Ibraniyawa 10
10
1Truwang ba̱nyet Yahuda ji yet bu ma̱nwwuk a̱tsak nkyang cong bai; a̱ yet a̱tsatsak ma̱nwwuk ba. Rot a̱mi ba̱hyum ba a̱ yet bu ba̱yring kozan dirya di ba byyi tyak ba, di Truwang iya zin tyyi ba̱nyet ba a̱ naai Ka̱za ni ba tyyi zizrak ba. 2N da n hywa di ba cii ba̱nyet ba a̱ naai Ka̱za ni a̱ka̱tukyya mba nu, se ba bo byyi hwa a̱ka̱tukyya mba nu ba, da se ba ryok ba̱hyum ba ba̱sa̱rei. 3Ma da̱ni di a̱mi ni, ba̱hyum ba a̱ ri ba̱ yring a̱ka̱tukyya mba nu kozan dirya, 4rot ba̱sok mbvon bu nyak a̱ maai tssu a̱ka̱tukyya ba, ko ba̱cincong.
5Nkpa yin byyi ka̱ram ka Yesu na̱ yin naat ba ka̱sa ka ni a̱ hywa di Ka̱za:
“Ba̱hyum bu za̱nang a cat ba,
ma a n jyi rwam.
6A pfong ansham nyam ji ba na sook sa̱rei a̱ hwwi tazwa ka̱rek ba̱hyum ka ni ba,
da̱ nwan cat ba̱hyum a̱ka̱tukyya ba.
7A̱wwon n hywa, ‘Nzuk nu ni Ka̱za,
n ba n yya pfong a a cat n na̱ yya mi ni;
da̱ni di ban jem ka̱yat kpa Truwang kani.’ ”
8A̱ yet ka̱son a̱ hywa, “A cat ba, da̱ nwan ba pfong ansham ba̱hyum ko za̱nang nyam ji ba na hwwi ba̱sa̱rei tazwa ka̱rek ba̱hyum bu ba̱hyum ba a̱ ni tssu a̱ka̱tukyya ni ba,” ko ban yya da̱ni di Truwang ji zin hywa ni. 9A̱ si bo hywa, “Ka̱za, nzuk nu ni n ba n bu yya kyang a a cat n yya ni.” Rot a̱mi Ka̱za a̱ jik ba̱hyum ka̱tsitsrang ba a̱ sak zan, a̱ ga sak ba̱hyum ba̱hwai ka̱rek mba ka. 10Ka̱sak ka Yesu na̱ yin yya kyang a myim Ka̱za ni a̱ wrak diccu nu nkrang ka̱yring ku maai sa̱rei ba̱hyum ba ba cat i, nkpa n byyi ban za jrang a̱ka̱tukyya njit u i hywak wrak diccu nu na na̱ wrak bu nkrang ka̱yring ni.
11Kozan gado Ka̱za ba̱nyet Yahuda a̱ swat a̱ sseng kozan ka̱tuk a̱ kwot ba̱hyum bu ba̱yring, di ba̱hyum iya di ba maai tssu a̱ka̱tukyya ba̱nyet u ba. 12Ma nu gado Ka̱za a̱ni a̱ krok ba̱hyum nu ba ba̱ nkrang ka̱yring ba maai a̱ tssu a̱ka̱tukyya nu har a̱ba̱da, a̱ brek a̱ si swrang mbvak yak Ka̱za. 13Nyyai ka̱ram iya a̱ shyi pfong Ka̱za ka ra ba̱ra̱ndwan nu ba a̱ tyyi ka̱ntai tak nu ka na̱ cring. 14Rot ba̱hyum nu nkrang ka̱yring a̱ tssu sa̱rei ba̱nyet nu ba a̱ka̱tukyya mba nu ba tyyi ba̱zizrak har a̱ba̱da. Rot ba̱hyum nu nkrang ka̱yring, ba̱nyet ba na̱ ka̱n tssu a̱ka̱tukyya mba nu ni na̱ ba̱ tyyi ba yet ba̱zizrak har a̱ba̱da.
15Tswa Ka̱za ji brak i si bu za tyyei shaida, rot i hywa ka̱tsitsrang ka,
16“Di hywa A̱gwam Ka̱za ni,
a̱zi nom cong bai
kyang a n ni rop n sak ba̱ mba ni ku na ni:
N ni tyyi truwang nzuk ji ka̱yat ndya mba,
n za̱ jem ka̱yat mpfwa mba ka.”
17A̱ si bo hywa, “N ni bring a̱ka̱tukyya mba nu bu a̱ka̱tuk mpfong mba nu mut.” 18Ki ba ka̱n tssu a̱ka̱tukyya nu, ba̱hyum a̱ bo byyi kpungtun ba.
Zi shek ba shishrek bu Ka̱za
19Rot a̱mi, ba̱wumbeyang, zi drok n nwa ba̱set si nat A̱kpok A̱zizrak Ka̱bvwa rot ba̱sok Yesu ba. 20A̱ za yrang a̱hwai ryen nu a̱ sso ni zi si seyak nwa labule na yet rwam nu na ni si tat A̱zizrak Ka̱bvwa nu. 21Zi shyi ba̱ a̱gba̱dang Gado Ka̱za nu Ka̱ryi Ka̱za ka sa̱rei ka shyi mbvak nu ni. 22Rot a̱mi se zi tun ka̱wun ba̱ a̱ka̱tuk a̱huhwa njit u jing, i tssu ndwam njit a di a̱zizrak ba̱shekwot, i drok nat di Ka̱za bu ndya njit ba̱set rot wrak ka̱ryong njit a. 23Se zi breng di cet ka̱bvwa sak rya njit ka zi ka̱n shim di na̱nu njit ni, rot Ka̱za a̱ ni sseng an kyang a ka rop a̱ sak ni. 24Se zi hwa ansham na̱ta̱ryen na zi nin brang ba̱yaan dicet i, zi gi ya gwai, i bu yya kyang a myim ni. 25Zi ryok tyong na̱tung ba̱nyet tssup a ba, da̱ni di ba̱yanyet ban yya ni. Se zi ta̱gbak ba̱yaan da̱ni di zin dyi nom A̱gwam Yesu kun cong bai ba̱shishrek ni.
26Ki zi ka̱n bvwo ka̱ryong ka i si bu ya ka̱son bu yya a̱ka̱tukyya nu ba̱kpot, ba̱hyum ba̱yaan a̱n shyi a̱ bo ni za tssu a̱ka̱tukyya nu ba. 27Sa̱rei kyang a bvat i nkpa yet zi swat bu ka̱wun pfong shirya Ka̱za bu diryen nka ti ni hwwi ba̱nyet ba a̱ shyi gagak ba̱ nka ni. 28Ki ba shya a̱ntyok ba̱nyet Yahuda na̱ cring truwang Musa jring, ba ni ku hywat a̱n byyi dizot ba, ki ba shya shaida a̱ tat ba̱nyet ba̱hwa ko ba̱tat. 29Ba̱lle a̱tuba nu a̱ byyai Ka̱won Ka̱za ka ni, a̱nzan taka̱i shirya ba ni ku yya mi. A̱tuba nu a̱ rak ba̱sok rop-wwon ba ba ka̱n ku san a̱wwon ni, ba̱sok iya a̱mi a̱ ku tssu a̱ka̱tukyya nu nu, a̱ si bo yya Tswa Ka̱za ji pfong dizot njit ni na̱nyan. 30Zi bvwo Ka̱za, a̱tuba nu a̱ hywa, “Nzuk a̱mi ni tan na̱kpot a ba ya yya mi ni. N ni ya tan ni.” Nu a̱mi a̱ bo hywa, “Ka̱za a̱ ni yya ba̱nyet nka shirya.” 31Kyang ka̱wun a̱mi a̱yin a̱ kpa mbvak Ka̱za ka a̱ byyi sucet ni.
32Yi yring kyang a yin ya shya ka̱ram ka yi ka̱n san ka̱bvwa sai Ka̱za ka ni. Ko yi yin kwan sswa ka̱bvung ni, yi sseng di cet. 33Ka̱ram ka seyak ni ba ya pfwei bu tsot ba̱ a̱za̱kpai. Yi bu mon a̱ccu nyin bu ba̱nyet ba a̱ ma̱ yin sswa taka̱i ka̱bvung iya ni. 34Yi sswa ka̱bvung bu ba̱nyet ba a̱ shyi a jaru ni, ba ssang nkyang nyin a̱n ya bvwo da̱ nyin ba kula ba yi shyi bu gwai, rot yi yin bvwo yi shya kyang a ran a̱mi ni, kyang a di ku byyi tyak ni ba. 35Rot a̱mi yi ryok ntun ndya nyin na ba. Ku ni ya ba da̱ a̱gba̱dang nzang. 36Dolet yi yya hakuri i gi yya kyang a myim Ka̱za ni, i gi san zang ji ka ryat a̱wwon a̱ ni ya ryi ni. 37Rot Ba̱ryat Ka̱za ba a̱ hywa,
“Ka̱baram a̱ bvat ba̱cincong,
a̱ntyok cong bai u a̱ ni ba;
a̱ ni kwak rwam ba.
38Tyyi rya a̱mi ni tyyi a̱zizrak a̱yin nzuk u a̱n kaat;
ma ka̱ brek riryim
n bo n pfong shok nu ba.”
39Njit zi shyi i ba̱nyet ba a̱ brek riryim ka ni a̱ brik ni ba. Njit zi wrak Ka̱za ndya njit, ka ma̱n za san.
Currently Selected:
Ibraniyawa 10: kaj
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
