Galati 4

1Kyang a zi bu ni cyang naat a̱zanson ni nkpa yet, ka̱won ka a̱ ni kok digado a̱tyyi ni nyyai ka yet cincong ba na yen ka̱ breng da̱ a̱kwwa ni ma kozan kyang yet nkaa. 2Ka̱ram ka na̱n yet ka̱bawon ka ni ba̱yanyet a̱n shyi a̱ ku cam, ba̱yanyet a̱ bo nshyi a̱ cyang nkyang nu na, kozan kyang nyin ni ryi di Yesse ka̱ram ka a̱tyyi nu na̱ sak ni a̱ bu yya. 3A̱mi meyang zi ma̱ yin yet ba̱kwwa a̱ka̱tuk tswa nu a̱ breng ka̱sa kani ni, se ka̱ram ka zin maai breng nkyang Tswa Ka̱za na ni. 4Ka̱ram ka ka bu yya a̱ maai, Ka̱za a̱ tom Ka̱won nka, a̱ra̱mbyring a̱ bu ka̱ byin, a̱ tssup Truwang ba̱nyet Yahuda ji 5a̱ ga shya san ba̱nyet ba a̱ ri shyi i tssup Truwang ji ni zi shya yet na̱won Ka̱za.

6Yi gi bvwo yi yet na̱won Ka̱za, Ka̱za a̱ tom di Tswa Ka̱won nka ji a̱ ndya njit a, Tswa ji a̱mi na tyyi zi maai i yei Ka̱za, “A̱tyyi, A̱tyyi nzuk.” 7Rot a̱mi naani yi bu yet ba̱kwwa ba, yi yet na̱won. Ki yi yet na̱won, Ka̱za a̱ ni ya ryi kozan kyang a yet nying na̱won nka na ni.

Bulut a̱n byyi rya tazwa ba̱nyet Galati

8Nnyyai yi yin bvwo Ka̱za ba, rot a̱mi yi yet ba̱kwwa nkyang nzaan na ma yet Ka̱za ni ba. 9To ba̱nyying a̱mi yin bvwo Ka̱za -- ko n ma̱n hywa Ka̱za ka ya bvwo -- to a̱nzan a̱ ya bvwot i a̱ naat i da̱ a̱bubvot bu nkyang dizot iya? A̱nzan a̱n byyi yi bun cat brak bu si nwa dikwwa nna brak? 10Yi sook a̱ssi nyin sak cam nom nzaan bu nhywan bu jen ba̱ a̱rya. 11N pfong ka̱wun pfong a n yya ba̱ nyin ni ku bu nat ba̱nza.

12N ya naai ba̱gingang ba̱wumbeyang, yi ryi da̱ nzuk ni, rot nzuk n dyi da̱ nyin ni. Yi ka̱ n ywap an kyang ba. 13Yi bvwo kyang a yi n tyyi n ni ya yya wa'azi Ka̱sham Ba̱ryat u ni ka̱tsitsrang kani, n yi ya pfong ba. 14Ma da̱ nyin ba n dak ba, da̱ nyin ba n byyai ba, ko hywu rwam nzuk a ku yin yet kyang ka̱mak ka̱rek nyin ni. Ma yi n san da̱ a̱pfong Ka̱za ni, da̱ni di yi si bun san Yesu Kristi ni ma. 15Yi yin gwai i yya ma anye yi ni trung a̱ssi nyin na n dyi. To a̱nzan na̱ bo ya ba? 16Naani n tyyi a̱ra̱ndwan nyin ho n ya tyyei ka̱ryong o?

17Yi ni ryi da̱ni di ba̱nyet ba̱yaan iya a̱ byyi rya a nyin ba̱gingang ni, ma a̱huhwa mba nu a̱ yet a̱ka̱tuk tazwa nyin. Kyang a ba cat ni ba ya gang a̱ tun da̱ nzuk yi gi ba̱ pfong. 18Ko n nin shyi ko n nin shyi ba, ku myim a̱yin a̱ byyi rya ki kyang iya yet a̱tsatsak. 19Na̱won nzuk, da̱ni da̱ a̱mbyring ntyei na̱ nan hok dikwu nbyin ni, nzuk n bo pfong dikwu bu tiyring a̱za̱n nyin, se ka̱ram ka ndya nyin na nan brak a̱ tyyi nying Yesu ni. 20Anye se n shyi ba̱ nyin naani e, n ga shei diwan nzuk ti a̱za̱ nyin, rot n shyi i ba̱dam tazwa nyin ba̱gingang.

Rop-wwon tazwa Saratu bu Hajara

21Yi ryok n zzim ba̱nyet ba a̱ cat tssup Truwang ji ni. Yi bvwo kyang a Truwang ji zi hywa ni e? 22Ba jem a̱ hywa: Ibrahim a̱ yin byyi na̱won na̱hwa. Ka̱won ka̱yring a̱ yin hyok a̱mbyring ka̱tsitsrang u, ka̱yring a̱ hyok da̱ a̱mbyring a̱mba̱hwa nu a̱ yin yet a̱kwwa ni. 23Ka̱won a̱mbyring ka̱tsitsrang ka ba shya ka̱hwa nka ka a̱ ka̱ byin di kyang a Ka̱za ka yin dop a̱ sak ni, ma byin ka̱won a̱kwwa na yin dyi di ban tyei kpikpit na̱won na ni. 24Ki zi sook ba̱nyring ba̱hwa bani ba za ryi di rop-wwon ba̱hwa. A̱yin nu a̱ byin ba̱kwwa ba ni nu a̱ yet Hajara, nu a̱ si ryi di rop-wwon dihwan Sinai u ni. 25Hajara a̱mi a̱ shyi ka̱nu dihwan ti shyi i ka̱byen A̱rabiya ka ni, a̱ bo yet a̱lama ka̱nkrang Urushalima ba̱nyying u a̱ shyi i dikwwa bu sa̱rei na̱won nka ba̱nyet Yahuda ni. 26Ma a̱hwai Urushalima Tazwa nu a̱mi a̱ yet a̱naa njit u. A̱ shyi i dikwwa ba. 27Rot ba̱ryat Ka̱za ba a̱ hywa ni tazwa a̱naa njit ka,

“Gwai ba̱t, nwan a̱na̱kwu a̱ra̱mbyring.

Bvom tazwa i gwai, nwan nu wi ka̱n hok dikwu nbyin ni.

Rot a̱tuba nu a̱ntyok u na̱ nyying ni

a̱ ra̱u a̱ntyok nyreng u di na̱won na.”

28To, ba̱wumbeyang, njit zi ma̱n yet na̱won na Ka̱za ka yin dop a̱ sak da̱ni di Ishaku ni. 29Da̱ni di a̱tuba nu ba yin byin di kpikpit na̱won na na̱ yin cat yya da̱ a̱tuba nu a̱ yin nyyai di Tswa Ka̱za ji ni, a̱mi kun dyi naani ni brak. 30Ma a̱nzan ba̱ryat Ka̱za ba ban hywa? “Nyying a̱kwwa a̱ra̱mbyring u bu ka̱won nu ka, rot kan ka digado bu ka̱won a̱mbyring ka̱tsitsrang ka ba.” 31Rot a̱mi ba̱wumbeyang, njit ba̱nyet tssup zi yet na̱won a̱kwwa a̱ra̱mbyring a ba, zi yet na̱won a̱mbyring ka̱tsitsrang a.

Currently Selected:

Galati 4: kaj

Highlight

Copy

Compare