Ibraniyawa 12

Ka̱za A̱tyyi njit a̱ za nyep

1To, da̱ni di a̱ssi ba̱nyet ba̱gingang nan shyi a njit ni, se zi yrik kozan kyang a shyi a̱zi ryen njit ka ni bu sa̱rei a̱ka̱tukyya nu a̱ za hwwok ni i tyong ncyi ji i shyi a̱ta̱ssi njit ni ba̱ a̱huhwa. 2Zi sak Yesu a̱ssi njit a, nu a̱mi a̱ yet ka̱bvwa ntyyi ndya njit ka, nyyai ka̱tsitsrang bu tat a̱ngbom u. A̱ yin gbung rya bu ka̱teyang na. A̱ cyang ba̱gwai ba a̱ ri bai diccu nu ni, rot a̱mi na̱ dam nsum dikwu ka̱teyang na ba, na̱ shyi naani mbvak yak Ka̱za i dityok nka ti.

3Yi hwa ansham i ryi ka̱sak ka̱ Yesu na̱n gbung rya a̱ sswa ka̱bvung a mbvak ba̱ka̱tuk ba̱nyet ba a̱ rak ku ryi ni; se yi ryok hok ka̱wai i rwan ba. 4Rot i ka̱yrak nyin ka ba̱ a̱ka̱tukyya yi ka̱n tat ka̱bvwa ka yi nin kwan har ka̱nu dikwu ni ba. 5Yi bring ba̱ryat ya nok ba Ka̱za ka ya tyyei di na̱won nka ni e? Ka hywa,

“Ka̱won nzuk, tung kap ka̱ram ka A̱gwam Ka̱za na̱ na na̱ nyyek ni,

Ka̱ram ka na̱ na̱ kam ni, a ryok hok ka̱wai ba.

6Rot a̱yin nu Ka̱za ka cat ni, nu a̱mi ka nyep.

A̱tuba nu ka san da̱ yet ka̱won ni a̱mi ka ku breng a̱yo.”

7Yi gbung rya i ka̱bvung ka yi sswa ni i bvwo A̱tyyi a̱mi a̱ ya nyep. Ka̱bvung nyin ka a̱ tyyei ka̱sak ka Ka̱za kan ya breng di na̱won nka ni. Ki ka̱won a̱n shyi a̱tyyi na̱ na wi nyep? 8To, ki Ka̱za a̱ ya nyep da̱ni di sa̱rei na̱won nka na ni ba, to, yi yet na̱won nka ba yi yet na̱won a̱za̱nkei. 9Da̱ni di ba̱tyyi njit ba ba nan za nyep ni, to, a ryi zi ba̱ tyong; ba̱ a̱nzan a̱ nin za bvwo zi wrak a̱ccu njit da̱ A̱tyyi njit u Tazwa ka i gi shya sucet? 10Ba̱tyyi njit ba a̱ na za nyep ka̱baram ba̱cincong i ryen na ba ryi ku ba̱ yet i, ma Ka̱za a̱ na za nyep a̱ ga za brang zi gin byyi bvak dizizrak nka ti. 11Ka̱ram ka ba nan za nyep ni zi na hok dikwu ka̱ram iya, da̱ njit ba na hok ansham ba. Ma ki ka̱ram ka a̱ seyak, ba̱nyet ba ba nyep ni ba ni shya za̱nang myyi rya ba̱ a̱tsatsak sucet.

Zi ta̱rwam ba̱ a̱ccu njit

12Yi yrek a̱bubvot mbvak nyin nu ba̱ a̱bubvot a̱tak u i sseng di cet. 13Yi sook ryen na ba̱tuntwang i ryok cip tyei zan ba, ho a̱tak a̱ta̱ruk nkap a a̱ bu ta̱ruk a̱ wai creng a.

14Yi swat ansham bu koyan i si bu cong a̱zizrak ka̱cyet, rot ka̱ a̱mi ba a̱yin a̱ ni maai ryi Ka̱za ba. 15Yi ta̱rwam bu ba̱yaan a̱yin a nyin na̱ bu brak ka̱ma a̱ sak a̱liheri Ka̱za mi. Yi ta̱rwam a̱yin nyin na̱ bu ta a̱cwai tswa jok u a̱ ni rai a̱ tyyi kpikpit a swat cwai ni. 16Yi ta̱rwam yi bu nwa kan-a̱naan, i ta̱rwam yi bu nwa a̱ka̱tuk a̱huhwa di Isuwa ni, nu a̱mi i hywak ka̱bankyangya na̱n dyap digado yet a̱yekwo ka̱won nu ti. 17Yi bvwo na̱ si bu cat a̱tyyi nu nu a̱ ku pfwa nda, ma a̱nyan a̱ bo ni ku cyang? Rot a̱ yin shya ryen na na̱ bo nin shei kyang a na̱ ka̱n yya ni ba. Ko di ka̱nak nu a̱ bo yin maai brek riryim ba.

18Ka̱bvwa ka yin ba ni, ba ka̱bvwa ka yi nin bam i hok di mbvak nyin ni ba, ba da̱ni di na̱won Isreila ba yin bun sseng a̱ta̱tyin dihwan Sinai ti ya rong bu a̱dindying ndyin bu ryi nza ni ba. 19Ba si bo hok digba bu diwan ti ryat. Ka̱ram ka ba̱nyet ba ban hok diwan iya, a̱ naai ba ba̱ ryok ba bo ryok hok ba. 20Rot ba yin maai ba a̱ sseng bu truwang ji hywa, “Ko nyam ra dihwan ti, ba za̱ mang a̱ hywat.” 21Kyang a ba yin dyi ni yin byyi ka̱wun har Musa a̱ hywa, “Rwam nzuk a trim bu ka̱wun.”

22Ma nyin yi ba i dihwan Sihiyona bu ka̱nkrang A̱gwam Ka̱za a̱ntyok byyi sucet, Urushalima nu a̱ shyi tazwa ni. Yi ba ka̱tung hok ansham ba̱pfong Ka̱za ba̱brika̱tei 23bu ka̱tung ba̱nekwo na̱won Ka̱za, ba̱nyet ba ba jem a̱yiyrek mba na Tazwa ni. Yi ba a̱ta̱ssi Ka̱za, nka a̱ ni yya sa̱rei ba̱nyet ka̱sa ba shirya, ka̱bvwa tswa a̱tsatsak ba̱nyet ban tyyi a̱zizrak a̱ tun ni. 24Yi ba a̱ta̱ssi Yesu, a̱tuba nu a̱ yet a̱dat rop-wwon a̱hwai u ni, bu ka̱bvwa ka ba hyum ba̱sok ba a̱ ran ba̱nying Habila ba ni.

25Nde, se yi ta̱rwam ryok hweyak a̱pfo i rak hok a̱tuba nu a̱ ryat ni. Ba̱nyet ba a̱ yin dak hok a̱pfong u Ka̱za ka yin tom i ka̱sa ka ni a̱ yin hwan. Ba̱lle njit, ki zi rak hok a̱tuba nu a̱ ryat nyyai Tazwa ka ni, zi ni hwan. 26Diwan nu ti yin zun sa̱rei ka̱sa ka ka̱ram iya, ma naanini a̱ hywa, “Nkrang ka̱yring brak n bo ni zun sa̱rei tazwa bu ka̱byen.” 27Ba̱ryat nu ba na̱ hywa ‘Nkrang ka̱yring brak’ ni, ba za tyyei ba̱zizrak kozan nkyang u Ka̱za ka krok ni ba ni na zun a̱ sook, se bu nkyang a yet nying wi zun ni nna ni sseng.

28Se zi gwai dityok njit ti zi san ni rot ti yet tinying ti ba ni zun ni ba. Se zi dyep Ka̱za i ka̱ naai i ka̱ tyong i hok ka̱wun nka, ka̱sak ka ka nin hok ansham njit ni, 29rot Ka̱za njit ka a̱ yet diryem ndong ti hwwi ni.

Currently Selected:

Ibraniyawa 12: kaj

Highlight

Copy

Compare