Ibraniyawa 5

1Kozan a̱gba̱dang gado Ka̱za ba na ku tssa ka̱yat ba̱nyet nu ka na̱ sseng a̱ta̱ssi Ka̱za ka̱nu ba̱nyet nu ka. Nu a̱mi a̱ ni kwot ba̱hyum bu ka-kyang rot a̱ka̱tukyya mba nu. 2Da̱ni nu na̱n sang cet i, nkpa ni tyyi na̱n yya ba̱shinshwon bu ba̱nyet ba a̱ byyi ka̱ywap a̱ bo cyi ni. 3Rot sang cet nu na nkpa na̱ nan krok ba̱hyum ba rot a̱ka̱tukyya nu nu, ba̱rimi meyang na̱ nan krok ba̱hyum ba rot a̱ka̱tukyya ba̱nyet u. 4A̱yin a̱n shyi a̱ na ya tssa yet a̱gba̱dang gado Ka̱za nu ba. Ka̱za a̱mi a̱ na tssa a̱yin nu a̱n sak i yet a̱gba̱dang gado Ka̱za nu, da̱ni di ka yin tssa Haruna ni.

5A̱mi meyang Kristi nu a̱ yin ya tssa yet a̱gba̱dang gado Ka̱za nu ba. Ka̱za a̱mi a̱ yin hywa da̱ nu,

“A yet Ka̱won nzuk.

N tyyi A̱tyyi nwan ka̱pfun.”

6Ka̱rek ka̱yaan ka bo hywa,

“A yet gado Ka̱za wityak,

a nyyan da̱ni di Malkizadik ni.”

7Ka̱ram ka Yesu na̱ yin shyi i rwam a̱neywu na ni, a̱ naai a̱ hwat mbvak har bu ba̱ssi da̱ a̱tuba nu a̱ maai a̱ ku tun a̱ wwon i dikwu ti ni; ka ma̱n ku hok rot a̱ yin wrak diccu nu a̱ ka̱ tyong ba̱t. 8Ko na̱ yin yet Ka̱won Ka̱za ni, a̱ myyam tung kap ka̱yat ka̱bvung ka na̱ yin sswa ni. 9Ka̱ram ka na̱ sin tyyi a̱jyem ni, a̱ brak a̱ tyyi ryen sucet wityak di ba̱nyet ba a̱ ku pfong ni. 10Rot a̱mi Ka̱za a̱ ku ryi diyrek a̱gba̱dang gado Ka̱za ti a nyyan Malkizadik a.

Yi ta̱rwam yi bu wwon ka̱ryong ka

11Zi ri bvat nkyang ba̱gingang ni ya tyyei tazwa ba̱ryat ka ni; ma ku bvwa dikwu ya tyyei ti, rot yi myyam nkyang ahwa ba. 12Ka̱ram ka a̱ maai yi yet ba̱nyet zzek, ma nyin ba ri yet ba̱nyet ba ba ni ya zzek na̱macwwang nkyang a yet nying myyam i ba̱ryat Ka̱za ni. Har ba̱nyying yi ri sseng bu i zzwa, yi ka̱n maai ya a̱tsit nkyang ba. 13To, a̱yin nu a̱ ri zzwa ni a̱ ka̱n maai ba ku tyyei ka̱sak ka na̱ nin swat a̱zizrak nswat ni ba, rot a̱ ri yet ka̱bawon. 14Ma a̱tsit nkyangya nu a̱ yet a̱nying ba̱nyet u a̱ ka̱n dai ni, ba̱nyet ba a̱ ka̱n myyam swat ka̱sa ka a̱ maai a̱ gang a̱ka̱tuk ba̱ a̱tsatsak ni.

Currently Selected:

Ibraniyawa 5: kaj

Highlight

Copy

Compare