Kolosi 3

1To, da̱ni di ban ya shyek ndung bu Kristi ni, dolet se yi brak ndya nyin na tyyi a nkyang a shyi Tazwa ni, ka̱rek ka Kristi diccu nu na̱n swat a a̱ntwam dityok nu mbvuk yak Ka̱za ni. 2Yi tyyi ndya nyin na a nkyang iya shyi Tazwa ka ni, i wwon nying na shyi kyi i ka̱sa ka ni, 3rot nyin yi ka̱n kwi, sso nyin ji i shyi nrang bu Kristi di Ka̱za. 4Sucet ka̱ryong nyin na nkpa yet Kristi. Ka̱ram ka na̱n wruk a̱ swrang ni nyin meyang yi ma̱n swrang ba̱ nu i shya ka̱ssi nyin ka i dityok nu ti.

A̱kukwo sucet ba̱ a̱hwai u

5Rot a̱mi, se yi sswa cet a̱huhwa nkyang ka̱sa na yi cat i: da̱ni di kan-a̱naan ni, ka̱cyet dira̱ntong, a̱ka̱tuk a̱huhwa, cat nkyang ka̱sa (nna ni yet tssup na̱za na̱yaan ni.) 6Ntaka̱i nkyang ani a̱mi kwak diryen Ka̱za ti tazwa ba̱nyet ba a̱ rak ka̱ pfong a ni. 7Nyin ma yi yin cong taka̱i ka̱cyet iya, ka̱ram iya a̱ka̱tuk nkyang a̱ni na̱ ri shyi yya cet ka̱yat mpfwa nyin.

8Ma dolet nkyang ani yi na̱ weyang: da̱ni di diryen ni, bu fwi diryen, bu na̱kpot, bu a̱kyyat ko rak ryi ba̱yaan. Di ditok ko a̱ka̱tuk ba̱ryat ba ryok ku hok ka̱nu nyin ba. 9Yi ryok bvei ba̱yaan diraa ba, rot yi ka̱n tun a̱ka̱tuk a̱yin a̱ywu a̱ shyi ka̱yat nyin ka ni ba̱ a̱ka̱tuk hali nu nu, 10i sook a̱hwai a̱yin nu Ka̱za ka yya ba̱ a̱hwai di ka̱sak ka kan dyi ni, yi gi tat ka̱rek ka ka nin ya ssek yi ka̱ bvwo ba̱cicrak ni. 11Rot a̱mi zi yet ba̱ a̱yring, di ba̱nyet Yahuda di nwap nzaan, di ba̱nyet ba ba ka̱n ba̱ tyyi ncen ni di ba̱nyet sang ncen, di ba̱necen di ba̱gbyik ba̱nyet, di ba̱kwwa di ba̱nyet ba a̱ swat a̱ccu mba ni, se Kristi a̱mi a̱ yet kozan, nu a̱mi a̱ si bo shyi ka̱yat koyan.

12Yi yet ba̱nyet Ka̱za. Ka ya cat a̱ ya tssa a̱ tun yi yet ba̱nkaa. Rot a̱mi se yi pfong dizot ba̱yaan i ba̱ yya ditsatsak, koyan a̱ breng diccu nu di kyang ni ba, yi ya cam ba̱shinshwon bu hakuri. 13Yi brang ba̱yaan i ryok ya breng a mpfwa ba. Ko a̱yin a̱ byyi a̱dyying ba̱ a̱yaan na̱ ku cii mi ka̱sak ka A̱gwam Yesu na̱n za cii i ni. 14Sa̱rei nkyang ani yin brang gwai ba̱yaan, yagwai a a̱mi yet diccu kozan a̱tsatsak ka̱mon. 15Yi ryok myyi rya na Kristi na̱ ya ryi ni ku breng ndya nyin na. Nkpa a̱mi Ka̱za kan ya yei a̱ tyyi i rwam yring a. Yi ka̱ dyep. 16Dolet a̱mi ba̱ryat Yesu ba bu sa̱rei bu shya na ba byyi ni a̱ shya ka̱bvwa swrang a ndya nyin. Yi ya zzek da̱ mba bu sa̱rei a̱za̱ncyi na yi byyi ni ka̱yat a̱bvom Zabura ba̱ a̱nying dyep Ka̱za, i bvom Ka̱za mi i ka̱ gwai ka̱yat ndya nyin ka. 17Kozan kyang yi yya, ko i ba̱ryat ko pfong, yi yya sa̱rei ka̱yat diyrek A̱gwam njit Yesu, i dyep A̱tyyi Ka̱za mi a̱zi hywak nu.

Taka̱i swat a myim ba̱nyet tssup ni

18Ba̱nyring, yi pfong ba̱ntyok nyin ba, rot a̱mi kun myim ba̱nyet tssup ba a̱n swat.

19Ba̱ntyok, yi gwai ba̱nyring nyin ba i ryok yya da̱ mba ba.

20Na̱mawon, yi tyong ba̱tyyi nyin ba kozan ka̱ram, rot taka̱i iya a̱mi Ka̱za ka cat.

21Nyin meyang ba̱tyyi, yi ryok hywei na̱won nyin na diryen ba, ho ba bu rwan a̱ brak brik ka̱ssi.

22Nyin ba̱kwwa, se yi pfong ba̱nyet ba yi ba̱ yya dikwwa ti ni kozan ka̱ram, ba se bu ka̱ram ka ban sseng a̱ ya cam ni ba, ba ga hok ansham nyin, ma yi yya bu rya yring rot A̱gwam Ka̱za a̱mi yi tyong. 23Kozan kyang yi yya, yi yya bu rya yring di A̱gwam Ka̱za yi ku yya mi ni, ba a̱neywu ba, 24rot yi bvwo Ka̱za a̱ ni ya ryi digado ti yet zang ji ka sak ba̱nyet nka ba mi ni. Kristi a̱mi a̱ yet a̱tuba nu zi ku yya dikwwa ti ni. 25A̱yin nu a̱ ma̱n yya kyang a myim ni ba, ko a̱nyan a̱mi na̱ yet, ba ni ku ryi zang nu, rot Ka̱za a̱ yya koyan shirya nka, a̱n byyi cat diccu ba.

Currently Selected:

Kolosi 3: kaj

Highlight

Copy

Compare