Galati 5

Yesu a̱ za san a̱ kaai a̱ wwon

1Kristi a̱ za san a̱ kai a̱ wwon; nkpa yet kyang a na̱ cat za yya mi ni. Rot a̱mi yi sseng ansham, ho yi bu bu brek si nwa dikwwa brak.

2Nzuk a̱mi Bulut n dyat ba̱ nyin. Yi cam kyang a n ya tyyei ni. Ki yi shim ba ya tyyi ncen, to, Kristi a̱ bo shyi ka̱nu nkyang da̱ nyin ba. 3Nkpa n bo ya tyyei yi gi bvwo: a̱yin nu a̱ shim ba ku tyyi ncen na̱ ga n myim Ka̱za ni, dolet a̱mi na̱ tssup sa̱rei Truwang ji. 4Nyin ba̱nyet ba cat i myim Ka̱za ta ka̱rek tssup Truwang ni, yi ya gang bu Yesu, si bu wai za̱nang Ka̱za ji. 5Ma da̱ni da̱ njit ni, zin sak rya Ka̱za a̱ ni za tyyi zi ka̱ myim. Nkpa a̱mi zin shyi i tot a, ta ka̱rek Tswa Ka̱za ji brang ntyyi ndya njit a ni. 6Ki zi ka̱n shya Yesu Kristi, di tyyi ncen di wi tyyi ncen njit yet kyang ba. Tyyi ndya njit a nkpa yet kyang a ya tyyei ka̱yat cat ni.

7Yi sook cyi ji ansham, to, a̱nzan a̱ bu ya brak ndya na yin dak tssup ka̱ryong ka? 8A̱yin nu a̱ bu ya brak ndya nyin na ni a̱ nyyai ka̱rek Ka̱za ka a̱ ya yei ni ba. 9Da̱ni gan ji zin hywa ni, “Ka̱bacincong yisti nka a̱mi a̱ na ngeyak dikwang burodi ti sa̱rei.” 10N byyi rya a nyin, mon diccu njit ti ka̱yat A̱gwam Yesu n tyyi n hok ka̱wun di yi ni sook ryen yaan ba. Ma a̱yin nu a̱ ya zun ni a̱ shyi bu ka̱bvung, ko a̱nyan a̱mi na̱ yet.

11Ma ki n za ka̱son bu zzek di tyei ncen na yet dolet, to ba ni yya da̱ nzuk ba. Ki iyemi yet ka̱ryong a̱mi, to, i ryen iya ba̱nyet a̱ bo ni pfwei a̱ rak dikwu Yesu Kristi ti ba. 12N cat ma ba̱nyet iya a̱ ya kikyyai iya ni a̱ ya ka̱son a̱ bvok a̱ccu mba di na̱rom ni.

13Da̱ni da̱ nyin ni ba̱wumbeyang, a̱ ya yei a̱ ga ya san a̱ wwon, ma yi ryok san a̱ccu nyin na i bu si yet hywak a ni tyyi ndwam nyin i sswa cet nyin ni ba. Seko yi tyyi cat ba̱yaan a̱zanson i gi shya ya brang. 14Rot Truwang ji tung sa̱rei an truwang jring: “Cat a̱wumba nwan ka̱sak ka an cat diccu nwan ni.” 15Ma ki yi yya di ba̱yaan ya bvei di nyam ni, to yi ta̱rwam ho yi bu ya hywaai tyak.

Tswa Ka̱za bu hali a̱neywu

16Kyang a n dyat ni nkpa yet: Yi wwon Tswa Ka̱za ji ya kwak ka̱son i swat nyin na, ho yi bu tssup kyang a ndwam nyin na cat i. 17Rot a̱ka̱tuk hali njit u a̱ ya byyi bu kyang a Tswa Ka̱za ji zi cat i ba. A̱mi meyang kyang a Tswa Ka̱za ji zi cat i ya byyi bu kyang a a̱ka̱tuk hali njit u na̱ cat i ba. Wato ba yet ba̱ra̱ndwan ba̱yaan, rot a̱mi a̱yin a̱ maai a̱ yya kyang a na̱ cat i ba. 18Ma ki Tswa Ka̱za a̱mi ya kwak, to, Truwang ji byyi cet tazwa nyin ba.

19Nkyang ndwam a shyi ba̱ a̱za̱kpai, nna yet kan a̱naan bu a̱shishik yya bu sang nsum 20bu kok nkyang nzaan ntong nta̱mak bu bvok. Ba̱nyet a̱ rak ya ryi a̱ kwan, a̱ swat bu swam ba̱yaan bu diryen nta̱mak bu a̱huhwa nu a̱ seyak cet mba ni. A̱ ya sang a̱n yya na̱srong bu ba̱tswa, 21bu swam bu hyong bu dira̱ntong bu nkyang nzaan a̱mi. Nkpa n ya ghap da̱ni n yin ya ghap nyyai ka ni: ba̱nyet ba a̱ yya nkyang ani ni a̱ ni maai nwa Dityok Ka̱za ti ba.

22Ma Tswa Ka̱za ji cong di cat bu ba̱gwai bu myyi rya bu hakuri bu kun dizot bu ditsatsak bu aminci, 23a̱ bo tyyi a̱yin a̱ ya breng an kyang ba, a̱ cam diccu nu. Truwang nshyi nbvwo taka̱i nkyang ani ba. 24Ba̱nyet ba a̱ yet ba̱nying Yesu Kristi ni a̱ ka̱n hywat a̱ka̱tuk hali mba nu bu cat nu na. 25Ka̱sak ka zin swat an Tswa Ka̱za ji ni, ryok zi cong bu Tswa Ka̱za ji za jyet sucet iya ni. 26Zi ta̱rwam bu yet a̱ccu njit, i ryok byyan ba̱yaan ndya ba, i bu ryok pfong nswam ba̱yaan ba.

Currently Selected:

Galati 5: kaj

Highlight

Copy

Compare