Yakubu 1

1Nzuk Yakubu, a̱kwwa Ka̱za bu A̱gwam njit Yesu Kristi, n ya byei sa̱rei ba̱nyet Yahuda ba a̱ yet ba̱nying Ka̱za ba a̱ wop sa̱rei ka̱sa ka ni.

A̱ntyok ntyyi rya a̱ ni shya a̱za̱ncyi

2Ba̱wumbeyang nzuk, ki yi nwa na̱bvung ba̱ a̱zi ntaka̱i, yi brak n yya rya sai, 3rot yi bvwo ka̱ram ka na̱bvung a na mai wrak ka̱ryong nyin ka ni, yi ni maai tram si tat a̱ngbom. 4Yi sseng i ryi yi tram si tat a̱ngbom u, ban bu hwan, i gi yet ba̱jyem bu ba̱kinkreng ba̱nyet, da̱ nyin ba ni ka̱u an kyang ba. 5Ma a̱yin nyin nu a̱za̱ncyi na ku zzak ni na̱ naai Ka̱za ka ni ku nang; rot ka na ka koyan di rya sai di ka nan byyi a̱dyying ba. 6Ma na̱ naai bu rya yring, a̱ ryok n byyi a̱huhwa ba. A̱yin nu a̱ byyi a̱huhwa ni a̱ ryi di a̱gba̱dang kei ba̱shekwot u wun ku na jim na̱ bvan ba̱tai ni. 7-8Taka̱i a̱yin na a̱ byyi rya hwa ni a̱ byyi ka̱rek sseng a̱huhwa nu nu ba, na̱ ryok hwa da̱ ni shya kyang an bvak A̱gwam Ka̱za ba.

Ba̱nyet nzwa bu ba̱nyet dizot

9A̱wumba nu a̱ byyi dizot ni, na̱ gwai ka̱sak ka Ka̱za kan ku yrek i. 10A̱wumba nu a̱ byyi shya ni, na̱ ma̱n gwai ka̱sak ka Ka̱za kan ku ywwai ni. Rot a̱ntyok nzwa a̱ ni seyak da̱ni di nkpyat ka̱yit ni. 11Ka̱ram ka nom kun tat ba̱ yinyai ni i na hwwi i shyik i kwot, shisham ji i brik. A̱mi a̱ntyok nzwa na̱ nin seyak a̱ wwon zwa ji na̱ shyi i tung a ni.

Ka̱bvung bu ka̱me

12A̱yin nu a̱ sseng a̱ si tat a a̱ngbom ka̱bvung u ni a̱ ni hok ansham. Rot ka̱ram ka na̱ bun tyak ka̱bvung ka ni, a̱ ni san za̱nang sucet jinji A̱gwam Ka̱za na̱ hywa da̱ a̱ ni wrak ba̱nyet ba a̱ ku gwai ni. 13Ka̱ram ka a̱yin na̱n cat yya a̱ka̱tuk kyang ni, na̱ ryok hywa di Ka̱za a̱mi a̱ ku me ba. Rot a̱yin a̱ ni maai me Ka̱za ka yya a̱ka̱tuk ba. Ka̱za ma ka ma̱n me a̱yin ba. 14Kozan a̱yin, ki ba ku me, a̱ka̱tuk a̱huhwa nu a̱mi a̱ ku raai, a̱ ni ku kwwat a̱ si tyyi a grung. 15Wwon a̱ka̱tuk cat u a̱ si shya ka̱hwa a̱ byin a̱ka̱tukyya, a̱ka̱tukyya nu a̱ rai a̱ si tat ka̱bvwa nu ka a̱ kwwat dikwu.

16Ba̱wumbeyang nzuk, yi ryok ya raai ba. 17Kozan a̱tsatsak za̱nang bu kozan a̱zizrak nkyang zi san, sa̱rei na nyyai Tazwa, di Ka̱za. Nka a̱ yya sa̱rei nkyang a sai tazwa ka ni. Nu diccu nu a̱ ssek ba, di na̱ ni brak di ma̱nwwuk ni ba. 18Ta ka̱rek ba̱ryat ka̱ryong nu ba a̱ za yya ka̱sak ka na̱ yin dop ka̱yat rya nu ka ni, a̱ ga za tyyi a̱zanson sa̱rei nkyang a na̱ yya ni.

Pfong ba̱ryat ba bu yya kyang a ba hywa ni

19Ba̱wumbeyang ba n cat i, yi ryok bring ba, dolet koyan a̱ yet a̱ntyok pfong da̱ a̱pfo, ma yi ta̱rwam bu na̱nu nyin na, i ryok yya diryen ba̱gigik ba. 20Diryen a̱yin ni ku ryi dizizrak Ka̱za ba. 21Yi jing kozan a̱shishik ka̱kpeyang bu sa̱rei na̱kpot. Yi wrak Ka̱za a̱ccu nyin i san ba̱ryat ba na̱ tssup a ndya nyin na ni, ba̱nying ba a̱ ni ya san ni.

22Yi ryok ya raai i tyyi ndya nyin na bu i pfong ba̱ryat nu ba ba, ma yi bu yya kyang a ba̱ryat ba ba hywa ni. 23A̱yin nu a̱ pfong ba̱ryat ba, di na̱ yya kyang a ba̱ryat ba ba hywa ni ba, a̱ ryi di a̱tuba nu a̱ ya cyang a ma̱dubi ni a̱ ryi ka̱sak ka na̱n dyi ni. 24A̱ ya cyang ansham a̱ brak a̱ rot, na̱ shek-shek a̱ bring ka̱sak ka na̱n dyi ni. 25A̱yin nu a̱ cyang a̱zizrak truwang nu a̱ trung ba̱nyet i dikwwa ni, a̱ bo ya ka̱son bu yya kyang a truwang ji zi hywa ni, di na̱ bring kyang a na̱ hok i ba ma a̱ kpo yya, a̱yin a̱ywu a̱ ni hok ansham an kyang a na̱ yya ni.

26A̱yin nu a̱ ya yei a̱ntyok tssup ni, ma di na̱ cam diryem nu ni ba, a̱yin a̱ywu a̱ ya raai di tssup nu na ku shyi an kyang ba. 27A̱zizrak tssup u a̱ yet a̱nying ka̱ryong A̱tyyi njit Ka̱za kan cat i, nu a̱ yet zi cam na̱kunak bu ba̱nyring sang ba̱ntyok i ba̱ brang ka̱yat ka̱bvung ka ba sswa ni; zi bu ta̱rwam ho nkyang ka̱sa na bu za shik.

Currently Selected:

Yakubu 1: kaj

Highlight

Copy

Compare