Ibraniyawa 11

Tyyi rya

1Tyyi rya na ryi di wrak ka̱ryong an kyang a zin breng rya ni, i shim kyang a zi wi ryi da̱ a̱ssi ni. 2Tyyi rya na a̱mi yin byyi Ka̱za a̱ hok shok ba̱nyet ndoson ba.

3Tyyi rya na a̱mi tyyi zin bvwo ka̱sak ka Ka̱za ka yin yya ka̱sa ka di diwan nka ni, nkyang a zi cyang da̱ a̱ssi ni yin wruk a nkyang a ba yin maai a̱ ryi da̱ a̱ssi ni ba.

4Tyyi rya na a̱mi yin tyyi Habila a̱ wrak ka-kyang na ran nyyi Kainu na ni. Rot ntyyi rya nu na, nkpa yin byyi Ka̱za a̱ hok shok nu a̱ san za̱nang nu ji a̱ bo ku san da̱ a̱zizrak a̱yin ni, ko na̱ ka̱n kwu ni a̱ ri ryat har ka̱pfun.

5Tyyi rya na a̱mi yin byyi Ka̱za a̱n sook Anuhu a̱cet na̱ kwu ba. Ba yin ku cat a̱ ku shya ba; Ka̱za ka ka̱n ku sook a̱ drok i. Rot ba̱ryat Ka̱za ba a̱ za tyyei di nyyai ba ka̱n ku sook ba Ka̱za a̱ yin pfong shok nu. 6A̱yin nu a̱ wrak ka̱ryong ni ba a̱ byyi myim Ka̱za ba. Rot koyan a̱ bai a̱ta̱ssi Ka̱za, dolet na̱ wrak ka̱ryong Ka̱za a̱n shyi a̱ wwat ba̱nyet ba a̱ ka̱ tssup ni zang mba.

7Tyyi rya na a̱mi yin byyi Nuhu a̱n hok diwan Ka̱za ti tazwa ka̱bvung ka a̱ yin cong a̱ bai ni, na̱ hok ba̱ryat Ka̱za ba a̱ nok jirgi. Ka̱yat na̱ nwa sa̱rei bu ba̱nyet ka̱ryi nu ba a̱n shot. Tyyi rya nu na yin yet shirya di ka̱sa ka. Nkpa yin ba di dizizrak ti Ka̱za ka wwat ba̱nyet ba a̱n tyyi rya ni.

8Tyyi rya na a̱mi yin tyyi Ibrahim a̱n hok diwan Ka̱za ti a̱ wruk a̱ nat ka̱byen ka Ka̱za ka yin dop a̱wwon a̱ ni ku ryi ni, ko na̱ wi bvwo ka̱bvwa ka na̱n naat ni. 9Tyyi rya na a̱mi yin tyyi na̱ swat i ka̱byen ka Ka̱za ka yin dop a̱wwon a̱ ni ku ryi ni, a̱ swat ba̱ a mbvut da̱ a̱yecen ni, bu Ishaku bu Yakubu, mba meyang Ka̱za a̱ ma̱ yin dop a̱wwon ba̱ mba. 10Ibrahim a̱ yin swat a̱ pfong ka̱nkrang ka Ka̱za ka nok di bvak nka a̱ ka̱ tuk di cet i.

11Tyyi rya na a̱mi yin byyi Saraya a̱ maai byin ka̱won ka̱ram ka na̱ ka̱n kop a̱ seyak jen ntyei ji ni. Na̱ wrak Ka̱za rya nu na ka ni yya kyang a ka ka̱n dop a̱wwon ni. 12Ko di ka̱ram iya Ibrahim na̱ ka̱n tyyi di kom ni, zwa a̱tuba a̱yring a̱mi ni wruk di ka̱tswa ba̱nyet di na̱ta̱ngwat ni bu ryi ba̱brika̱tei di jijak ka̱nu a̱yring ncen ni.

13Ba̱nyet iya a̱ yin wrak ka̱ryong di Ka̱za har si tat ka̱ram ka ba yin kwi ni. Ba yin san kyang a Ka̱za ka yin dop a̱ ni ba̱ ryi ni ba, ba yin bvwo na̱ ri shyi gba̱gbang a̱zanson ba hok ansham. A̱ shim ka̱sak ka ban yet ba̱yecen ni a̱ yen pfwi-pfwi i ka̱sa ka. 14Ba̱nyet ba a̱ ryat taka̱i nkyang ani ni ba na tyyei ba̱zizrak ka̱sak ka ban byyi ka̱byen ka ba cyang ni. 15Ba da yin hwan i hwa ka̱byen ka ban wruk ni, se ba yin shya ryen na ba nin brek a̱ nat a nka ni. 16Ma di sook mba na ni ba sak a̱ssi mba i ka̱byen ka a̱ ran ka̱nying ka ban wruk ni, ka̱byen iya a̱ shyi Tazwa. Nkpa n byyi Ka̱za kan pfong nsum ba ka̱ yei Ka̱za mba ka ba. Rot ka ka̱n jyi a̱gba̱dang ka̱nkrang a̱ ba̱ wwon ni.

17-18Tyyi rya na a̱mi yin byyi ka̱ram ka Ka̱za kan me Ibrahim na̱ hwaat Ishaku a̱n yya ba̱hyum ni, ko na̱ yin bvwo a̱ yet a̱yin nu Ka̱za a̱ ka̱n dop a̱wwon di Ishaku a̱mi a̱ ni yet ka̱srak nu ka ni, ma na̱ shim a̱ naat ku hywat a. 19A̱ yin dyi Ka̱za a̱ byyi cet ko Ishaku a̱ kwu ka bo ni ku tyyi sso. Da̱ni di zi nin hywa ni, Ibrahim a̱ yin san Ishaku nyyai a̱yabyen.

20Tyyi rya na a̱mi yin tyyi Ishaku a̱n pfwa Yakubu bu Isuwa nda na, rot a̱ yin cam nkyang cong bai.

21Tyyi rya na a̱mi yin tyyi Yakubu a̱ pfwa na̱won Yusufu na nda, a̱ ta̱kwut a̱za̱ shan ka̱cyet nu ji a̱ naai Ka̱za a̱ si wa bvwa a̱n kwu.

22Tyyi rya na a̱mi yin byyi ka̱ram ka Yusufu na̱ naat dikwu ni a̱ tyyei ka̱sak ka na̱won Isreila ba nin wwon ka̱byen Masar ni a̱ si bo ba̱ tyyei kyang a ba bu yya bu rwam nu na ni.

23Tyyi rya na a̱mi yin byyi ba̱tyyi Musa ba a̱ ku nyat a̱n yya hywan tat ka̱ram ku byin ka. Ba yin dyi na̱ yet ka̱sham ba rak hok ka̱wun truwang a̱gwam ji.

24Tyyi rya na a̱mi yin byyi ka̱ram ka Musa na̱n dai a̱ maai a̱yin ni a̱ rak ba ku yei ka̱mbvon Fir'auna. 25A̱ yin tssa a̱ ni sswa ka̱bvung bu ba̱nyet Ka̱za ba, di na̱ hok ansham a̱ka̱tukyya ka̱baram ba̱cincong. 26A̱ yin dyi ku ku myim na̱ sswa ka̱bvung a̱zi hywak Kristi na di na̱ hok ansham nzwa Masar a, rot a̱ssi nu na a̱ yin shyi an zang ji bai a̱zanson ni.

27Tyyi rya na a̱mi yin tyyi Musa a̱n drok Masar, di na̱ hok ka̱wun diryen a̱gwam ti ba, di na̱ bo hwa brek riryim ba anye a̱ yin cyang Ka̱za ka ba wi cyang da̱ a̱ssi ni. 28Tyyi rya na a̱mi yin tyyi na̱n sak Swrap wwon nu, a̱ tyyi ba hyum na̱nu a̱bat mba na di ba̱sok, a̱pfong Ka̱za nu a̱ cong bu dikwu ti ni a̱ ga bu wi hywaai zam ji yet na̱won ka̱tsitsrang Isreila na ni.

29Tyyi rya na a̱mi yin brang na̱won Isreila na ban byyek A̱gba̱dang A̱shong Kei nu anye ba cong a kwot ka̱byen; ma ba̱nyet Masar ba ba bu naat byyek a, ba̱shekwot ba a̱ ba̱ bvwum a̱ tyyi ba kwi.

30Tyyi rya na a̱mi yin tyyi ka̱ram ka na̱won Isreila na ban cong a̱ krang Yariko ni a̱ bvwa nom a̱tiyring ganuwa ka̱nkrang a i trip kpa. 31Tyyi rya na a̱mi yin tyyi Rahab a̱kan-a̱naan nu a̱ shot dikwu ti kpikpit ba̱nyet a yin dak hok Ka̱za ba yin kwi ni, rot a̱ yin san ba̱nyet ba ba tom ba si cyang ka̱nkrang ka ni a̱ ba̱ gwai.

32To, n ma̱n za ka̱son o? Di ka̱ram kan shyi n ni ya twang kpikpit ba̱nyet a ni ba, di ba̱nyet Gidiyan, bu Baraka, bu Samsuna, bu Yaftaha bu Dawuda, bu Samuila, bu ba̱nyet tyyei ba̱ryat Ka̱za ba. 33Tyyi rya mba yin ba̱ tyyi ba kwan bu na̱byen na a̱ ba̱ ya. Ba yin yya kyang a myim ni, a̱ san kyang a Ka̱za ka rop a̱ sak a̱ ni ba̱ ryi ni. Ba yin muk na̱nu nzaki, 34a̱ zzip a̱cecet ndong, a̱ shot hwak di na̱krong. Ncet mba i tyak, Ka̱za a̱ ba̱ ryi cet har ba yin yet kyang ka̱wun ka̱bvwa nzwang a̱ ya nsoja na̱byen na̱yaan. 35Ntyyi rya ba̱nyring ba̱yaan ba̱nyet mba ba ba ka̱n kwi ni ba bo ba̱ san bu sso.

Ba̱yanyet a̱ rak hok ansham a, ba yya da̱ mba ba kwi, rot ba yin tyyi ndya mba na ba ni ta̱za a̱ shya a̱tsatsak sucet cong bai. 36Ba̱yanyet ba ba̱ mai a̱ ba̱ tsot, ba̱yanyet ba ba̱ zzop a̱ tyei a jaru. 37Ba ba̱ mang di kpang ba kwi, a̱ hwak ba̱yanyet di na̱krong a̱ hywaai. Ba̱yanyet, a̱kpa mbvon a̱mi a̱ yet ba̱tro mba ba, ba swat ka̱yat dizot bu ka̱bvung ba yya da̱ mba. 38Ba yin dan ka̱sa ka. Ba ka̱ cong ka̱yat ka̱yit bu tsutsok a̱ kwai ka̱yat nhywra bu a̱bvong ka̱yat ka̱byen.

39Sa̱rei ba̱nyet bani ba za ryi shaida tazwa mba ba yya ansham rot ban tyyi ndya mba na. Ma di ba si wa san kyang a Ka̱za ka rop a̱ ni ba̱ ryi ni ba, 40rot Ka̱za a̱ jyi a̱tsatsak nkyang a̱ sak a̱ ni za ryi. Se Ka̱za a̱ za mon ba̱ mba, ba si tyyi ba̱zizrak.

Currently Selected:

Ibraniyawa 11: kaj

Highlight

Copy

Compare