Ibraniyawa 9

Naai Ka̱za ka̱sa bu Tazwa

1Kyang ka̱tsitsrang a Ka̱za ka yin dyat a̱ sak ni i yin byyi truwang ka̱sak ka ba nin naai Ka̱za ni. Ka̱bvwa naai a̱ si bon shyi ka̱nying ka ba̱neywu ba yin nok ni. 2Ba yin yya tenti. Ka̱byekwuk ka ba yin yei A̱zizrak Ka̱bvwa. Ka̱ yemi fitila ji zi yin swat, bu tebur ji bu burodi na ba yin sak Ka̱za mi ni. 3Ka̱ a̱yin a̱ seyak labule a̱mba̱hwa na a̱ nwa ka̱swang ka̱yat ka, ba ka̱ yei A̱kpok A̱zizrak Ka̱bvwa. 4Ka̱ yemi a̱ntwam zinariya nu ba yin hwwi turare ji ni na̱ yin shyi. Ba yin tyyi manna i ka̱bandrong ka ba nok di zinariya ni. Ba tyyi ka̱bandrong ka bu shan Haruna ji yin truk ni bu kpang swa ji ba yin jem Truwang ji ni ka̱yat a̱kwati rop-wwon ka ba kup di zinariya ni, a̱ sak ka̱yat A̱kpok A̱zizrak Ka̱bvwa nu. 5To, tazwa a̱kwati rop-wwon ka nkyang nzaan yin shyi ban yei cerobim (ba yet nyam nhweyak), nna yin tyyei nshyi Ka̱za bu shii nka na kozan ka̱ram. Mba cerobim u a̱ yin trak nhweyak mba na tazwa ka̱bvwa ka ba yin cii a̱ka̱tukyya nu ni. Ma ka̱ram kani a̱ yet ka̱nying ya tyyei kozan kyang ba.

6A̱mi ba yin jyi nkyang ani a̱ sak sa̱rei. Ba̱gado Ka̱za ba a̱ yin shyi ka̱nu tenti rop-wwon ka a̱ yya pfong kozan ka̱ram. 7Seko a̱gba̱dang gado Ka̱za nu a̱mi ba̱diyin a̱ ri nwa a̱ nat ka̱yat ka nkrang ka̱yring i dirya. Na̱ nwa bu ba̱sok a̱ sin pfwa nda rot diccu nu bu a̱ka̱tukyya nu kpikpit ba̱nyet a ba yya i cyi ni. 8A nkyang ani ba yin yya ni Tswa Ka̱za za zzek ba̱zizrak ka̱sak ka ba ri nswat yrang ryen nwai A̱zizrak Ka̱bvwa nu ni, ki ka̱nu tenti iya a̱ ri sseng. 9Yi ryi, nkyang a za tyyei ka̱ram kani ni. Na za tyyei ka̱sak ka ka-kyang bu hwak nyam yya ba̱hyum n pfwa nda ku maai i tssu ndya ba̱nyet a a̱ naai Ka̱za ni na tyyi zizrak ba. 10Nkyang ani yin shyi bu i ya bu sswa bu tssu nkap. Sa̱rei nkyang ani hwan bu i rwam se ka̱ram ka Ka̱za kan shei kozan kyang ni.

11Ma Yesu Kristi a̱mi a̱ yet A̱gba̱dang Gado Ka̱za a̱nying a̱tsatsak nkyang u zi ka̱n shya ni. Tenti na na̱n yya pfong a ni ra̱u sa̱rei i bu yet a̱zizrak, di ba kpo yya di mbvak ba̱neywu ba, wato, ku shyi a nkyang a Ka̱za ka yin krok i ka̱sa ka ni ba. 12Ka̱ram ka nu Kristi na̱ yin nwa ka̱yat tenti iya, a̱ nwa ba̱ nkrang ka̱yring a̱ si tat a A̱kpok A̱zizrak Ka̱bvwa nu, di na̱ yin breng ba̱sok mbvon bu na̱won nyak a̱n nat ba̱hyum ba, ma ba̱sok nu na̱ yin nat i a̱ ga sin za san a̱ kaai a̱ wwon har a̱ba̱da. 13Ki ba sook ba̱sok mbvon bu nyak bu ntong a ba yin hwwi na̱won nyak a ni a̱ fut ba̱shishik ba̱nyet ba mi, nkyang iya ba̱ jrang. 14Rot a̱mi ba̱sok Kristi, nu a̱ wrak diccu nu a̱zizrak ba̱hyum di Ka̱za ka̱yat cet nTswa nka, ba yya pfong ba̱gingang a̱ ran ba̱sok nyam ba. Ba̱sok nu ba a̱ ni jrang a̱huhwa njit u a̱ za tssu a̱ tun a a̱ka̱tuk mpfong u a̱ ni nat ba̱ njit dikwu ni zi gi maai i yya Ka̱za ka a̱ yet a̱cet ni dikwwa.

15Rot a̱mi Yesu a̱mi a̱ sook bvak a̱hwai ba̱ryat a Ka̱za ka ryat a̱ sak ni, rot ba̱nyet ba Ka̱za ka yei ni a̱ ga shya ka̱nu-a̱tan ka̱u di tyak u Ka̱za ka rop a̱ sak a̱ ni wrak ni. Ku yet a̱hyom rot dikwu ti a̱tuba a̱yring na̱ kwu ni a̱ ga tun na̱hywak ba̱nyet a a̱ wwon nyyai ba ri tssup ka̱tsitsrang rop-wwon ka.

16Ka̱ a̱yin a̱ wrak digado, ba na sook digado ti ba, se ba bu ryi na̱ kwu. 17Rot ka̱ram ka a̱yin nu na̱ ri nswat a̱cet ni, digado ti yet kyang di ba̱nyet ba a̱ ni sook ni ba, se ka̱ram ka na̱n kwu ni. 18Nkpa n byyi ka̱tsitsrang rop-wwon ka a̱ yin byyi cet ba, se bu ba̱sok. 19Rot ka̱ram ka Musa na̱n tyak ba̱ twang sa̱rei Truwang ji ni, a̱ bvwa ba̱sok na̱won nyak bu bvon a̱ kyyai bu ba̱shekwot, a̱ rop a̱shong wulu nu a a̱pipyyi hisop, a̱ hyum ba̱sok ba tazwa kpa Truwang na bu ba̱nyet ba sa̱rei, 20a̱ hywa, “Ba̱sok bani a̱mi a̱ yet shaida an kyang a Ka̱za ka rop a̱ sak ba̱ nyin yi tyong ni.” 21A̱mi brak na̱ hyum ba̱sok ba i tenti rop-wwon na bu sa̱rei nkyang naai Ka̱za na yin shyi i tenti na ni. 22Ka̱ryong a̱mi Truwang Musa ji hywa, ni di kozan kyang ba kpo tssu di ba̱sok a̱mi; ki ba weyang ba̱sok ba, ban tssu a̱yin a̱ka̱tukyya nu ba.

Kristi a̱ wrak diccu nu a̱ ga sook a̱ka̱tukyya ba̱nyet

23Nkyang ani yet bu ma̱nwwuk nkyang ka̱ryong a shyi Tazwa ni, ma nkyang Tazwa na cat a̱tsatsak ba̱hyum u a̱ ra̱u ni ni. 24Rot ka̱bvwa ka Yesu na̱ yin nwa ni ba yin ka̱ nok di bvak ba̱neywu ba, di ka yet ma̱nwwuk a̱nying ka̱ryong a ba. A̱ yin wrak a̱ nat Tazwa, ka̱ yemi naanini na̱n sseng a̱ta̱ssi Ka̱za a̱zi hywak njit. 25A̱gba̱dang Gado Ka̱za ba̱nyet Yahuda nu a̱ ri nwa a̱ nat a A̱zizrak Ka̱bvwa nu nkrang ka̱yring i dirya bu ba̱sok nyam; ma Yesu a̱ wrak diccu nu nkrang ba̱gingang ba; 26ka̱ a̱mi a̱ si bu sswa ka̱bvung nkrang ba̱gingang nyyai ka̱ram ka ba̱ yin yya ka̱sa ka ni. Ma ba̱ nkrang ka̱yring na̱n sseng a̱ tyak ka̱ram ka zamani na kun ba ka̱nu tyak ni, a̱ bu wrak diccu nu ba̱hyum a̱ ga tun a̱ka̱tukyya ba̱nyet u. 27Koyan a̱ ni kwu nkrang ka̱yring a si nat a̱ta̱ssi Ka̱za ka si ku yya shirya. 28A̱mi meyang Yesu na̱n wrak diccu nu ti nkrang ka̱yring a̱ ga sook a̱ka̱tukyya ba̱nyet ba̱gingang. I brek a̱mba̱hwa nu na a̱ bai ba̱ryat a̱ka̱tukyya ba, seko a̱ ga bu san ba̱nyet ba a̱ swat a̱ ku pfong ni.

Currently Selected:

Ibraniyawa 9: kaj

Highlight

Copy

Compare