Ibraniyawa 13
13
Kyang a zi ni yya Ka̱za a̱n hok ansham njit ni
1Yi ya ka̱son bu gwai ba̱yaan da̱ni di ba̱nyet tssup Kristi ni. 2Yi bu ssang ba̱yecen ba a̱ nwai i na̱sa nyin ni. A̱mi ba̱yanyet ba yin ssang ba̱pfong Ka̱za a̱ saai i na̱sa mba ba bvwo ba. 3Yi hok dizot ba̱nyet ti shyi a jaru ni, anye yi shyi ba̱ mba a jaru nu. Ba̱nyet ba a̱ sswa ka̱bvung ni anye yi sswa ka̱bvung ka ba̱ mba.
4Yi breng nyreng nyin di da̱ra̱ja. Ba̱ntyok ba bu ba̱nyring ba ya breng di ka̱ryong. Ba̱nyet ba a̱ cong a̱ka̱tuk ka̱cyet ni bu ba̱nyet ba a̱ kan-a̱naan ni, Ka̱za a̱ ni ba̱ yya shirya.
5Yi ryok tyyi ndya nyin i cat krum ba. Yi sswa bu kyang a yi shyi mi ni. Rot Ka̱za a̱ ka̱n hywa, “N byyi na̱ wwon ba, da n ni na̱ rak ba.” 6Rot a̱mi se zi gbung rya i hywa,
“A̱gwam Ka̱za nu a̱ yet a̱ntyok n brang,
n ni hok ka̱wun nkyang ba.
A̱nzan a̱yin na̱ ni n yya mi?”
7Yi yring ba̱kwak-ka̱son ba a̱ yin shyi a̱zanson nyin ni, ba̱nyet ba a̱ yi ya tyyei ba̱ryat Ka̱za ba ni. Yi cyang ka̱sak ka ba yin swat ka̱sa ka ni, i tssup a̱nyyan mba na ka̱sak ka ba yin wrak Ka̱za ndya mba na ni. 8Yesu Kristi a̱ yet ba̱ a̱yring ryu, bu ka̱pfun, bu ka̱ntson, di na̱ byyi shei ba. 9Yi ryok wwon ninyying nzzek i nwa ndya nyin na i ya jik tyyi zan ba. Ku myim zi wwon a̱liheri Ka̱za a̱ ta̱gbak ndya njit a, zi ryok tssup tada nkyangya ba. Ba̱nyet ba a̱ tyyi ndya mba i tssup taka̱i tada na ni ni a̱n shai kpungtun ba.
10Zi shyi bu ka̱rek ba̱hyum nna ni ba̱nyet ba yya pfong a tazwa tenti ba̱nyet Yahuda ka ni a̱ byyi ryen ya nkyang ba̱hyum a ba. 11A̱gba̱dang gado Ka̱za ba̱nyet Yahuda nu a̱ ri nwa bu ba̱sok nyam a̱ nat i a A̱kpok A̱zizrak Ka̱bvwa nu a̱ sin krok ba̱hyum a̱ka̱tukyya; ma dinam ti ba wruk ba̱ nti a̱ si hwwi a̱za̱n kei. 12A̱mi meyang ba yin wruk bu Yesu a̱ si hywat a̱za̱n kei, na̱ ga tssu ba̱nyet a̱ tun a a̱ka̱tukyya mba nu di ba̱sok nu ba. 13Njit meyang se zi ma̱n wruk nat a̱za̱n kei ka da̱ nu, nsum a na̱ yin sswa ni zi ma̱n sswa. 14Njit zi byyi ka̱nkrang ka ba za yya mi i ka̱sa ka a̱ ni wi tyak ni ba. Zi swat a̱mi cam ka̱nkrang ka a̱ bai ni. 15Rot brang a Yesu na̱ za brang ni, ryok zi wrak Ka̱za a̱didyep njit ji, njini yet za̱nang na̱nu njit ji zi na wrak ka̱ram ka zin yei diyrek nu ti ni. 16Yi ryok bring brang ba̱yaan ba bu ya yya nom, rot nkyang ani a̱mi yet a̱zizrak ka-kyang njit u Ka̱za ka pfong ansham ni.
17Yi pfong ba̱cecet nyin ba i tssup kyang a ba hywa ni. Mba a̱mi a̱ cam sucet nyin na kozan ka̱ram, rot ba ni twang kyang a ba yya ni a̱ta̱ssi Ka̱za. Ki yi ba̱ pfong, ba ni hok ansham mpfong a ba yya ni. Ki yi rak, ba ni hok ansham ba, di yemi ku ni ya brang ba.
18Yi za yya a̱duwa kozan ka̱ram. Njit zi bvwo zi byyi a̱ka̱tuk a̱huhwa ba, rot kozan ka̱ram zi cat yya kyang a myim ni. 19N ya naai ba̱gingang yi naai Ka̱za ka shim n brek n ba da̱ nyin ba̱nyying.
A̱duwa
20Ka̱za a̱ ka̱n yrek A̱gwam njit Yesu nyyai a̱yabyen. Nu a̱mi a̱ yet A̱gba̱dang A̱ntyok A̱tsaai bvon-tsaap u rot dikwu nu ti. Ba̱sok nu ba a̱mi a̱ yet shaida nkyang nji na̱ yin dyat a̱wwon ba̱ njit har a̱ba̱da ni. 21Zi naai Ka̱za ka a̱ wwat myyi rya ni a̱ ya brang yi shya kozan kyang a yi cat i gi maai yya kyang a ka̱ myim ni. Zi bu naai ka za brak a̱n yya nkyang a ka̱ myim ni, ka̱yat Yesu Kristi. Kristi a̱ byyi shii wityak, amin.
A̱ngbom ba̱ryat u
22N ya naai, ba̱wumbeyang, yi rot a̱pfo ba̱shinshwon i hok ba̱ryat bani a̱ ya ta̱gbak ni. Rot wasika a̱ni n ya jem i ni a̱ shii swap ba. 23N cat n ya tyyei ka̱sak ka ban tun a̱wumba njit u Timoti a jaru nu ni. Ka̱ a̱ ba ahwa n ni cong ba̱ nu ka̱ram ka n nin bai da̱ nyin ni.
24Yi za byei ba̱cecet nyin ba bu sa̱rei ba̱nyet ba a̱ tssup Ka̱za ni. Ba̱wumbeyang njit ba nyyai Italiya a̱ ya byei.
25Ka̱za a̱ ya wwon nda sa̱rei nyin.
Currently Selected:
Ibraniyawa 13: kaj
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
