Galati 6
6
Yi cot ncot ba̱yaan
1Ba̱wumbeyang, ka̱ a̱yin a nyin a̱ si nwa hywak, nyin ba̱nyet ba a̱ cong ansham an Tswa Ka̱za ni yi ku brak tyyi i ryen na. Ma yi ku brak ba̱shinshwon, i ta̱rwam ba̱ a̱ccu nyin, ho yi ma̱ bu kwei. 2Yi ya brang ccok ncot ba̱yaan i gi myim truwang Yesu Kristi ji. 3Ka̱ a̱yin a̱ ya breng an kyang di na̱ yet kyang ba, to, a̱ raai bu diccu nu. 4Ku myim koyan a̱ cyang taka̱i ka̱cyet nu na a̱ ryi ki ku myim, na̱ si nwa ya gba an kyang a na̱ ka̱n yya ni, di na̱ ryok mak kyang a na̱ yya ni bu nying na a̱yanyet na̱ ka̱n yya ni ba. 5Rot koyan a̱ ni hok bu nnuu.
6Ku myim a̱yin nu ba zzek i ba̱ryat Ka̱za ni na̱ ka a̱tsatsak nkyang u na̱ byyi ni ba̱ a̱ntyok ku zzek u.
7Yi ryok ya raai ba, ba zzang Ka̱za ba. Bu kyang a a̱yin na̱ tup ni nkpa na̱ ni nkpyei. 8Ka̱ a̱ tup kyang a rwam nu ku cat i, a̱ ni kpyei dikwu. Ka̱ a̱ ma̱n tup nying Tswa Ka̱za, a̱ ni kpyei sucet ka̱u di tyak. 9Rot a̱mi zi ryok rwan bu yya a̱tsatsak nkyang ba; rot ki zin tyyi bu rya, ka̱ram kpyei ka a̱ ni ba. 10Rot a̱mi se zin tyyi ka̱ssi i brang sa̱rei ba̱nyet ba zi shya brang ni, tun ba ba̱nyet ba a̱ shyi i tssup a ba̱ njit ni ba.
A̱ngbom tssap bu byet
11Yi ryi a̱cecet zizwa nu n ya jem mi di bvak nzuk ni.
12Ba̱nyet ba a̱ cat tyyei ba maai ba̱nyet ni, mba a̱mi a̱ ya gwwak a̱ tyei i tyei ncen na. Ma ba yya a̱mi ba ga wi sswa ka̱bvung sabo bu ka̱teyang Yesu Kristi na. 13Ko mba ba̱nyet ba a̱ ri tyei ncen na ni a̱ tssup Truwang ji ba, ma ba cat yi tyyi ncen na ba ga ya gba ka̱sak ka ban ya brak a̱ tyyi i tssup tada mba ji ni. 14Ma ka̱bvwa nzuk, se bu ka̱teyang A̱gwam njit Yesu Kristi nkpa a̱mi yet kyang a n ni ya gba ni. Rot i hywak ka̱teyang na a̱mi ka̱sa ka ka nin yet kom da̱ nzuk, nzuk n ma̱n yet kom di ka̱sa ka. 15Di tyyi ncen di sang tyyi ncen kun yet bu ka̱yring. Kyang a nyet a̱kpok ni nkpa yet a̱hwai sucet u Ka̱za ka wwat i. 16Ba̱nyet ba a̱ tssup taka̱i truwang jini ni, Ka̱za a̱ ba̱ ryi myyi ndya. Mba a̱mi a̱ yet Isreila Ka̱za nu.
17A̱ngbom nkyang u n ni hywa ni: n cat a̱yin a̱ bo n shwu a̱pfo ba. A̱huhuk a n byyi i rwam nzuk a̱ tyyei ka̱sak ka n nin yet a̱kwwa Yesu ni.
18Ba̱wumbeyang, n naai a̱liheri A̱gwam njit Yesu Kristi a̱ swrang bu Tswa nyin ji. Amin.
Currently Selected:
Galati 6: kaj
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
