Ibraniyawa 6

1To se zi ya ka̱son i myyam a̱jyem zzek u ma ryok zzek nkyang ka̱tsitsrang a tazwa Kristi ka kozan ka̱ram, da̱ni:

Wwon a̱ka̱tukyya wrak Ka̱za ndya njit,

2ko baptisma,

ko kwot mbvak,

ko ba̱ryat ta̱za ba̱nyet ba a̱ ka̱n kwi ni,

ko shirya Ka̱za ji cong bai ni.

3Zin tyyi ka̱ssi, ki Ka̱za a̱ za shim i, zi ni yya nkyang ani.

4Ryen n shyi ba nin brek di ba̱nyet ba a̱ ka̱n wwon ka̱ryong mba ka ni ba. Ba ka̱n dyi ka̱bvwa sai Ka̱za; a̱ bo san za̱nang Ka̱za ji nyyai Tazwa har a̱ bo san za̱nang Tswa Ka̱za. 5Ba bvwo ka̱sak ka ba̱ryat Ka̱za ba ban yet i, a̱ bo hok cet zamani cong bai a. 6Ba wwon ka̱ryong mba ka. Rot a̱mi ryen bu brek da̱ mba n shyi har ba bo shei ba, rot ba ka̱teyang Ka̱won Ka̱za nkrang ka̱hwa a̱ ka̱ tyei nsum ka̱yat ba̱nyet.

7Ka̱byen ka a̱ sswa za ji kwei a nka ni, ka bo wwat ba̱nyet ba a̱ ka̱ kap i a̱tsatsak yak, ka ssang ka̱nu-a̱tan Ka̱za. 8Ma ki ka ta a̱shyim ba̱ a̱kpam ba̱pyyi ka byyi kpungtun ba; ka bvat ba̱cincong Ka̱za a̱ ka̱ shyi, a a̱ngbom u ka bu ka̱ tyyi rong.

9Ba̱kpondang, ko zin dyat a̱mi ni, zi byyi a̱ka̱tuk a̱huhwa ba̱ nyin ba. Zi bvwo yi ka̱n shya ka̱nu-a̱tan nu a̱ yet a̱nying sucet nyin nu ni. 10Ka̱za a̱ byyi ka̱hwabyyi ba. Ka ni bring pfong nyin na yi ka̱n yya mi ni ba, bu cat a yi ka̱n cat i i brang ba̱nyet ba a̱ yet ba̱nyet tssup ba ba̱ nyin ni har nyin ba ri brang ni. 11Njit zin byyi rya sa̱rei nyin yi ni sseng i tyyi rya nyin na, nkyang a yin byyi rya ni na ni yet ka̱ryong. 12Zi cat yi ryok ntyyi ran ba, ma yi sseng di ba̱nyet ba a̱ wrak ka̱ryong ni a̱ bo byyi hakuri ni i gi san kyang a Ka̱za ka sak a̱ ni ya ryi ni.

Kyang a Ka̱za ka ryat a̱ sak ni yet ka̱ryong

13Ka̱ram ka Ka̱za ka yin dyat a̱ sak bu Ibrahim ni a̱ si ta̱mak bu nak. Ka̱sak ka diyrek tiyaan tin shyi ra̱u diyrek nka ti ni ba, ka sswa nak a di diyrek nka. 14Ka hywa da̱ nu, “N shyi n ni na̱ wwon nda n tyyi byik nwan i tyyi ka̱tswa.” 15Ibrahim a̱ ma̱n san ba̱ryat iya a̱ sak di hakuri se na̱ bun san kyang a Ka̱za ka yin dyat a̱ sak ni. 16Kozan a̱yin a̱ na ssing di diyrek a̱yin ti a̱ ku ra̱u ni, brak, kyang a ba ryat a̱ sin ta̱mak bu ssing ni a̱cecet a̱ bon shyi ba. 17Ka̱za a̱ yin cat ba̱nyet ba a̱ ni san kyang a ka ryat a̱ sak ni ba bvwo ba̱zizrak ka bo ni shei kyang a ka ka̱n dyat ni ba, nkpa yin byyi ka yin shyi. 18Nkyang nhwa nani n shyi, kyang a Ka̱za ka ryat i bu shishyi nka ji, di ka ni shei ko ka bvwa dira ba. Rot a̱mi njit ba̱nyet ba shya nrang a ka̱bvwa nka ni, nkyang ani za brang zi sseng di cet an kyang a zin breng rya na ni. 19Nsak rya njit a ni breng sso njit ji, di kyang ka̱wun ku n shyi ba, da̱ a̱ka̱tuk a̱huhwa na̱n shyi ba. Nsak rya nani shyi an kyang a shyi Tazwa ka ni, na shya nwa har a̱ si nat ma labule ka̱ryi Ka̱za ka. 20Yesu a̱ wa ka̱ sin nwa ka̱ yemi ka̱nu njit. A̱ yet a̱gba̱dang gado Ka̱za wityak da̱ni di Malkizadik ni.

Currently Selected:

Ibraniyawa 6: kaj

Highlight

Copy

Compare