, ki a̱ntyok nzwa a̱ tyyi sa zinariya a̱ bo kup na̱sham ba̱tro a̱ ba i ka̱tung nyin ka, a̱ntyok dizot a̱ kup ba̱kikyak ba̱tro a̱ ma̱n ba meyang. 3Ki yi tssa a̱tuba nu a̱ kup na̱sham ba̱tro na ni i hywa da̱ nu, “Ka shim, a ba i swrang kyi a tsak ka̱bvwa a̱ni,” ma i hywa da̱ a̱tuba nu a̱ yet a̱ntyok dizot u ni, “Sseng ka̱ yemi,” ko yi hywa, “Swrang kyi ka̱byen a̱ta̱ssi njit,” 4yi ryi yi gang ba̱nyet ka̱yat nyin. Taka̱i shirya iya yet ba.
5Yi hok, ba̱wumbeyang, ba̱nyet ba a̱ byyi dizot i ka̱sa kani ni Ka̱za a̱ ba̱ tssa ba byyi shya i tyyi ndya mba di Ka̱za, a̱ bo shya Dityok ti ka rop a̱ sak ba̱nyet ba a̱ ka̱ gwai ni. 6Ma nyin ba yya di ba̱nyet dizot ba. N ni n yei ba̱nyet nzwa ba a̱mi a̱ yya da̱ nyin o? N ni n yei mba a̱ na ya kwak a̱ saai a bat shirya naa? 7Mba a̱mi ka̱ni a̱ byat ka̱sham diyrek ka ba za tyyi mi ni e?
8Ki yi ni tssup Truwang Dityok a ka̱sak ka ban jem i ba̱ryat Ka̱za ba ni a̱ hywa, “A ni gwai a̱ntyok swat shishrek ba̱ nwan di diccu nwan ni,” to, yi yya ansham. 9Ma ki yi yet ba̱nyet tssa ba̱nyet, to Truwang na ya sook di ba̱ka̱tuk ba̱nyet i. 10Ka̱ a̱yin a̱ tssup Truwang ji ba̱sa̱rei, a̱ bu kpa an jring, a̱ kpa i Truwang ji sa̱rei yemi. 11Rot a̱tuba nu a̱ hywa “Ryok kan-a̱naan” ni, nu a̱mi a̱ bo hywa, “Ryok hywat a̱yin ba.” To, shim a kan-a̱naan ba ma i hywat a̱yin, to, a seyak Truwang Ka̱za ji. 12Seko yi ryat i bu yya da̱ni di ba̱nyet ba ba ni ba̱ yya shirya di truwang na trung ba̱nyet i dikwwa ni. 13Shirya Ka̱za ni hok dizot a̱yin nu a̱ sang dizot ni ba. Ma a̱yin nu a̱ pfong dizot ba̱nyet ni, shirya nka ji ma̱ ni hok dizot nu.
Ntyyi rya na sang pfong i
14Ba̱wumbeyang, ka̱ a̱yin a̱ hywa da̱ a̱ byyi tyyi rya ma di na̱ byyi kyang a na̱ ni yya a̱n kpo tyyei ni ba, kpungtun a̱nzan ku ku byyi mi? Taka̱i tyyi rya iya ni ku san o? 15Da̱ni di ba̱wumbeyang ba̱ntyok bu ba̱nyring ba̱yaan a̱n shyi a̱ cat ba̱tro ba ba ni kup ni di ba byyi kyangya ba. 16Ka̱ a̱yanyet nyin a̱ hywa da̱ mba, “Ka̱za a̱ ya wwon nda, yi si ya kup i ya swei,” di na̱ ba̱ yya kyang a ni ba̱ brang ni ba, a̱nzan na̱ ba̱ yya mi yemi? 17A̱mi tyyi rya na kun dyi, ki ku byyi kyang a ku ni yya n ya tyyei ni ba, ku yet kom.
18Ma a̱yanyet a̱ ni hywa, “A̱yanyet a̱ byyi tyyi rya, a̱yanyet a̱ byyi pfong.” Kyang a n ni hywa ni nkpa yet, “N tyyei ka̱sak ka a̱yin na̱ nin tyyi rya a̱n sang pfong ni, n na̱ tyyei tyyi rya nzuk a an pfong a n yya ni.” 19A shim di Ka̱za a̱ shyi bu ka̱yring o? To, ku yet ka̱sham. A̱ka̱tuk tswa nu ma a̱ bvwo a̱mi, har ndwam mba na na trim. 20Nwan a̱bvwon a̱yin, a cat bvwo di ka̱ryong ka̱sak ka tyyi rya n sang pfong kun sang kpungtun ni e? 21Da̱ yring a̱tyyi njit u Ibrahim, ka̱sak ka Ka̱za a̱ yin hok ansham nu rot wrak a na̱ yin naat wrak ka̱won nu Ishaku ban yya ba̱hyum ni. 22A ryi ka̱sak ka tyyi rya na bu pfong a ban ba ndung ni. Seko na̱n yya kyang tyyi rya nu na, tyyi rya nu na si wa bvwa n yet a̱jyem. 23Rot a̱mi ba̱ryat Ka̱za ba a̱ ba cicrak bu dinyyi ba̱ryat ti hywa, “Ibrahim a̱ yin tyyi rya nu na di Ka̱za, rot a̱mi Ka̱za a̱ ku san da̱ a̱zizrak a̱yin” ni, ba bo ku yei a̱kpondang nka. 24To, yi ryi Ka̱za a̱ ssang a̱yin bu i tyyi rya nu na ba̱diyin ba, seko a̱ yya kyang a̱n tyyei tyyi rya nu na.
25A̱mi Rahab u, a̱ yin yet a̱kan-a̱naan nu ni. A̱ yin tyyi a̱zizrak a̱yin rot kyang a na̱ yin yya ni. A̱ yin san ba̱pfong ba a̱ nyat a̱ ba̱ tun a̱ tyyi ryen yaan.
26Da̱ni di rwam a kun yet kom ki sso n shyi ni ba, a̱mi meyang tyyi rya na kun yet kom ki ku byyi pfong ba.
Currently Selected:
Yakubu 2: kaj
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
